استانا. قازاقپارات - 15 قازاندا «Rixos Khadisha Shymkent» قوناقۇيىندە وڭىرلىك كاسىپكەرلىك كەڭەسى مەن شىمكەنت قالاسى اكىمدىگىنىڭ بىرلەسكەن جيىنى ءوتتى. القالى كەڭەسكە بەلگىلى كاسىپكەرلەرمەن قاتار، وبلىس اكىمىنىڭ ورىنباسارى ساپاربەك تۇياقبايەۆ، شىمكەنت قالاسىنىڭ اكىمى عابيدوللا ءابدىراحىموۆ جانە وقو كاسىپكەرلەر پالاتاسىنىڭ ديرەكتورى اسقار ابۋباكىروۆ قاتىستى، دەپ حابارلايدى قالا اكىمىنىڭ باسپا ءسوز قىزمەتىنەن. 
جيىندى كىرىسپە ءسوز سويلەپ اشقان شىمكەنت قالاسىنىڭ اكىمى عابيدوللا ءابدىراحىموۆ كەزدەسۋدىڭ ماڭىزدىلىعىنا توقتالىپ، وبلىس كاسىپكەرلەرىنىڭ قالالىق قۇرىلىمدارىنا قاتىستى ماسەلەلەرگە توقتالدى.

ونىڭ ايتۋىنشا، قازىرگى تاڭدا قالانىڭ كوركەيۋىنە، وسىپ-وركەندەۋىنە ءوز ۇلەستەرىن قوسىپ جاتقان كوپتەگەن ءىرى بيزنەسمەندەر بار. ميلليوندى مەگاپوليس بولىپ قالىپتاستىرۋدا بولاشاقتا دا وتاندىق ينۆەستورلاردى بەلسەندى بولۋى ءتيىس.

- ءبىز قالاداعى رەتسىز ساۋدا مەن بازارلاردى جويىپ، زامان تالابىنا ساي ساۋدا ورىندارى مەن الىپ دۇكەندەردى سالۋىمىز كەرەك. جوسپارىمىز بويىنشا 2017 جىلدان باستاپ ءىرى بازارلاردىڭ ءبارى قالا سىرتىندا بولادى. تەك جەمىس-جيدەك پەن كوكونىس ساتاتىن ساۋدا ورىندارى قالادى. قالا ىشىندەگى بازارلار شاھاردىڭ جاڭا كەلبەتىن ايشىقتاپ، اجارىن اشىپ تۇراتىن سيپاتتا بەزەندىرىلەدى، - دەدى قالا اكىمى.

باسقوسۋدا ءسوز العان وڭىرىمىزگە تانىمال بيزنەس سالاسىنىڭ وكىلدەرى سەرىكجان سەيىتجانوۆ، قايرات بالابييەۆ جانە قايرات مولداسەيىتوۆ شىمكەنتتىڭ دامۋى جولىنداعى بارلىق وڭ باستامالارعا قولداۋ بىلدىرەتىندىكتەرىن جەتكىزدى.

- بۇگىنگى جيىندا ايتىلعان ماسەلەلەر وتە ورىندى. ورتاق ماقساتتاعى جۇمىسقا بيزنەسمەندەر دە اتسالىسۋ كەرەك. شىمكەنتتىڭ الەۋەتىن ارتتىرۋ باعىتىندا قالامىزدا قازاق يننوۆاسيالىق ۋنيۆەرسيتەتىن سالۋدى جوسپارلاپ وتىرمىز. مۇندا شەتەلدەن بىلىكتى ماماندار شاقىرتىلىپ، مەديسينالىق جانە تەحنيكالىق مامانداردى دايارلايتىن بولادى. بۇل جاقىن بولاشاقتا جۇزەگە اسادى. جالپى، قالانىڭ ينفراقۇرىلىمىن دامىتۋ بويىنشا جاڭا جوسپارلار جاسالىپ جاتىر، - دەدى كاسىپكەر س.سەيىتجانوۆ.

ايتا كەتۋ كەرەك، كەزدەسۋ بارىسىندا شىمكەنت قالاسى اكىمدىگى مەن وقو كاسىپكەرلەر پالاتاسى اراسىندا ءوزارا ىنتىماقتاستىق مەموراندۋمىنا قول قويىلدى.

- كاسىپكەرلىك سەكتورى مەملەكەتكە سالىق تولەۋ ارقىلى قالا قازىناسىن ۇلعايتادى. بۇل رەتتە الەۋمەتتىك سالىق پەن جەر، كولىك سالىعىن رەتتەۋدى ۇسىنامىن. سونداي-اق «قولما قول» بەرىلەتىن ۇستەماقىلاردى دا زاڭداستىرىپ، جۇمىسپەن قامتىلعان قىزمەتكەرلەردىڭ جالاقىسى ارقىلى تۇسەتىن كولەڭكەلى تابىستىڭ سالىعىن دا جۇيەلەۋ كەرەك، - دەدى قالا اكىمى.

جيىن سوڭىندا شاھار باسشىسى عابيدوللا ءابدىراحىموۆ شىمكەنتتىڭ جاڭا زاماناۋي كەلبەتىن قالىپتاستىرۋدا كاسىپكەرلەردى كۇش بىرىكتىرە وتىرىپ، بىرلەسە جۇمىس اتقارۋعا شاقىردى.

دەرەككوز: قازاقپارات