الماتى. قازاقپارات - بۇگىن الماتىدا كورنەكتى اقىن، قازاقستاننىڭ حالىق جازۋشىسى، بەلگىلى قوعام قايراتكەرى ولجاس سۇلەيمەنوۆ ءال-فارابي اتىنداعى قازاق ۇلتتىق ۋنيۆەرسيتەتىنىڭ وقىتۋشىلارى جانە ستۋدەنتتەرىمەن كەزدەستى.
بۇل كەزدەسۋ سەمەي يادرولىق پوليگونىندا جاسالعان سوڭعى يادرولىق جارىلىستىڭ 26 جىلدىعىنا ورايلاستىرىلدى.

ءوز سوزىندە ولجاس سۇلەيمەنوۆ 1989 جىلى 19  قازاندا كەڭەس وداعى تەلەگراف اگەنتتىگىنىڭ سەمەي پوليگونىندا كەزەكتى جارىلىس جاسالعاندىعى  تۋرالى حابار تاراتقان سوڭ، «نيەۆادا-سەمەي» قوزعالىسى يادرولىق جارىلىسقا قارسى الماتى، سەمەي، پاۆلودار، قاراعاندى، ساران جانە ماسكەۋ قالالارىندا جينالىستار، ميتينگىلەر ۇيىمداستىرىلعاندىعىن ايتتى.   

«ءبىز قوزعالىستى قۇرعان كەزدە ستۋدەنتتەر بىزگە وتە جاقسى كومەكتەستى. ولار پوليگوندى جابۋ بويىنشا حالىقتان قول جينادى. ءسويتىپ، بىر-ەكى اپتانىڭ ىشىندە ەكى ميلليوننان استام قول جينادى. حالىقتىق جانە پارلامەنتتىك ديپلوماتيا، مىنە، وسىنداي ناتيجە بەردى. ءبىز قوزعالىستى 1989 جىلى 28 اقپاندا قۇردىق. ال سول جىلى 19  قازاندا سوڭعى جارىلىس بولدى. كەيىن، كوپ ۇزاماي 23  قازاندا پوليگوندى جابۋ تۋرالى ماسەلە كوتەردىك. ول سۇراق داۋىسا سالىندى. ءسويتىپ، جوعارعى كەڭەس ونى تولىعىمەن قولداپ داۋىس بەردى. سودان 1989 جىلى 20 قازاندا «كسرو ۇكىمەتى سەمەي يادرولىق سىناق پوليگونىن جابۋ ماسەلەسىن قاراسىن» دەگەن قاۋلى شىعارىلدى»، - دەدى و. سۇلەيمەنوۆ. 

ول سونىمەن قاتار قازىرگى تاڭدا جىل سايىن ەل بولىپ اتاپ ءوتىلۋى كەرەك ەكى اتاۋلى كۇن بار ەكەندىگىن جەتكىزدى. ولار 1989 جىلدىڭ 28  اقپانى - «نيەۆادا-سەمەي» قوزعالىسى جانە 1991 جىلدىڭ 29  تامىزى - سەمەي پوليگونىنىڭ تولىق جابىلۋ كۇنى.

بۇۇ باس اسسامبلەياسى 29  تامىزدى - حالىقارالىق يادرولىق سىناققا قارسى نارازىلىق كۇنى دەپ جاريالادى. ال ونى حالىقارالىق كۇنتىزبەگە ەنگىزۋ ماسەلەسىن ءبىرىنشى بولىپ قازاقستاندىقتار كوتەرگەن. ءقازىر ول جىل سايىن بۇكىل الەمدە اتاپ وتىلەدى.

ولجاس سۇلەيمەنوۆ ءسوز سوڭىندا «نيەۆادا-سەمەي» قوزعالىسىنىڭ بۇدان كەيىگى قىزمەتىنىڭ يادرولىق سىناقتاردا بۇكىل الەمدە بويىنشا توقتاتۋعا باعىتتالعاندىعىن اتاپ ءوتتى. 

ال بۇگىنگى كەدەسۋدى ءال-فارابي اتىنداعى قازۇۋ مەن «نيەۆادا-سەمەي» قوزعالىسى ۇيىمداستىردى.

دەرەككوز: قازاقپارات