استانا. قازاقپارات - ايدىن ايىمبەتوۆ تالدىقورعان قالاسىنىڭ قۇرمەتتى ازاماتى اتاندى، دەپ حابارلايدى الماتى وبلىسى اكىمىنىڭ باسپا ءسوز قىزمەتىنەن.
عارىشتى باعىندىرعان ەلىمىزدىڭ ءۇشىنشى پەرزەنتى ايدىن ايىمبەتوۆ جەرلەستەرىمەن جۇزدەسۋ ءۇشىن ءوزىنىڭ تۋعان جەرى تالدىقورعان شاھارىنا ارنايى كەلدى. وبلىس ورتالىعى تالدىقورعان قالاسىنىڭ تورىندەگى «جاستار» سپورت سارايىندا ۇلى دالا ەلىنىڭ باتىرى، حالىق قاھارمانى، بارشا الاش جۇرتىنىڭ ماقتانىشىمەن قاۋىشۋعا جينالعانداردىڭ قاتارى مول بولدى.

قازاقستاننىڭ كوك بايراعىن عارىش كوگىندە جەلبىرەتىپ، امان-ەسەن ەلىنە ورالعان عارىشكەردى جەتىسۋلىقتار اتىنان ءوڭىر باسشىسى اماندىق باتالوۆ قۇتتىقتادى:

«تۋعان قالاڭىزعا، جەر جانناتى جەتىسۋ جەرىنە قوش كەلدىڭىز! قازاقتىڭ ابىرويىن اسىرعان سىزدەي ازاماتتىڭ الماتى وبلىسىندا دۇنيەگە كەلىپ، ءبىلىم الىپ، قىزمەت جاساعاندىعى - ءبىز ءۇشىن ۇلكەن ماقتانىش. 

ءسىزدىڭ بالا كەزىڭىزدەن عارىشكەر بولۋدى ارمانداپ، قازاق ەلىنىڭ تۋىن عارىشقا الىپ شىقسام دەگەن بالالىق ارمانىڭىز ورىندالدى. ۇستىمىزدەگى جىلدىڭ ەكىنشى قىركۇيەگىندە ءبارىمىز ءسىزدىڭ عارىشقا ۇشقان تاريحي ساتىڭىزگە كۋا بولدىق، قاتتى قۋاندىق، ەرەكشە تولقىدىق. كوپتىڭ تىلەگى قابىل بولىپ، امان-ەسەن جەرگە ورالدىڭىز. قاراپايىم قازاق بالاسىنىڭ ارمانى ورىندالىپ، وسى كۇندە ۇلى دالا ەلىنىڭ ماقتانىشىنا اينالدىڭىز.  كەشە عانا ەلباسىنىڭ جارلىعىمەن «حالىق قاھارمانى» اتاعىن تابىستالىپ، ايدىننىڭ كوسموس كەڭىستىگىندە وننان اسا عىلىمي-تاجىريبەلىك سىناقتار جۇرگىزگەنىن ەرەكشە اتاپ ءوتتى.       

ءسىزدىڭ وتاندىق كوسموس سالاسىن دامىتۋداعى ەڭبەگىڭىز - جاستار ءۇشىن ونەگە. ءسىزدىڭ عارىشقا جاساعان وسى ءبىر ساپارىڭىز ارقىلى ءبىز بىرلىك پەن ەرلىكتىڭ نە ەكەنىن وسكەلەڭ ۇرپاققا كورسەتىپ، وتاندى قالاي ءسۇيۋ كەرەكتىگىن ۇيرەتەتىن بولامىز»، - دەپ ءسوزىن تۇيىندەدى.

وسىدان كەيىن تالدىقورعان قالاسىنىڭ اكىمى ەرمەك الپىسوۆ ايدىن اقانۇلىنا تالدىقورعان جۇرتشىلىعى اتىنان تىلەك-لەبىزىن ءبىلدىرىپ، «تالدىقورعان قالاسىنىڭ قۇرمەتتى ازاماتى» اتاعىن بەرىپ، سۋ جاڭا تەمىر تۇلپاردىڭ كىلتىن سىيلادى.

ءوز كەزەگىندە ايدىن ايىمبەتوۆ: «قۇرمەتتى جەرلەستەر! وزدەرىڭىزبەن اماندىقتا قاۋىشقاندىعىما قۋانىشتىمىن. مەنىڭ عارىشقا ساپارىمنىڭ ويداعىداي بولۋى ءبىرىنشى كەزەكتە ەلباسىنىڭ، ودان كەيىن بارشا جەرلەستەرىمنىڭ ارقاسىندا. سول ءۇشىن بارشاڭىزعا ۇلكەن العىسىمدى بىلدىرەمىن. «قازعارىشتا» جۇمىسىمدى جالعاستىرۋ ارقىلى قازاقستاننىڭ وسىپ-وركەندەۋى جولىندا ءالى تالاي ەڭبەك ەتەتىندىگىمە ءسوز بەرەمىن»، -  دەپ ءسوزىن قورىتتى.

شارا وبلىستىڭ ۇزدىك شىعارماشىلىق ۇجىمدارىنىڭ ازىرلەگەن كونسەرتتىك باعدارلاماسىمەن جالعاستى.

وسىدان كەيىن ايدىن ايىمبەتوۆ ءوزى ءبىلىم نارىمەن سۋسىنداعان № 14 ورتا مەكتەپكە بارىپ، ءبىلىم ورداسىنىڭ ۇجىمىمەن جۇزدەستى. اق پەيىل مەن ىنتىماقتىڭ بەلگىسى رەتىندە مەكتەپ وقۋشىلارى اسپانعا اق شارلاردى ۇشىرۋ ارقىلى، وزدەرى وقىپ جاتقان مەكتەپ تۇلەگىنە دەگەن قۋانىش سەزىمدەرىن ءبىلدىردى. عارىشكەرمەن بىرگە وسى مەكتەپكە ەلىمىزدىڭ جان-جاعىنان ايدىن ايىمبەتوۆتىڭ سىنىپتاستارى دا جينالدى. بارلىعى مەكتەپ قابىرعاسىندا جۇرگەن كەزدەرىن ەسكە الدى.

 شارا سوڭى ايدىن ايىمبەتوۆتىڭ كەزىندە باسشىلىق ەتكەن №21751 اسكەري بولىمىنە بارىپ، ءبولىمنىڭ جەكە قۇرامىمەن كەزدەسىپ، ەمەن-جارقىن اڭگىمەلەسۋىمەن اياقتالدى.

دەرەككوز: قازاقپارات