ورال. قازاقپارات - «نۇر وتان» پارتياسى بقو فيليالى عيماراتىنىڭ ۇلكەن زالىندا «مۇنايگاز كەشەنىندە قۋات ۇنەمدەۋ جانە بالامالى ەنەرگەتيكا» ماسەلەلەرى بويىنشا ءحىى حالىقارالىق ناديروۆ وقۋلارىنىڭ پلەنارلىق ءماجىلىسى وتكىزىلدى.
وعان بەلگىلى حيميك-عالىم، ق ر ۇلتتىق عىلىم اكادەمياسىنىڭ اكادەميگى، قازاقستان عىلىمى مەن تەحنيكاسىنىڭ ەڭبەك سىڭىرگەن قايراتكەرى، مەملەكەتتىك سىيلىقتىڭ يەگەرى، پروفەسسور نادير ناديروۆ قاتىسىپ، مۇنداي جيىننىڭ عىلىم ءۇشىن، قازاقستاندىق جانە رەسەيلىك عالىمداردىڭ بىر-بىرىمەن تاجىريبە الماسىپ، جاڭا يدەيا-جوبالاردى جۇزەگە اسىرۋى ءۇشىن ورنى ايرىقشا ەكەندىگىن اتاپ كورسەتتى.

بقو اكىمىنىڭ ءبىرىنشى ورىنباسارى ارمان وتەعۇلوۆتىڭ ايتۋىنشا، وسىنداي جيىنداردا جاڭا وي-يدەيالار تۋىنداپ، شىعارماشىلىق ىزدەنىستەرگە جول اشىلادى. 2001 جىلدان بەرى وتكىزىلىپ كەلە جاتقان حالىقارالىق ناديروۆ وقۋلارى عىلىمداعى ىقپالداستىقتىڭ قازىرگى زامانعى ۇلگىسىن قالىپتاستىرۋدى كوزدەيدى. اسىرەسە، مۇنايگاز سالاسىنداعى عىلىمي-تەحنيكالىق، ەكولوگيالىق ماسەلەلەردى شەشۋ ەرەكشە مانگە يە. عىلىم تەرەڭ دە قاجىرلى ەڭبەك-ىزدەنىستەرسىز العا باسۋى مۇمكىن ەمەس. سوندىقتان زامان اعىمىنا ىلەسۋ ءۇشىن عىلىمعا نەگىزدەلگەن جاڭا تەحنولوگيالاردى ەنگىزە ءبىلۋدىڭ ماڭىزى زور.

ورال قالاسىندا وسىمەن ەكىنشى رەت ۇيىمداستىرىلىپ وتىرعان فورۋمعا قازاقستاننىڭ وزگە وڭىرلەرىنەن، سونداي-اق رەسەيدىڭ كورشىلەس وبلىستارىنان عالىمدار كەلدى. ولار ەكى كۇنگە سوزىلعان جيىن بارىسىندا پلەنارلىق ءماجىلىس پەن سەكسيالىق وتىرىستاردا ءوز وي-تولعامدارىمەن ءبولىسىپ، تىڭ ۇسىنىس-پىكىرلەرىن ورتاعا سالدى.

ناديروۆ وقۋلارى كەزىندە باتىسقازاقستاندىق كاسىپكەر-عالىم، ق ر ۇلتتىق ينجەنەرلىك اكادەمياسى بقو فيليالىنىڭ ءتوراعاسى، «قازييتۋ» ءعىلىمي-بىلىم كەشەنىنىڭ پرەزيدەنتى، تەحنيكا عىلىمدارىنىڭ كانديداتى، وبلىستىق ءماسليحاتتىڭ دەپۋتاتى اقسەرىك ايتىموۆكە اتالمىش اكادەميانىڭ التىن مەدالى تابىس ەتىلدى.

دەرەككوز: قازاقپارات