الماتى. قازاقپارات - الماتىدا قالا اكىمى باۋىرجان بايبەكتىڭ ءتوراعالىق ەتۋىمەن قۇقىق قورعاۋشى جانە قاداعالاۋشى ورگان باسشىلارىنىڭ وتىرىسى ءوتتى.
 جيىن بارىسىندا قۇقىقتىق ءتارتىپ جانە الەۋمەتتىك-ەكونوميكالىق سالانىڭ باسقا دا ماسەلەلەرى قارالدى. بۇل تۋالى الماتى قالاسى اكىمىنىڭ باسپا ءسوز قىزمەتىنەن حابارلادى. 

ءوز سوزىندە باۋىرجان بايبەك ۋاكىلەتتى ورگان باسشىلارىنا قۇقىق بۇزۋشىلىقتىڭ كەز كەلگەن تۇرىنە قاتىستى «نولدىك توزبەۋشىلىكتى» قالىپتاستىرۋعا باعىتتالعان الدىن الۋ شارالارىن بەلسەندى تۇردە قولدانۋدى تاپسىردى.

«پوليسيا قىزمەتكەرىنىڭ ءپوزيتيۆتى بەت-بەينەسىن قالىپتاستىرۋ جۇمىستارىن جۇرگىزۋ كەرەك. بۇل ءۇشىن ولاردىڭ ازاماتتار الدىنداعى جاۋاپكەرشىلىگىن ارتتىرىپ، قۇقىقتىق رەتتەۋ سالاسىندا ولاردىڭ قىزمەتىنىڭ اشىقتىعىن جانە قولجەتىمدىگىن قامتاماسىز ەتە وتىرىپ، ىس-تاجىريبەدە «ازاماتتارعا ارنالعان قىزمەت» قاعيداسىن قولدانۋ قاجەت»، - دەدى قالا اكىمى.     

  جيىن قورىتىندىسى بويىنشا تۇنگى كلۋبتار مەن باسقا دا ساۋىق قۇرۋ مەكەمەلەرىندە ەسىرتكى زاتتارىنىڭ زاڭسىز اينالىمىن انىقتاۋ جانە جولىن كەسۋ بويىنشا شارا قولدانۋ جونىندە شەشىم قابىلداندى.    

سونىمەن قاتار، جولداردا جول-كولىك اپاتتارىنىڭ كوبەيىپ جاتقاندىعى دا ءسوز بولدى.

«الماتىدا جول-كولىك وقيعالارىنىڭ ورتاشا سانى ورتاشا رەسپۋبليكالىق دەڭگەيدەن ەكى ەسە جوعارى. سوندىقتان، جول-پاترۋل پوليسياسى قىزمەتكەرلەرى جولداردا جوندەۋ جۇمىستارى جۇرگىزىلىپ جاتقان كەزدە جانە تاڭعى جانە كەشكى ۋاقىتتا پايدا بولاتىن قاربالاس ساتتەردە كولىك قوزعالىسىن رەتتەۋ ءادىسىن جەتىك مەڭگەرۋلەرى كەرەك»، - دەدى ب. بايبەك. 

ودان باسقا، شاعىن جانە ورتا بيزنەس سۋبەكتىلەرىن تەكسەرۋ ماسەلەلەرى قارالدى. الماتى اكىمى قالا بيۋدجەتىنىڭ كىرىسى نەگىزىنەن شاعىن جانە ورتا بيزنەس سۋبەكتىلەرىنەن تۇسەتىندىگىن، سوندىقتان بۇل سەكتورعا قولداۋ كورسەتۋ ماقساتىندا ولاردى نەگىزسىز تەكسەرۋلەردەن وقشاۋلاۋ كەرەكتىگىن ايتتى.     
وتىرىستا سونداي-اق، جەر قاتىناستارى سالاسىندا اشىقتىقتى قامتاماسىز ەتۋ ماسەلەسى كوتەرىلدى. وسىعان بايلانىستى ب. بايبەك ءتيىستى ورگان باسشىلارىنا تۇرعىندار اراسىندا جەر تەلىمدەرىن ساتىپ الۋ، قۇرىلىس جۇمىستارىنا رۇقسات الۋ جونىندە ءتۇسىندىرۋ جۇمىستارىن جۇرگىزىپ، وسى سالادا زاڭ بۇزۋشىلىققا قاتىستى جاۋاپكەرشىلىكتى ارتتىرۋدى تاپسىردى.

دەرەككوز: قازاقپارات