ادامنىڭ ءوزىن جاقسى سەزىنۋى ءۇشىن تاۋلىگىنە كەم دەگەندە جەتى جارىم ساعات ۇيىقتاۋى كەرەك. ۇيقىنىڭ ازدىعى كۇيزەلىس، سۋسامىر (قانت ديابەتى)، جۇرەك-قانتامىر اۋرۋلارى مەن جازاتايىم وقيعالاردىڭ تۋۋىنا سەبەپ بولادى. ليدس ۋنيۆەرسيتەتىنىڭ پسيحولوگتارى 18 بەن 80 جاس ارالىعىنداعى 1024 بريتاندىق ازاماتتىڭ اراسىندا سۇراۋ جۇرگىزىپ، جاڭا تۇجىرىم جاسادى، دەپ حابارلايدى «قامشى» پورتالى The Daily Mail-عا سىلتەمە جاساپ.

30 بەن 50 جاس ارالىعىنداعى رەسپوندەنتتەردىڭ 25 پايىزعا جۋىعى دۇرىس تىنىقپاعان. ولاردىڭ ءبىر جىلدا 15 كۇنگە جۋىق ۇيىقتاماعانى انىقتالدى. وسىدان كەيىن قاتىسۋشىلاردىڭ 42 پايىزى جۇمىسقا بايلانىستى كۇيزەلىسكە ۇشىراعانىن ايتىپ، شاعىمداندى. 30 پايىزى جۇمىستىڭ كەسىرىنەن ۇيقى قانبايتىنىن ايتتى.

سۇرالعانداردىڭ 5 پايىزى عانا نەبارى 5 ساعات ۇيىقتاۋدى الدىن الا جوسپارلاعان ەكەن. رەسپوندەنتتەردەن الداعى ءتۇن قالاي وتكەنى تۋرالى سۇراعاندا، ولاردىڭ 25 پايىزى 5 ساعاتتان كەم ۇيىقتاعاندارىن ايتتى.

ايتا كەتەيىك، كاليفورنيا ۋنيۆەرسيتەتىنىڭ زەرتتەۋشىلەرى تاياۋدا تاۋلىگىنە 8 ساعات ۇيىقتاۋ قاجەت دەگەن تۇجىرىمدى جوققا شىعارعان. ولاردىڭ ايتۋىنشا، ءىس جۇزىندە، نەبارى 6-7 ساعات ۇيىقتاۋ دا جەتكىلىكتى.