قىزىلوردا. قازاقپارات - ۇلتتىق وپەراتور «قازترانسگاز» اق «قىزىلوردا وبلىسىنىڭ 5 ەلدى مەكەنىن گازداندىرۋ» ينۆەستيسيالىق جوباسى اياسىندا «جاڭاقورعان» اۆتوماتتاندىرىلعان گاز تاراتۋ ستانساسىن  ىسكە قوستى.
بۇل شاراعا قىزىلوردا وبلىسىنىڭ اكىمى قىرىمبەك كوشەربايەۆ جانە «قازترانسگاز ايماق» اق باسقارما ءتوراعاسى (باس ديرەكتورى) يبۋللا سەردييەۆ قاتىستى.

جاڭاقورعان كەنتىن گازداندىرۋ اياسىندا «بەينەۋ-بوزوي-شىمكەنت» ماگيسترالدى گاز قۇبىرىنان ۇزىندىعى 7 كم جەتكىزۋشى گاز قۇبىرى تارتىلىپ، 2 گتپ (گاز تاراتۋ پۋنكتى)، 27 شگتپ (شكافتىق گاز تاراتۋ پۋنكتى) جانە 275 اۋىلىشىلىك گاز قۇبىرلارى سالىندى. ناتيجەسىندە ەلدى-مەكەننىڭ 30 مىڭ تۇرعىنى كوگىلدىر وتىنمەن قامتاماسىز ەتىلەدى. ال بۇل 5410 جەكە ءۇي، 27 كوپپاتەرلى ءۇي، 167 كوممۋنالدىق-تۇرمىستىق كاسىپورىن.

كومپانيا اي سوڭىنا دەيىن ارال قالاسى، شيەلى جانە ايتەكە بي اۋىلدارىندا 3 اگتس قۇرىلىسىن اياقتاپ، ىسكە قوسۋدى جوسپارلاپ وتىر. سونداي-اق، بيىل قىزىلوردا وبلىسىنىڭ بايقوڭىر قالاسىن گازداندىرۋ جوباسىن اياقتاۋدى ماقسات ەتىپ قويدى.  

«قازترانسگاز ايماق» اق باسقارما ءتوراعاسى (باس ديرەكتورى) يبۋللا سەردييەۆتىڭ ايتۋىنشا، «قازاقستاندا العاش رەت 5 بەس بىردەي اۋدانعا كوگىلدىر وتىن بەرىلگەلى وتىر. وسىلايشا ۇلتتىق وپەراتور «قازترانسگاز» اق قىزمەتىنىڭ ارقاسىندا قىزىلوردا وبلىسىنىڭ 190 مىڭنان استام تۇرعىنى وتە ءتيىمدى ءارى ەكولوگيالىق تۇرعىدا تازا وتىندى پايدالانۋ مۇمكىندىگىنە يە بولدى. «ايماقتا از عانا ۋاقىتتىڭ ىشىندە 1439 كم گاز قۇبىرى، 81 گاز تاراتۋ پۋنكتى، 258 شكافتىق پۋنكتتەر سالىندى. ەندى ايماق گازبەن قامتاماسىز ەتۋدىڭ جاڭا كەزەڭىنە ءوتتى. وسى ماڭىزدى ينۆەستجوبانى جۇزەگە اسىرا وتىرىپ، وبلىس تۇرعىندارىنىڭ ءومىر ءسۇرۋ دەڭگەيىنىڭ ارتۋىنا دا وزىندىك ۇلەس قوسىپ وتىرعانىمىزدى اتاپ وتكىم كەلەدى»، دەدى سالتاناتتى ىسكە قوسۋ ءراسىمى بارىسىندا يبۋللا سەردييەۆ.     

اقپارات: 

سوڭعى 5 جىلدا 7 مىڭ جاڭا ءۇي گاز تاراتۋ جۇيەسىنە قوسىلدى. ءىرى كاسىپورىندار، شاعىن جانە ورتا بيزنەس نىساندارى ەكولوگيالىق تۇرعىدان تازا وتىنعا اۋىستىرىلدى. 2013 جىلى قىزىلوردا قالاسىنىڭ گاز جۇيەسى «بەينەۋ-بوزوي-شىمكەنت» ماگيسترالدى گاز قۇبىرىنا قوسىلدى. وسىلايشا وبلىس ورتالىعىندا قىس مەزگىلىندە تۋىندايتىن كوگىلدىر وتىن تاپشىلىعى تولىعىمەن جويىلدى.  

دەرەككوز: قازاقپارات