الماتى. قازاقپارات - بۇگىن الماتىدا «نۇر وتان» پارتياسىنىڭ قالالىق ءماسليحاتتاعى دەپۋتاتتىق فراكسياسىنىڭ قالا بيۋدجەتىن وڭتايلاندىرۋ ماسەلەسى بويىنشا وتكىزگەن وتىرىسىندا ءبىرقاتار ءىرى جوبالاردى قارجىلاندىرۋدى ۋاقىتشا توقتاتۋ ۇسىنىلدى.
«نۇر وتان» پارتياسىنىڭ قالالىق فيليالىندا وتكەن جيىنعا الماتى اكىمى باۋىرجان بايبەك قاتىستى.

وتىرىس بارىسىندا ءبىرىنشى كەزەكتە قالانىڭ باتىس جاعىنا جاڭا اۆتوۆوكزال سالۋ ءۇشىن جەكە جەر تەلىمدەرىن مەملەكەت پايداسىنا ساتىپ الۋعا بولىنگەن قارجىنى 1،6 ملرد. تەڭگەگە، ناۋرىزباي اۋدانىندا اكىمشىلىك عيمارات سالۋعا بولىنگەن قارجىنى 2،7 ملرد. تەڭگەگە جانە «الماتىينۆەست-2015» ءۇشىنشى حالىقارالىق فورۋمعا بولىنگەن قارجىنى 105 ملن. تەڭگەگە قىسقارتۋ ۇسىنىلدى.

سونىمەن قاتار، ءماسليحات دەپۋتاتى، «نۇر وتان» پارتياسى قالالىق فيليالىنىڭ باقىلاۋ-ريەۆيزيالىق كوميسسياسىنىڭ مۇشەسى سەرگەي كوزلوۆ «كوكجايلاۋ» تاۋ-شاڭعى شيپاجايىن سالۋ جوباسىن ازىرگە توقتاتۋدى ۇسىندى. ونىڭ ايتۋىنشا، 2017 جىلعى قىسقى ۋنيۆەرسيادانى وتكىزۋگە قازىرگى سالىنىپ جاتقان نىساندار دا جەتكىلىكتى.

تاعى ءبىر ءماسليحات دەپۋتاتى ارتۋر كوتەنيەۆ قالادا بەس جەرۇستى وتكەلدەرىن سالۋعا ارنالعان جوبانى توقتاتىپ، وعان بولىنگەن 950 ملن. تەڭگەنى الەۋمەتتىك نىساندار سالۋعا باعىتتاۋدى ۇسىندى. ونىڭ ايتۋىنشا، قالادا 2008 جىلدان كۇنى بۇگىنگە دەيىن 70-تەن استام جەراستى جانە جەرۇستى وتكەلدەرى سالىنعان. بۇل جاياۋ جۇرگىنشىلەردىڭ جولدان ءوتىپ تۇرۋلارىنا وڭ اسەر ەتتى. ازىرگە وسىلار دا جەتكىلىكتى.

«دەگەنمەن ماسەلەلەر جەتىپ ارتىلادى. قازىرگى سالىنعان جەرۇستى كوپىرلەرىنىڭ كوبىسىندە تازالىق ساقتالمايدى، قوقىسقا تولى. ال مۇگەدەكتەرگە ارنالعان جەدەلساتىلار ءتىپتى ىستەمەيدى. ونىڭ ۇستىنە بۇل وتكەلدەردىڭ باعاسى تىم قىمبات. وسىعان بايلانىستى جاۋ جۇرگىنشىلەرگە ارنالعان جاڭا كوپىرلەر سالۋ جوباسىن ۋاقىتشا توقتاتا تۇرۋدى ۇسىنامىن»، - دەدى ا. كوتەنيەۆ.  

ال ءماسليحات دەپۋتاتى مۇرات ءادىلحانوۆ ءوز كەزەگىندە «الماتى يپپودرومى» سپورت ويىن-ساۋىق كەشەنىن قالا مەنشىگىنە ساتىپ الۋ شاراسىن ۋاقىتشا توقتاتۋ كەرەكتىگىن العا تارتتى.  

«بۇل جوبانىڭ تيىمدىلىگى ءالى دە تولىق ەسەپتەلگەن جوق. ارينە، يپپودروم قالاعا كەرەك. ءبىراق، بۇل جاعدايدا باعا ساياساتى تولىق ناقتىلانباعان. بۇل وتە قىمبات باعا. سوندىقتان يپپودرومدى ساتىپ الۋعا بولىنگەن 4 ملرد. 278 ملن. تەڭگەنى الەۋمەتتىك ماڭىزى بار باسقا جوبالارعا جۇمساعان ءجون»، - دەدى ول. 

باياندامالاردى تىڭداپ بولعان سوڭ ءسوز العان قالا باسشىسى باۋىرجان بايبەك بۇگىنگى وتىرىسقا قاتىسۋشىلاردى قولعا الىنىپ جاتقان وڭتايلاندىرۋ شارالارىنا تۇسىنىستىكپەن قاراۋعا شاقىردى.

«بۇگىن وتە ماڭىزدى ماسەلەلەر كوتەرىلدى. الماتىدا وتە كوپ جوبالار جۇزەگە اسىرىلىپ جاتىر. ءبىراق، ەڭ باستىسى الەۋمەتتىك مىندەتتەمەلەردى ورىنداۋىمىز قاجەت. الەۋمەتتىك از قامتىلعان تۇرعىندارعا قولداۋ كورسەتۋ - ءبىز ءۇشىن باسىمدىقتى باعىتتاردىڭ ءبىرى. سوندىقتان ەلباسىنىڭ ءتيىمسىز شىعىنداردى وڭتايلاندىرۋ جونىندەگى تاپسىرماسىن باسشىلىققا الا وتىرىپ، ءىرى جوبالاردى بارىنشا وڭتايلاندىرىپ، ۇنەمدەلگەن قاراجاتتى الەۋمەتتىك باعىتتارعا جۇمساعانىمىز دۇرىس بولادى»، - دەدى ب. بايبەك.

بۇدان كەيىن وتىرىستا ايتىلعان ۇسىنىستار داۋىسقا سالىنىپ، بارلىعى ءبىراۋىزدان قابىلداندى.

الماتى قالاسىنىڭ 2015 جىلعا ارنالعان بيۋدجەتىن وڭتايلاندىرۋ بويىنشا ۇنەمدەلگەن سومانىڭ جالپى سوماسى ەرتەڭ ءماسليحاتتىڭ كەزەكتى سەسسياسىندا ناقتىلاناتىن بولادى. 

دەرەككوز: قازاقپارات