استانا. قازاقپارات - وڭتۇستىك قازاقستان وبلىسىندا بەس بالاباقشا اشىلىپ، پايدالانۋعا بەرىلدى، دەپ حابارلايدى وقو اكىمىنىڭ باسپا ءسوز قىزمەتىنەن. 
ونىڭ ءبىرى - شىمكەنت قالاسىنداعى №57 «حاديشا» بالاباقشاسى. «بالاپان» باعدارلاماسى اياسىندا اشىلعان 16 توپقا نەگىزدەلگەن مەكتەپكە دەيىنگى مەكەمە 320 ورىندىق. بالاباقشا قازىرگى زامان تالابىنا ساي بارلىق بولمەلەرمەن جابدىقتالعان. مۇندا ويىن بولمەسى، اسحانا، مۋزىكا زالى، سالاۋاتتى ءومىر سالتىن قالىپتاستىرۋعا ارنالعان سپورت زالى، ءار توپقا ارنالعان ويىن الاڭشالارى قاراستىرىلعان. بالالاردىڭ دەنساۋلىعىن قاداعالايتىن مەدبيكە بولمەسى، پسيحولوگ، لوگوپەد جانە ۇستازدار بولمەلەرى بار. اتالعان مەكەمە بالالارعا ءۇش تىلدە ءبىلىم بەرەتىن بولادى. 

سونىمەن قاتار كونە شاھار تۇركىستان دا «ەر توستىك» پەن «اسىل بوبەك» اتتى جاڭا ەكى بالاباقشامەن تولىقتى. 280 بالاعا لايىقتالعان بۇل مەكەمە رەسپۋبليكا بيۋدجەتىنەن سالىنىپ وتىر. قوس نىسان قالا كولەمىنىڭ ۇلعايۋىنا بايلانىستى جاڭادان قونىستانعان تۇرعىنداردى قاجەتتى الەۋمەتتىك نىساندارمەن قامتۋ ماقساتىندا سالىنعان. 2009 جىلى بۇلدىرشىندەردى بالاباقشامەن قامتۋ كورسەتكىشى نەبارى 13 پايىزدان اسپايتىن تۇركىستاندا سوڭعى جىلدارى بالاباقشالاردىڭ سانى ارتىپ، بۇگىندە بالعىنداردى مەكتەپكە دەيىنگى مەكەمەمەن قامتۋ 76،5 پايىزدى قۇراپ وتىر. 

ال بايدىبەك اۋدانىنداعى العاباس اۋىلدىق وكرۋگىنە قاراستى شاقپاق جانە قازاتا ەلدى مەكەندەرىندە ەكى بالاباقشا بالدىرعاندارعا ەسىگىن ايقارا اشتى. شاقپاق اۋىلىندا ورنالاسقان «ايگولەك» بالاباقشاسىنىڭ جانىنان 50 بالاعا ارنالعان 2 توپتىڭ قوسىمشا جۇمىس جاساۋىنا مۇمكىندىك بەرەتىن قوسىمشا عيمارات پايدالانۋعا بەرىلدى. «ايگولەك» بوبەكجاي بالاباقشاسىندا مەكتەپ جاسىنا دەيىنگى بالعىندارعا بار جاعداي جاسالعان. اۋلاسىندا ويىن الاڭىنا قاجەتتى جابدىقتار ورناتىلعان. وسى اۋىلداعى ەكىنشى قۋانىش - ول بالاباقشاعا جاپسارلاس ورنالاسقان سيرك ۇيىرمەسى.

جالپى، شاقپاق اۋىلىندا سيرك ۇيىرمەسى 1986 جىلى اشىلىپ، ءتۇرلى فەستيۆالدارعا قاتىسىپ، 1990 جىلداردىڭ باسىندا جۇلدەلى ورىنداردان كورىنىپ ءجۇردى. وسى عيماراتتىڭ كۇردەلى جوندەۋ جۇمىسى «جۇمىسپەن قامتۋ-2020» باعدارلاماسىنىڭ اياسىندا اتقارىلدى. قازاتا اۋىلىنداعى تۇرعىنداردىڭ سۇراۋى بويىنشا ورتا مەكتەپ بالاباقشاعا ىڭعايلاستىرىلىپ قايتا پايدالانۋعا بەرىلىپ وتىر. قۇرىلىسى جەرگىلىكتى بيۋدجەتتەن جۇرگىزىلگەن «جانسايا» بوبەكجايى 50 ورىندىق. مۇندا مەكتەپ جاسىنا دەيىنگى بالعىندارعا مۇمكىندىگىنشە بار جاعداي جاسالعان. اۋداندا مەكتەپ جاسىنا دەيىنگى بالالاردى بالاباقشامەن قامتۋ كەلەر جىلى 82 پايىزعا جەتكىزىلمەك.

دەرەككوز: قازاقپارات