الماتى. قازاقپارات- قازاقستاندا 2016 جىلدىڭ 1 قاڭتارىنان باستاپ تۇڭعىش رەت «جوعارى جانە جوعارى وقۋ ورنىنان كەيىنگى ءبىلىم ماماندىقتارى جىكتەۋىشىنە» ماگيستراتۋرا دەڭگەيى بويىنشا «سوت ساراپتاماسى» ماماندىعى ەنگىزىلەدى.
 بۇل تۋرالى بۇگىن الماتىدا قازاقستان رەسپۋبليكاسى ادىلەت مينيسترلىگىنىڭ سوت ساراپتاماسى ورتالىعىنىڭ ۇيىمداستىرۋىمەن وتكەن «شىعىس-باتىس: سوت ساراپتاماسىنداعى ارىپتەستىك. سوت ساراپتاماسىنىڭ تەورياسى مەن تاجىريبەسىنىڭ وزەكتى ماسەلەلەرى» حالىقارالىق عىلىمي-تاجىريبەلىك كونفەرەنسياسى بارىسىندا ق ر ادىلەت مينيسترلىگىنىڭ سوت ساراپتاماسى ورتالىعىنىڭ ديرەكتورى يسيدور بورچيشۆيلي ءمالىم ەتتى.

ونىڭ ايتۋىنشا، ءقازىر بۇل ماماندىقتى جىكتەۋىشكە PhD دوكتورانتۋراسى دەڭگەيى بويىنشا دا ەنگىزۋ جۇمىستارى جۇرگىزىلۋدە. الداعى ۋاقىتتا باكالاۆر دەڭگەيى بويىنشا دا جۇمىستار قولعا الىنۋى مۇمكىن.   

«قازاقستان رەسپۋبليكاسىنىڭ «جوعارى جانە جوعارى وقۋ ورنىنان كەيىنگى ءبىلىم ماماندىقتارى جىكتەۋىشىندە» «سوت ساراپتاماسى» ماماندىعى ءتىپتى بولعان جوق. بۇل جاعدايدا سوت-ساراپتاما ماماندىعى بويىنشا ماگيستر جانە دوكتورلاردى دايارلاۋ وتە قيىن سوقتى. ال، ق ر قۇقىق قورعاۋ ورگاندارىن 2020 جىلعا دەيىن جاڭعىرتۋ مەملەكەتتىك باعدارلاماسىندا سوت-ساراپتاما ماماندىعى بويىنشا ماگيسترلار، دوكتورلار دايارلاۋ كوزدەلگەن. ءبىز سول ءۇشىن 2014 جىلى - ءبىر جىل بويى ق ر ءبىلىم جانە عىلىم مينيسترلىگىمەن جۇيەلىك جۇمىستار جۇرگىزدىك. بۇدان باسقا، ەلىمىزدىڭ ءبىرقاتار جوعارى وقۋ ورىندارىمەن سوت ساراپشىلارىنىڭ بىلىكتىلىگىن ارتتىرۋ ماسەلەسى بويىنشا ىنتىماقتاستىق ورناتتىق»، - دەدى ي. بورچيشۆيلي.

سونىمەن قاتار ول سوت ساراپتامالارىنىڭ جاڭا تۇرلەرىن ازىرلەۋ كەرەكتىگىن جەتكىزدى.

«ءقازىر قازاقستاندا 44 ساراپتامالىق ماماندىق بويىنشا 22 ءتۇرلى سوت ساراپتاماسى جۇرگىزىلەدى. بۇل جەتكىلىكتى مە؟ ولار زامان تالابىنا جاۋاپ بەرە الا ما؟ ساراپتامالىق ىس-تاجىريبەلەر، قۇقىق قورعاۋ جانە باسقا دا ورگاندار مەن سوتتاردىڭ قاجەتتىلىكتەرى بويىنشا جاسالعان تالداۋلاردىڭ ناتيجەلەرىنە، ەل ىشىندەگى جانە شەت ەلدەردەگى قازىرگى جاعدايعا قارايتىن بولساق، ءبىزدىڭ جۇرگىزىپ جاتقان ساراپتامالارىمىز ترانسۇلتتىق قىلمىستار، لاڭكەستىك ارەكەتتەر، تەحنوگەندىك سيپاتتاعى اپاتتار، اۋە كولىكتەرىندەگى اپاتتار سەكىلدى قاۋىپ-قاتەرلەرگە تولىق كولەمدە جاۋاپ بەرە المايدى ەكەن. نە ىستەۋ كەرەك؟ مىنا جاhاندانۋ كەزەڭىندە، مەملەكەتتەر ءار ءتۇرلى وداقتارعا بىرىگىپ جاتقان شاقتا، شەتەلدىك ارىپتەستەرمەن كەيبىر ساراپتاما تۇرلەرى بويىنشا ورتاق ادىستەمە ازىرلەۋ كەرەك دەپ سانايمىن. بۇل سوت-ساراپتامالىق زەرتتەۋلەردى ءتيىمدى جۇرگىزۋگە مۇمكىندىك بەرەر ەدى. ءبىز ءتۇرلى ەلدەردىڭ سوت ساراپتاماسى ورگاندارىنىڭ كۇشىن بىرىكتىرۋىمىز قاجەت. سوندا كەز كەلگەن قاۋىپ-قاتەرگە قارسى تۇرا الامىز»، - دەدى ي. بورچيشۆيلي.

ءقازىر ەلىمىزدە سوت ساراپشىلارى ق ر ادىلەت مينيسترلىگىنىڭ سوت ساراپتاماسى ورتالىعى جانە «بولاشاق» مەملەكەتتىك باعدارلاماسى ارقىلى شەت ەلدەردە دايارلانادى ءارى بىلىكتىلىگىن ارتتىرادى.

بيىل وسى باعدارلاما اياسىندا سوت ساراپتاماسى ورتالىعىنىڭ 18 ساراپشىسى لوندوننىڭ ەكونوميكا جانە ساياسي عىلىمدار مەكتەبىندە ءبىر جىلدىق تاعلىمدامادان وتكەن. سونىمەن قاتار، 87 ساراپشى بيىل باسقا دا ەلدەردە بىلىمدەرىن جەتىلدىرىپ قايتقان. 

ايتا كەتەلىك، بۇگىنگى حالىقارالىق كونفەرەنسياعا ق ر ادىلەت مينيسترلىگىنىڭ وكىلدەرى، ق ر پارلامەنتىنىڭ دەپۋتاتتارى، قازاقستاننىڭ سوت ساراپتاماسى مەكەمەلەرىنىڭ باسشىلارى مەن جەتەكشى ساراپشىلارى جانە ارمەنيا، ازەربايجان، بەلارۋس، ۆەتنام، قىرعىزستان، جۇڭگو، رەسەي، تاجىكستان، تۇركيا، ۋكراينا جانە باسقا دا ەلدەردەن  كەلگەن عالىمدار، بارلىعى 150-دەن استام ادام قاتىستى.

دەرەككوز: قازاقپارات