ورال. قازاقپارات - بۇگىن،16 قازاندا قادىر مىرزا ءالى اتىنداعى مادەنيەت جانە ونەر ورتالىعىندا رۋحاني كەلىسىم كۇنىنە وراي «رۋحاني كەلىسىم - ەل بىرلىگىنە باستار جول» تاقىرىبىندا دوڭگەلەك ۇستەل وتىرىسى وتكىزىلىپ، وعان مەملەكەتتىك مەكەمەلەر، ءدىني جانە ەتنومادەني بىرلەستىكتەر، ۇكىمەتتىك ەمەس ۇيىمدار وكىلدەرى قاتىستى.
بقو ءدىن ىستەرى باسقارماسى باسشىسىنىڭ مىندەتىن اتقارۋشى سايالبەك عيززاتوۆتىڭ اتاپ وتكەنىندەي، 1992 جىلى ەلباسىنىڭ قاتىسۋىمەن الماتىدا وتكەن بۇكىلالەمدىك رۋحاني كەلىسىم كونگرەسىنەن باستاۋ العان اتالمىش مەرەكە قازاقستانداعى 130-دان استام ۇلت وكىلدەرىنىڭ، سونداي-اق ءتۇرلى ءدىني كونفەسسيالاردىڭ جاراسىمىن ارتتىرىپ، ەل بىرلىگىن نىعايتۋعا سەپتەسىپ كەلەدى. وڭىردە كۇنى بۇگىن 74 ءدىني بىرلەستىك، 9 كونفەسسيا قىزمەت ەتۋدە.  باستى مىندەت - ۇلتىنا، نەندەي ءدىني نانىم-سەنىمدى ۇستاناتىندىعىنا قاراماستان، ولاردىڭ ءبارىن دە تاتۋلىق تۋى استىندا، ورتاق ماقسات جولىندا ءومىر سۇرۋگە ۇندەپ، ىرىس-ىنتىماعىن بايىتا ءبىلۋ. ەلباسى نۇرسۇلتان ءابىش ۇلى نازاربايەۆ جاھاندىق قاتەرلەردەن ساقتانۋ قاجەتتىگىن ۇنەمى ايتىپ كەلەدى. قازىرگى ۋاقىتتا ۇلت جانە ءدىنارالىق قاقتىعىستار از بولىپ جاتقان جوق. اسىرەسە، سيرياداعى سوعىس كۇللى الەمدى الاڭداتۋدا. كەيبىر قازاق جاستارىنىڭ جات اعىمدارعا ىلەسىپ، شەت ەلدەگى شايقاستارعا قاتىسۋى بارشا وتانداسىمىزدى ويلاندىرۋى كەرەك. ءدىني ەكسترەميزم مەن لاڭكەستىككە توسقاۋىل قويۋدا بارلىق ۇلت وكىلدەرى اراسىنداعى رۋحاني كەلىسىمدى ساقتاۋدىڭ ماڭىزى زور. ەڭ باستىسى، قوعامدا ىزگىلىك، يماندىلىق، ادامگەرشىلىك، مەيىرىمدىلىك، ءوزارا تۇسىنىستىك  سياقتى ۇعىم-قاسيەتتەر سالتانات قۇرۋى ءتيىس. سوندا عانا ەلباسىمىز «نۇرلى جول - بولاشاققا باستار جول» اتتى جولداۋىندا اتاپ كورسەتكەنىندەي، «ماڭگىلىك ەل» يدەياسىن ۇستانعان قازاق ەلى تاۋەلسىزدىگىن ەشقاشان دا جوعالتپايدى.

جيىندا سونداي-اق ورال قالالىق مەشىتىنىڭ يمامى الەمحان تۇرلىبەكوۆ، ورالداعى ريم-كاتوليك شىركەۋىنىڭ باسشىسى پەتەر ساكمار، «لامەد» ەۆرەي ەتنومادەني بىرلەستىگى جەتەكشىسىنىڭ ورىنباسارى فەليكس بايۋكانسكيي جانە  باسقالارى رۋحاني كەلىسىمدى نىعايتۋداعى ءوز وي-تولعامدارىمەن ءبولىستى.

شارا سوڭىندا وبلىس تۇرعىندارىنا ارنالعان ۇندەۋ قابىلدانىپ، ءدىني بىرلەستىكتەر وكىلدەرى د.قونايەۆ اتىنداعى ساياباقتا اعاش وتىرعىزدى.

وڭىردە رۋحاني كەلىسىم كۇنىنە ارنالعان باسقا دا شارالار وتۋدە.

دەرەككوز: قازاقپارات