استانا. قازاقپارات - بۇگىن قايرات ءماميدىڭ ءتوراعالىق ەتۋىمەن جوعارعى سوتتىڭ جالپى وتىرىسىندا الماتى قالاسى سوتتارىن كەشەندى تەكسەرۋدىڭ جانە پراكتيكالىق كومەك كورسەتۋدىڭ ناتيجەلەرى تالقىلاندى
جوعارعى سوتتىڭ ازاماتتىق جانە اكىمشىلىك ىستەر جونىندەگى قاداعالاۋشى سوت القاسىنىڭ ءتوراعاسى ە.ن. ءابدىقادىروۆ الماتى قالاسى سوتتارىنىڭ سوت تورەلىگىن جۇزەگە اسىرۋدىڭ، قىزمەتتەرىن ۇيىمدىق جانە ماتەريالدىق-تەحنيكالىق قامتاماسىز ەتۋدىڭ جاعدايىن كەشەندى تەكسەرۋدىڭ قورىتىندىلارى تۋرالى ايتتى. 

ءوز سوزىندە ول الماتى قالاسىنىڭ سوتتارى رەسپۋبليكا بويىنشا ازاماتتىق، اكىمشىلىك جانە قىلمىستىق ىستەردىڭ ەڭ كوپ سانىن قارايتىندىعىنا توقتالدى. 2014 جىلى قالا سوتتارى شامامەن بارلىعى 117 مىڭ ءىستى، 2015 جىلدىڭ وتكەن كەزەڭىندە 90 مىڭنان استام ءىستى قارادى. الماتى قالاسىنىڭ اۋداندىق جانە وعان تەڭەستىرىلگەن سوتتارى سۋديالارىنىڭ شتات سانى 218 بىرلىكتى قۇرايدى. رەسپۋبليكا بويىنشا ءبىر سۋدياعا ورتاشا جۇكتەمە 55،9 ءىس بولسا، مۇندا 71،2 ءىستى قۇراعان. 

الماتى قالاسىنىڭ اۋماعىنا الماتى وبلىسىنىڭ اۋىلدىق وكرۋگتارى مەن ەلدى مەكەندەرىنىڭ قوسىلۋى تۋىندايتىن داۋلار سانىنىڭ جانە تيىسىنشە  سوتتار قارايتىن ىستەردىڭ وسۋىنە اكەپ سوقتى. ماسەلەن، 2013 جىلمەن سالىستىرعاندا، 2014 جىلى اياقتالعان ازاماتتىق ىستەردىڭ سانى ءۇش ەسەگە (34%) ارتقان، ياعني، بىلتىر 51 ءىس قارالسا، بيىل 78 مىڭ ءىس قارالدى. اعىمداعى جىلى ءوسۋ 20%-دى قۇرادى (2014 ج. - 32 مىڭ ءىس، 2015 ج. - 40 مىڭ ءىس). مىندەتتەمەلىك قۇقىقتان، بانكتىك، كوممۋنالدىق قىزمەتتەر كورسەتۋ بويىنشا شارتتاردان، سونداي-اق، سالىق ورگاندارىنىڭ زاڭدى تۇلعالاردى جانە جەكە كاسىپكەرلەردى ماجبۇرلەپ تاراتۋ تۋرالى تالاپ قويۋلاردان تۋىندايتىن داۋلار بويىنشا تالاپ قويۋلار سانى ارتا تۇسكەن.

  ودان باسقا، اكىمشىلىك جانە قىلمىستىق ىستەر سانىنىڭ تيىسىنشە 11%-عا جانە 7%-عا  ءوسۋى اتاپ ءوتىلدى.

سوتتاردىڭ جۇمىسىن ۇيىمداستىرۋ بولىگىندە پروبلەمالىق ماسەلە - كادر تۇراقسىزدىعى، ونىڭ ىشىندە جاڭادان تاعايىندالعان ماماندار ءبىراز ۋاقىت ەڭبەك ەتكەنمەن، ۇزاق مەرزىمگە تۇراقتامايتىنى تاعى بار.

سونداي-اق، الماتى قالالىق سوتىنىڭ ءتوراعاسى ا.ج. ەشتايدىڭ اقپاراتى تىڭدالدى.

تالقىلاۋ ناتيجەسىندە ءتورالقا ءتيىستى قاۋلى قابىلدادى. اتالعان وبلىستىق سوتتاردىڭ جۇمىسى قاناعاتتانارلىق دەپ تانىلدى. سونىمەن قاتار، ولاردىڭ ءتوراعالارىنا ءىس-شارالاردىڭ جوسپارىن ازىرلەي وتىرىپ، سوتتار جۇمىسىندا ورىن العان كەمشىلىكتەردى جويۋ جونىندە تاپسىرما بەرىلدى.

بۇعان قوسا، جوعارعى سوت ءتوراعاسى سوت تورەلىگىن جۇزەگە اسىرۋدىڭ، سوت پراكتيكاسىن قورىتۋدىڭ، تالدامالىق قىزمەتتى جۇرگىزۋدىڭ، ەڭبەك جانە اتقارۋ ءتارتىبىن ورىنداۋدىڭ ساپاسىن ارتتىرۋ قاجەتتىلىگىنە نازار اۋداردى.

دەرەككوز: قازاقپارات