استانا. قازاقپارات  - ق ر ينۆەستيسيالار جانە دامۋ ءمينيسترى اسەت يسەكەشيەۆ پەن اقتوبە وبلىسىنىڭ اكىمى بەردىبەك ساپاربايەۆ اقتوبەدە وتكەن جۇمىس وتىرىسى بارىسىندا وسى ايماقتا يندۋستريالاندىرۋ باعدارلاماسىنىڭ ەكىنشى بەس جىلدىعى مەن «نۇرلى جول» باعدارلاماسىنىڭ جۇزەگە اسىرىلۋ بارىسىن تالقىلادى.
بۇل تۋرالى ينۆەستيسيالار جانە دامۋ مينيسترلىگىنىڭ باسپا ءسوز قىزمەتى حابارلادى.

اقتوبە وبلىسىنا جاساعان جۇمىس ساپارى كەزىندە مينيستر ءبىرقاتار كاسىپورىنداردى ارالاپ، «اقتوبە رەلس -ارقالىق زاۋىتى» جشس-نىڭ ءبىرىنشى رەلستەرىن شىعارۋ سالتاناتىنا قاتىسقان. ينۆەستيسيا ءمينيسترى سونداي-اق «قازحروم» كومپانياسىنىڭ فەرروقورىتپا زاۋىتىنىڭ جۇمىسىمەن دە تانىستى.

«فەرروقورىتپا زاۋىتىندا  ارنايى باعدارلامامەن ءبىلىم العان ماماندار جۇمىس ىستەيدى. 2015 جىلدىڭ قاڭتار-تامىز ايلارىندا زاۋىتتىڭ №4 سەحى 56 مىڭ توننا فەرروحروم العان. جالپى، 2015 جىلدىڭ جوسپارىنا ساي،  زاۋىت 439 مىڭ توننا، سونىڭ ىشىندە، №4 سەح 74 مىڭ توننا ءونىم ءوندىرۋى كەرەك»،-دەلىنگەن باسپا ءسوز قىزمەتتىڭ تاراتقان اقپاراتتا.

جالپى، 2015 جىلدىڭ شىلدەسىندەگى جاعدايعا سۇيەنسەك، يندۋستريالاندىرۋ كارتاسىنا اقتوبە وبلىسىنان 83 ينۆەستيسيالىق جوبا قوسىلعان. ونىڭ ىشىندە، 74 جوبا 2010-2014 جىلدار ارالىعىندا پايدالانۋعا بەرىلگەن. وسى كاسىپورىندار ىسكە قوسىلعان سوڭ 6،6 مىڭ تۇراقتى جۇمىس ورنى اشىلعان. قالعان 9 جوبا يندۋستريالاندىرۋ باعدارلاماسىنىڭ ەكىنشى بەس جىلدىعى اياسىندا جۇزەگە اسىرىلماق. جۇمىس وتىرىسى كەزىندە مينيستر اسەت يسەكەشيەۆ پەن اكىم بەردىبەك ساپاربايەۆ ايماق بويىنشا «نۇرلى جول» باعدارلاماسىنىڭ جۇزەگە اسىرىلۋ بارىسىن، «باتىس ەۋروپا-باتىس جۇڭگو»  كولىك ءدالىزىنىڭ ءوڭىر ارقىلى وتەتىن اۋماعىن 2016 جىلى سالىپ ءبىتۋ ماسەلەسىن، سونداي-اق، ورتالىق-باتىس-اقتوبە-اتىرۋ-استراحان باعىتىنداعى تاس جولدىڭ قۇرىلىسىن باستاۋ ماسەلەلەرىن تالقىلادى. ءا.يسەكەشيەۆ اتاپ وتكەندەي، ءبىرقاتار ەكونوميكالىق قيىندىقتارعا قاراماستان،  ەل بويىنشا يندۋستريالاندىرۋ باعدارلاماسى مەن «نۇرلى جول» باعدارلاماسىنىڭ ورىندالۋ قارقىنى باسەڭدەگەن جوق»،-دەپ تولىقتىرعان مينيسترلىكتىڭ باسپا ءسوز قىزمەتى.

دەرەككوز: قازاقپارات