قىزىلوردا. قازاقپارات - بۇگىن شيەلى اۋدانىنىڭ ورتالىعى كوگىلدىر وتىنعا قوسىلدى. تۇرعىنداردىڭ قۋانىشىمەن قىزىلوردا وبلىسىنىڭ اكىمى قىرىمبەك كوشەربايەۆ جانە «قازترانسگاز» اق باس ديرەكتورىنىڭ ءبىرىنشى ورىنباسارى سەرىك ەستاي ورتاقتاستى. بۇل تۋرالى وبلىستىق اكىمدىكتىڭ باسپا ءسوز قىزمەتى حابارلادى.
ايتا كەتەيىك، قىزىلوردا وبلىسى اكىمدىگى مەن "قازترانسگاز" اق اراسىندا بىلتىر جاسالعان مەموراندۋمعا سايكەس، جاڭاقورعان، شيەلى، قازالى جانە ارال اۋداندارى مەن بايقوڭىر قالاسىن  گازداندىرۋعا قاجەتتى قاراجات بولىنگەن. ال، وبلىستىڭ قالعان اۋداندارى كەلەسى جىلى گازبەن قامتىلاتىن بولادى. ول جۇمىستارعا قاجەتتى 16 ملرد. تەڭگەنى ەۋروپالىق قايتا قۇرۋ جانە دامۋ بانكى ينۆەستيسيالايتىن بولادى.

 - ەلباسىنىڭ تاپسىرماسىمەن گازداندىرۋ جۇمىستارى وڭىردە قارقىندى جۇرگىزىلۋدە. قازىرگى تاڭدا گازدى اۋدان ورتالىقتارىنا جەتكىزەتىن قۇبىرلارى سالىنىپ ءبىتتى. وتكەن اپتادا جاڭاقورعاندىقتار كوگىلدىر وتىنعا قوسىلسا، ەندى مىنە شيەلى اۋدانى قۋانىشقا كەنەلىپ وتىر. كەلەر جىلى قالعان ءۇش اۋداندا گازداندىرۋ جۇمىسى باستالادى. سول كەزدە وبلىستىڭ 83 پايىز حالىق تۇراتىن اۋماق گازداندىرىلادى. ايتا كەتەيىن، الەۋمەتتىك قولداۋدى قاجەت ەتەتىن وتباسىلارعا كومەك كورسەتىلەتىن بولادى، - دەدى وبلىس اكىمى ق.كوشەربايەۆ.

  - ۇيلەرگە گاز قوسىپ، تۇرعىندارعا جىلۋ مەن قۋانىش سىيلاي وتىرىپ، «قازترانسگاز» اق حالىقتىق كومپانيا ەكەنىن تاعى ءبىر دالەلدەدى. وعان مىسال، جىل سايىن ۇلتتىق وپەراتور رەسپۋبليكا بويىنشا 35 مىڭنان استام ابونەنتتىڭ ۇيىنە گاز كىرگىزىپ وتىر. جۇزەگە اسىرىلىپ جاتقان ينۆەستيسيالىق جوبا اياسىندا ءبىر عانا قىزىلوردا وبلىسىندا بيىل 1250 كم گاز قۇبىرى سالىندى. «قازترانسگاز» الەۋمەتتىك جاۋاپكەرشىلىكتى جوعارى قوياتىن كومپانيا. ىستەپ وتىرعان جۇمىسىمىز تۇگەلدەي حالىقتىڭ تۇرمىسىن جاقسارتۋعا ەلىمىزدىڭ ءال-اۋقاتىن ارتتىرۋعا باعىتتالعان، - دەدى «قازترانسگاز» اق باس ديرەكتورىنىڭ ءبىرىنشى ورىنباسارى سەرىك ەستاي.

  بۇگىن ۇيىنە العاش بولىپ كوگىلدىر وتىندى كىرگىزگەندىردىڭ ءبىرى  ايتۋاروۆتار وتباسى. ولاردىڭ قۋانىشىندا شەك جوق. تالاي جىلعى ارماندارى ورىندالعانىنا ريزا.

- جاسىراتىنى جوق باستاپقىدا گاز كەلەدى دەگەندە كۇمانمەن قاراعانبىز. ءبىراق ەلباسىنىڭ قولداۋ كورسەتكەن جوباسى جۇزەگە استى. ءبىزدىڭ قۋانىشىمىزدا شەك جوق. ويتكەنى، ەندى وت جاعىپ، كۇل شىعارمايمىز، - دەيدى شيەلى اۋدانىنىڭ تۇرعىنى ارداق ايتۋاروۆ.

ايتا كەتۋ كەرەك، كەلەسى اپتادا قازالى اۋدانىن گازداندىرۋ باستالادى، ودان كەيىنگى كەزەكتە -  ارال اۋدانى. 

دەرەككوز.قازاقپارات