ورال. قازاقپارات - باتىس قازاقستان وبلىسىنا سوڭعى بەس جىلدا 402 جاس مامان كەلسە، سونىڭ تەڭ جارتىسى اۋىلدىق جەرلەرگە جىبەرىلدى.
وبلىستىق دەنساۋلىق ساقتاۋ باسقارماسىنىڭ باسشىسى قاميدوللا يرمەنوۆتىڭ ايتۋىنشا، 2011 جىلى وڭىرگە 43 (20-سى اۋىلداردا ورىن تەپتى)، 2012 جىلى 82 (34)، 2013 جىلى 126 (64)، 2014 جىلى 64 (32)، بيىل 87 مامان (52) كەلدى. سولاردىڭ 30-35 پايىزى - باسقا ءوڭىردىڭ ازاماتتارى. قازىرگى كەزدە باتىس قازاقستاندا الماتى، قىزىلوردا، قاراعاندى، قوستاناي وبلىسىنان قونىس اۋدارعان دارىگەرلەر جۇمىس جاساۋدا. ولاردىڭ ىشىندە ىس-تاجىريبەسى جەتكىلىكتى، بىلىكتى ماماندار دا بار.

ەلباسىنىڭ «ديپلوممەن اۋىلعا» باعدارلاماسىنا سايكەس اۋىل-ايماققا بەت العان جاس ماماندارعا قامقورلىق كورسەتىلەتىنى بەلگىلى. ولارعا كوتەرىڭكى جاردەماقىعا قوسا تۇرعىن ءۇي الۋ ءۇشىن جەڭىلدىكپەن نەسيە بەرىلەدى. وتكەن جىلى وسى باعدارلاماعا سايكەس 32 مامان باسپاناعا قول جەتكىزسە، بيىل تاعى 15ء-ى تۇرعىن ۇيمەن قامتىلماقشى.

ەگەر بۇدان بەس جىل بۇرىن وبلىستا 250 دارىگەر جەتىسپەسە، ءقازىر بۇل كورسەتكىش ون ەسەگە قىسقاردى. كۇنى بۇگىن 25 مامان، سونىڭ ىشىندە جالپى تاجىريبە دارىگەرى، اكۋشەر-گينەكولوگ، انەستەزيولوگ، پەدياتر-نەوناتولوگتار (قالاعا - 15، اۋىلدىق جەرگە - 10) كەرەك. اۋداندار اراسىنان، اسىرەسە، بورلىدە دارىگەرلەرگە مۇقتاجدىق كوبىرەك بىلىنۋدە.

ايتا كەتەيىك، وبلىستا بۇگىنگى تاڭدا 1532 دارىگەر (قامتىلۋى10 مىڭ ادامعا شاققاندا - 25،5)، 5596 ورتا بۋىن قىزمەتكەرى (10 مىڭ ادامعا شاققاندا - 88،8) ەڭبەك ەتەدى. دارىگەرلەردىڭ ورتا جاسى - 35-37. ءوڭىر ورتا بۋىن مەديسينا قىزمەتكەرلەرىمەن تولىق قامتاماسىز ەتىلگەن.

دەرەككوز: قازاقپارات