الماتى. قازاقپارات - بۇگىن الماتىدا الەۋمەتتىك قورعاۋ جۇيەسى قىزمەتكەرلەرىنىڭ كۇنى اتاپ ءوتىلدى. اباي اتىنداعى قازاق مەملەكەتتىك اكادەميالىق وپەرا جانە بالەت تەاترىندا وتكەن سالتاناتتى شاراعا قالا اكىمى باۋىرجان بايبەك قاتىستى.
ءوزىنىڭ العى سوزىندە ول بۇگىندە الماتىدا بۇل سالادا 2،5 مىڭداي الەۋمەتتىك جۇمىسكەر ەڭبەك ەتەتىندىگىن اتاپ ءوتتى.

«بۇل مەرەكە - ءومىرىن مۇقتاج جاندارعا كومەك كورسەتەتىن جاندارعا ارنالعان. سىزدەردىڭ جۇمىستارىڭىز كۇردەلى. بۇعان اسا شىدامدىلىق، ءبىلىم، تاجىريبە جانە ەرەكشە داعدى قاجەت. بۇل ماماندىق كوپشىلىگىڭىز ءۇشىن ومىرلىك كاسىپكە اينالدى. ەلباسى ءوزىنىڭ "قازاقستاندى الەۋمەتتىك جاڭعىرتۋ: جالپىعا ورتاق ەڭبەك قوعامىنا قاراي 20 قادام» اتتى ماقالاسىندا  تاۋەلسىزدىك جىلدارى قازاقستاندا الەۋمەتتىك مەملەكەتتىڭ مىقتى ىرگەتاسى قالانعاندىعىن، الەۋمەتتىك دامۋدا رەسپۋبليكامىزدىڭ جاڭا ساپالى دەڭگەيگە كوتەرىلگەندىگىن اتاپ ءوتتى. ەلىمىزدە الەۋمەتتىك قورعاۋ مودەلى جاسالدى. ول بازالىق مەملەكەتتىك الەۋمەتتىك قامسىزداندىرۋ، مىندەتتى الەۋمەتتىك ساقتاندىرۋ، جيناقتاۋشى زەينەتاقى جۇيەسى جانە الەۋمەتتىك كومەك كورسەتۋ باعىتتارىن قامتيدى»، - دەدى ب. بايبەك.  

سونىمەن قاتار، قالا باسشىسى بۇگىندە الماتىدا ءبىر جۇمىسپەن  قامتۋ ورتالىعى جانە 9 مەديسينالىق-الەۋمەتتىك مەكەمەلەر قىزمەت كورسەتەتىندىگىن ايتتى. سونداي-اق، الەۋمەتتىك قىزمەتتىڭ 40-قا جۋىق ءتۇرى كورسەتىلەدى. بۇل سالاعا قالا بيۋدجەتىنەن جىل سايىن 7 ملرد. استام تەڭگە بولىنەدى.

ءوز كەزەگىندە ق ر دەنساۋلىق ساقتاۋ جانە الەۋمەتتىك دامۋ ۆيسە-مينيسترى سۆەتلانا جاقىپوۆا دا الەۋمەتتىك جۇمىسكەرلەردى وزدەرىنىڭ ءتول مەرەكەلەرىمەن قۇتتىقتاپ، ولارعا تابىستار تىلەدى.

وسىدان كەيىن ب. بايبەك پەن س. جاقىپوۆا  ءبىرقاتار الەۋمەتتىك جۇمىسكەرلەردى ۆەدومستۆولىق ماراپاتتارمەن - «الەۋمەتتىك-ەڭبەك سالاسىنىڭ وزاتى» توسبەلگىسىمەن، ق ر ءدسادم ماقتاۋ قاعازدارىمەن جانە العىس حاتتارىمەن ماراپاتتادى.

ايتا كەتەلىك، ەلىمىزدە الەۋمەتتىك قورعاۋ جۇيەسى قىزمەتكەرلەرىنىڭ كۇنى جىل سايىن قازان ايىنىڭ سوڭعى جەكسەنبىسىندە تويلانادى.

الماتىدا الەۋمەتتىك قورعاۋ جۇمىستارى ءتورت مەكەمەمەن - الماتى قالاسى اكىمى اپپاراتىنىڭ قۇرىلىمدىق بولىمشەلەرى - جۇمىسپەن قامتۋ جانە الەۋمەتتىك باعدارلامالار باسقارماسى، مەملەكەتتىك ەڭبەك ينسپەكسياسى جانە كوشى-قون باسقارماسى، قازاقستان رەسپۋبليكاسىنىڭ دەنساۋلىق ساقتاۋ جانە الەۋمەتتىك دامۋ مينيسترلىگىنىڭ قۇرىلىمدىق بولىمشەلەرى - الماتى قالاسى بويىنشا باقىلاۋ جانە الەۋمەتتىك قورعاۋ دەپارتامەنتى جانە زەينەتاقى تولەۋ جونىندەگى مەملەكەتتىك ورتالىقتىڭ الماتى قالالىق فيليالىمەن جۇزەگە اسىرىلادى.

دەرەككوز: قازاقپارات