الماتى. قازاقپارات - بۇگىن الماتىدا ق ر ءىىم توتەنشە جاعدايلار كوميتەتىنىنىڭ اۋماقتىق بولىمشەسى الماتى قالالىق تجد قىزمەتكەرلەرى وزدەرىنىڭ كاسىبي مەرەكەسى - قۇتقارۋشىلار كۇنىن اتاپ ءوتتى. ونىڭ ۇستىنە، بيىل ق ر ءىىم توتەنشە جاعدايلار كوميتەتىنىڭ قۇرىلعانىنا 20 جىل تولىپ وتىر. 
«الاتاۋ» مادەنيەت سارايىندا وتكەن مەرەكەلىك شاراعا الماتى قالالىق تجد بارلىق قۇرىلىمدىق بولىمشەلەرى، الماتى قالاسىنىڭ قۇتقارۋ قىزمەتى، «اپاتتار مەديسيناسى ورتالىعى» مەن «قازسەلدەنقۇتقارۋ» مەملەكەتتىك مەكەمەلەرىنىڭ باسشىلارى جانە وسى سالادا كوپ جىل ەڭبەك ەتكەن ارداگەرلەر قاتىستى. ساحناعا الدىمەن الماتى تجد قالالىق گارنيزونىنىڭ جاۋىنگەرلىك تۋى ەنگىزىلدى. 

ءوز سوزىندە الماتى قالاسى تجد باستىعىنىڭ مىندەتىن اتقارۋشى، پولكوۆنيك نۇرلان مادياروۆ ق ر ىشكى ىستەر ءمينيسترى قالمۇحانبەت قاسىموۆتىڭ قۇتتىقتاۋ ءسوزىن وقىدى. 

«مىنە، 20 جىلدان بەرى ەلىمىزدىڭ قۇتقارۋشىلارى مەن ءورت سوندىرۋشىلەرى حالىقتىڭ قاۋىپسىزدىگىن ساقتاۋعا كۇش سالىپ كەلەدى. ولار كەز-كەلگەن ساتتە كومەك كەلۋگە دايىن. وسى جىلدار ىشىندە قازاقستاندا توتەنشە جاعدايلاردىڭ الدىن الۋ جانە جويۋ بويىنشا ءتيىمدى جۇيە قۇرىلدى. تاجىريبە جيناقتالدى جانە تەحنيكالىق جاعىنان ويداعىداي جابدىقتالدى. بۇگىندە ازاماتتىق قورعانىس سالاسىندا ەلىمىز بويىنشا 30 مىڭنان استام ادام ەڭبەك ەتۋدە. قۇتقارۋشى - بۇل ءومىر ءسۇرۋ سالتى. بۇل قاشاندا ەرلىك جاساۋعا، ءوزىن قۇربان ەتۋگە دايىن بولۋ. قۇتقارۋشى ماماندىعىن تەك باتىل ادامدار عانا تاڭدايدى»، - دەلىنگەن قۇتتىقتاۋدا. 

بۇدان كەيىن پولكوۆنيك نۇرلان ءابىلباي ۇلى ۇزدىك قۇتقارۋشىلاردى جانە ارداگەرلەردى «توتەنشە جاعدايلار كوميتەتىنە 20 جىل» مەدالىمەن ماراپاتتادى. بۇدان ءارى بۇگىنگى جيىن مەرەكەلىك كونسەرتكە ۇلاستى. 

«قازاقپارات» تىلشىسىنە بەرگەن سۇحباتىندا الماتى قالالىق تجد ءورت ءسوندىرۋ جانە اپاتتىق قۇتقارۋ جۇمىستارى قىزمەتى باستىعىنىڭ ورىنباسارى، ورتكە قارسى قىزمەت كاپيتانى باعدات شايزادا الماتىدا قازىرگى تاڭدا 2 مىڭعا جۋىق قۇتقارۋشىر جۇمىس ىستەيتىندىگىن ايتتى. 

«الماتى قالاسىندا كۇن سايىن 300-دەن استام قۇتقارۋشى تاۋلىكتىك جۇمىسقا تۇسەدى. كۇن سايىن ورتكە، جول-كولىك وقيعاسىنا، تابيعي، تەحنوگەندىك جانە باسقا دا توتەنشە جاعدايلارعا بايلانىستى 100-گە تارتا شاقىرتۋلار بولىپ تۇرادى. سولاردىڭ ىشىندە ەڭ كوبى - ورتكە قاتىستى كۇنىنە 30-عا جۋىق شاقىرتۋ تۇسەدى. قالا حالقىنىڭ سانى، قالانىڭ اۋماعى جىلدان-جىلعا ءوسىپ جاتىر. ءزاۋلىم تۇرعىن ۇيلەر سالىنۋدا. ال ادامدار ءورت قاۋىپسىزدىگىن ساقتاي بەرمەيدى. سايكەسىنشە، ورتكە قاتىستى شاقىرتۋلار ءجيى بولادى. سوندىقتان دا ءورت سوندىرۋشىلەردىڭ سانى باسقا قۇرىلىمدارعا قاراعاندا كوپ. بۇل سالادا ءقازىر 1245 ادام ەڭبەك ەتەدى. جالپى، قۇتقارۋشىنىڭ جۇمىسى قيىن دا ءقاۋىپتى، ابىرويلى دا ماقتان تۇتارلىق جۇمىس. مەنىڭ وسى سالادا قىزمەت ەتىپ كەلە جاتقانىما 10 جىل بولدى»، - دەدى ول.

ايتا كەتەلىك، بۇگىنگى مەرەكەلىك شارا اياسىندا «الاتاۋ» مادەنيەت سارايىنىڭ الدىنا ءتۇرلى قۇتقارۋ وپەراسيالارىن جۇرگىزۋگە پايدالانىلاتىن تەحنيكالار قويىلدى. ولاردىڭ ىشىندە ساتىسىنىڭ بيىكتىگى 90 مەتر بولاتىن كوپفۋنكسيونالدى ءورت ءسوندىرۋ ماشيناسى جانە جولسىزبەن جۇرە الاتىن اۆتوكولىكتەر بار.

دەرەككوز: قازاقپارات