شامامەن تۇركىستاندا بولعان بۇل جاعدايدىڭ ۆيدەوسىن ەركىنبەك سەرىكباي ەسىمدى Facebook پايدالانۋشىسى ءوز پاراقشاسىنا جۇكتەگەن.

وندا جاس جىگىتتەردىڭ قارۋدى اسپانعا باعىتتاپ، وق جاۋدىرعانىن كورۋگە بولادى. اينالادا ادام تولىپ جۇرگەنى قارۋلانعان توي قوناقتارىن توقتاتا قويماعان.

ۆيدەونى كورگەندەردىڭ دەنى جاستاردىڭ بۇل ارەكەتتەرى اقىلعا قونىمسىز ەكەنىن جازۋدا.

“سايرامدا وسىنداي جاعدايدان (توي قارساڭىندا) جۋىردا عانا وت شىعىپ، بىرنەشە ادام قايتىس بولىپ ەدى، مىنالار سونى بىلە مە ەكەن؟”، – دەپ تاڭدانىسىن جازعان ۆيدەونى كورگەندەردىڭ ءبىرى.

ەسكە سالساق جاقىندا وڭتۇستىك قازاقستان وبلىسى مانكەنت قالاسىندا توي قوناعىنىڭ سالتاناتتى كەش ۇستىندە جاۋدىرعان وعىنان  2 ادام قايتىس بولعان ەدى.

وق جاس جۇبايلار مىنگەن كولىكتەن اتىلعان. كۇيەۋ جىگىتتىڭ دوسى سۋىق قارۋمەن اسپانعا وق اتىپ، جۇرتتىڭ نازارىن وزدەرىنە اۋدارماق بولعان.

كورتەدج توقتاعان كەزدە 19 جاستاعى جىگىت ابايسىزدا مىلتىقتىڭ شۇرىپپەسىن باسىپ جىبەرگەن. قاڭعىعان وق كولىك جۇرگىزۋشىسى مەن ولاردى كۇتىپ الۋشى 23 جانە 26 جاستاعى ايەل مەن ەكى بۇلدىرشىنگە تيگەن.

سالدارىنان اۋىر وق جاراقاتىن العان كەلىنشەكتىڭ ءبىرى سول جەردە جان ءتاسىلىم ەتكەن. كوپ قان جوعالتقان ەكىنشى كەلىنشەك وپەراسيا ۇستىندە قايتىس بولدى.