بۇگىن الماتى قالاسىندا KITAP FEST – "كىتاپ" مەرەكەسى اياسىندا ەرەكشە شارا ءوتتى. زاعيپ جانە ناشار كورەتىن ازاماتتارعا ارنالعان رەسپۋبليكالىق كىتاپحانادا كورنەكتى ەتنوگراف بولات بوپايدىڭ «قازاق داستارحانى»، «قازاق باتاسى»، «قازاق داستۇرلەرى»، «قازاق ىرىم-عۇرىپتارى» اتتى ەڭبەكتەرى العاش رەت برايل قارپىندە (نۇكتەلى-بەدەرلى شريفت) جانە مر-3 فورماتىندا جارىق كورىپ، كوپشىلىككە تانىستىرىلدى.

ءىس-شارانىڭ سالتاناتتى اشىلۋ ءراسىمىن كىتاپحانا باسشىسى اسحات بايۇزاقوۆ اشىپ، بۇل جوبانىڭ ماڭىزىنا ەرەكشە توقتالدى. ونىڭ ايتۋىنشا، ۇلتتىق قۇندىلىقتاردى مۇمكىندىگى شەكتەۋلى جاندارعا قولجەتىمدى ەتۋ – مادەنيەت پەن ادامگەرشىلىكتىڭ بيىك ۇلگىسى.

ەتنوگرافتىڭ 65 جىلدىعىنا ارنالعان ەسكە الۋ كەشىندە "ەرەكشە جاندارعا – ەرەكشە كىتاپتار" اتتى تاقىرىپتىق كورمە ۇيىمداستىرىلدى. كورمەدە بولات بوپايدىڭ ەتنوگرافيالىق مۇرالارى مەن سيرەك كەزدەسەتىن قولجازبالارى كوپشىلىك نازارىنا ۇسىنىلدى.

تۇساۋكەسەرگە مارقۇمنىڭ جارى انار حانىم مەن ۇلى دۋلات بولات ۇلى، قالامگەر دوستارى – اقىن-جازۋشى تۇرسىنبەك كەشۋباي، انشى-سازگەر سەرىك بەشەن ۇلى جانە "قامشى" اقپارات پورتالىنىڭ جەتەكشىسى ءبىلال قۋانىش قاتىسىپ، بولات بوپاي تۋرالى ەستەلىكتەرىمەن ءبولىستى. ولار ەتنوگرافتىڭ حالقىنا دەگەن سۇيىسپەنشىلىگى مەن ەڭبەگىنىڭ ۇلت رۋحانياتىنا قوسقان ۇلەسىن ەرەكشە اتاپ ءوتتى.

شارا اياسىندا بولات بوپايدىڭ "التايىم"، "اينام-اي"، "قازاق ەلى" اتتى اندەرى ورىندالىپ، كورەرمەندەرگە رۋحاني ءلاززات سىيلادى. كەش جىلى شىرايلى اتموسفەرادا ءوتىپ، قاتىسۋشىلار ەتنوگرافتىڭ باي مۇراسىنا جاڭاشا كوزقاراسپەن ۇڭىلۋگە مۇمكىندىك الدى.