«تۋريزم ەكونوميكانىڭ وسۋىنە جاڭاشا سەرپىن بەرەتىن سالا بولۋعا ءتيىس. ەلىمىزدىڭ ءار وڭىرىندە كورىكتى جەرلەر بار. سوندىقتان جەكە ينۆەستورلاردى دا تارتا وتىرىپ، قاجەتتى ينفراقۇرىلىم سالۋ جۇمىسىن دەرەۋ باستاۋ قاجەت».

قاسىم-جومارت توقايەۆ

قازاقستان رەسپۋبليكاسىنىڭ پرەزيدەنتى

ەلدەگى تۋريزم سالاسىندا ىسكە اسىرىلىپ جاتقان جۇيەلى ءىس-شارالاردىڭ ناتيجەسىندە قازاقستانعا كەلەتىن تۋريستەر سانى دا، الەمدىك رەيتينگتەگى ورنىمىز دا ايتارلىقتاي جاقسارىپ كەلەدى. ماسەلەن، دۇنيەجۇزىلىك ەكونوميكالىق فورۋمنىڭ (World Economic Forum) ساياحات پەن ءتۋريزمدى دامىتۋ يندەكسىنە سايكەس قازاقستان تۋريستىك باعىتتار تىزىمىندە 119 ەل ىشىندە 52-ورىندى يەلەندى. بۇعان دەيىنگى يندەكستە قازاقستان  66-ورىنعا ورنالاسقان ەدى.

ال بىلتىر قازاقستانعا جۇمىس بابىمەن نەمەسە تۇراقتى تۇرۋعا كەلگەندەردى ەسەپتەمەگەندە، تۋريستىك ماقساتپەن 15،3 ملن شەتەلدىك قوناق كەلگەن. ونىڭ ىشىندە 10،4 ملن ادام ەلدە ءبىر كۇننەن كوپ ۋاقىتقا قالىپ، شەتەلدىك تۋريستەر ساناتىنا ەندى. رەسمي ستاتيستيكاعا سايكەس، شەتەلدىك مەيمانداردىڭ ەلىمىزدە ورتاشا بولۋ مەرزىمى – 4 كۇن.

 ۇلتتىق بانك مالىمەتىنشە، الىس شەتەلدەن كەلگەن تۋريستەر قازاقستانعا ساپارى كەزىندە ورتا ەسەپپەن 1500 اقش دوللارىن جۇمسايدى. 2024 جىلى شەتەلدىك تۋريستەر ەلىمىزدىڭ اۋماعىندا 1،2 ترلن تەڭگەدەن استام قاراجات جۇمسادى.

 تۋريزم سالاسىندا نەگىزگى كاپيتالعا سالىنعان ينۆەستيسيا كولەمى تۇراقتى تۇردە ءوسىپ كەلە جاتقانىن بايقاۋعا بولادى. 2019-2024 جىلدار ارالىعىندا سالاعا سالىنعان ينۆەستيسيا كولەمى تومەندەگىدەي:

• 2019 ج. – 502 ملرد تگ
• 2020 ج. – 629 ملرد تگ
• 2021 ج. – 593 ملرد تگ
• 2022 ج. – 513 ملرد تگ
• 2023 ج. – 787 ملرد تگ
• 2024 ج. – 947،5 ملرد تگ

2019-2024 جىلدار ارالىعىندا تۋريزم سالاسىندا جالپى سوماسى 550 ملرد تەڭگەگە 605-تەن استام ينۆەستيسيالىق جوبا ىسكە اسىرىلدى، ونىڭ ىشىندە 2024 جىلى 87 ينۆەستيسيالىق جوبا ءساتتى اياقتالدى.

ءىرى ينۆەستيسيالىق جوبالار ىشىنەن شىمكەنت قالاسىنداعى «ماحامبەت» قوناق ءۇيىن (جوبا قۇنى – 4،9 ملرد تەڭگە)، اتىراۋ وبلىسىنداعى «Keremet Park»وتباسىلىق پاركىن (3 ملرد تەڭگە)، سونداي-اق الماتى وبلىسىنداعى «اق-جايىق» دەمالىس ايماعىن (1،8 ملرد تەڭگە) اتاپ وتۋگە بولادى.

سونىمەن قاتار بىلتىر مەملەكەت باسشىسى قاسىم-جومارت توقايەۆتىڭ تاپسىرماسى بويىنشا Neo Nomad دەپ اتالاتىن جاڭا ۆيزا ءتۇرى ەنگىزىلدى. بۇل ۆيزا زاماناۋي كوشپەندىلەرگە – ساياحاتتاپ، قاشىقتان جۇمىس ىستەيتىن شەتەلدىك تۋريستەرگە ارنالعان. جاڭا ۆيزالىق رەجيمدى ەنگىزەر كەزدە پاندەميادان كەيىن وسىنداي باعدارلامالاردى ءساتتى قولدانعان 50-دەن استام ەلدىڭ حالىقارالىق تاجىريبەسى نازارعا الىنعان.

Neo Nomad ۆيزاسىن العان شەتەلدىك تۋريستەردىڭ قازاقستاندا ءبىر جىلعا دەيىن تۇرۋعا مۇمكىندىگى بار. وسى ۋاقىت ىشىندە ولار شەتەلدىك كومپانيالاردا جۇمىس ىستەي الادى. بۇل تۋريستەرگە ەلىمىزدىڭ مادەنيەتى مەن تۇرمىسىن جاقىنىراق تانۋعا مۇمكىندىك بەرىپ قانا قويماي، ەل ەكونوميكاسىنا پايدا اكەلەدى دەپ كۇتىلۋدە. ۆيزا ەنگىزىلگەن جاعدايدا جىلىنا 500 ادام ونى السا، ەكونوميكالىق اسەر شامامەن 3،6 ملرد تەڭگە بولماق. ۆيزانى پايدالاناتىن شەتەلدىك ازاماتتار قازاقستاندا تۇرىپ، قاراجاتىن وسىندا جۇمسايدى. ءبىراق وتاندىق ەڭبەك نارىعىنا اسەر ەتپەيدى. بۇل – باعدارلامانىڭ ماڭىزدى بولىگى.

جالپى قازاقستاننىڭ تۋريستىك الەۋەتى حالىقارالىق ارەنادا تابىستى ناسيحاتتالىپ كەلەدى. The New York Times نۇسقاسى بويىنشا الماتى قالاسى ۇزدىك 52 تۋريستىك باعىتتىڭ قاتارىنا ەنسە، Lonely Planet جۋرنالىنىڭ نۇسقاسى بويىنشا قازاقستان 2025 جىلى ساياحاتتاۋعا ءتيىس ۇزدىك ەلدەردىڭ تىزىمىنە كىردى. بۇدان بولەك، Conde Nast Traveller Italia باسىلىمى «شىمبۇلاق» تاۋ-شاڭعى كۋرورتىن تاڭداۋلى توپ-5 دەستيناسيا تىزىمىنە قوستى.

سونىمەن قاتار CNN Travel 2025 جىلى ساياحاتتاۋعا تۇرارلىق 25 باعىتتىڭ ءتىزىمىن جاريالاپ، قازاقستاندى ەرەكشە مارتەبەگە لايىق دەپ تانىدى. اتاپ ايتقاندا، الماتى قالاسى ساياحاتتاۋعا ءتيىس ەڭ ۇزدىك باعىتتاردىڭ قاتارىنا ەندى. قالا كەڭ تابيعي لاندشافتتار مەن دامىپ كەلە جاتقان ۋربانيستىك مادەنيەتتى بىرىكتىرەتىن ەرەكشە اتموسفەراسىنىڭ ناتيجەسىندە ورتالىق ازيانىڭ «جاڭا ستيل استاناسى» دەپ اتالدى.

الداعى جىلدارى قازاقستان تۋريزم سالاسىن دامىتۋدى قارقىندى تۇردە جالعاستىرىپ، اۋقىمدى جوبالار مەن باستامالاردى جۇزەگە اسىرادى.

باسىم باعىت رەتىندە ءۇش ءىرى تۋريستىك ايماق بەلگىلەندى، ولار: ششۋچە-بۋراباي كۋرورتتىق ءوڭىرى، ماڭعىستاۋ كۋرورتتىق ءوڭىرى جانە الماتى تاۋ كلاستەرى.

2027 جىلعا دەيىن جالپى قۇنى 1،1 ترلن تەڭگەدەن اساتىن 181 ينۆەستيسيالىق جوبا ىسكە اسىرىلادى. تۋريزم سالاسىندا جۇمىسپەن قامتىلعاندار سانىن 800 مىڭ ادامعا دەيىن ارتتىرىپ، اگروتۋريزمدى دامىتۋ ەسەبىنەن اۋىلدىق جەرلەردە 10 مىڭ جاڭا جۇمىس ورنىن اشۋ جوسپارلانعان.

ىشكى تۋريستەر سانىن 11 ميلليون ادامعا جەتكىزىپ، ەلدەگى ورنالاستىرۋ ورىندارىنىڭ توسەك-ورىن قورىن 280 مىڭعا دەيىن ۇلعايتۋ، سونداي-اق بارلىق قوناق ءۇيدى eQonaq اقپاراتتىق جۇيەسىنە ەنگىزۋ كوزدەلگەن.

سونىمەن قاتار قازاقستان دۇنيەجۇزىلىك ەكونوميكالىق فورۋمنىڭ ساياحات جانە ءتۋريزمدى دامىتۋ جاھاندىق يندەكسىندە الەمنىڭ ۇزدىك 50 ەلى قاتارىنا كىرۋدى ماقسات ەتىپ وتىر.

بۇل باستامالار ەلدىڭ حالىقارالىق تۋريستىك ارەناداعى ورنىن نىعايتىپ، ساياحاتشىلار، بيزنەس جانە جەرگىلىكتى قاۋىمداستىقتار ءۇشىن جاڭا مۇمكىندىكتەر اشادى.