الماتى. قازاقپارات - بۇگىن الماتىدا «نۇر وتان» پارتياسىنىڭ قالالىق ءماسليحاتتاعى دەپۋتاتتىق فراكسياسىنىڭ قالا بيۋدجەتىن وڭتايلاندىرۋ ماسەلەسى بويىنشا جينالىسى ءوتتى. 
وعان الماتى قالاسىنىڭ اكىمى باۋىرجان بايبەك، ءماسليحاتتىڭ دەپۋتاتتارى جانە جەرگىلىكتى مەملەكەتتىك ورگانداردىڭ باسشىلارى قاتىستى.

ءوزىنىڭ العى سوزىندە قالا باسشىسى بيۋدجەت قاراجاتىن نەگىزىنەن الەۋمەتتىك سالالاردى دامىتۋعا جۇمساۋ كەرەكتىگىن ايتتى.

«بيۋدجەت ماسەلەسى وتە ماڭىزدى. ونىڭ ءاربىر تيىنى قايدا جۇمسالىپ جاتىر؟ قالاي جۇمسالىپ جاتىر؟ وسى جاعىن مۇقيات قاداعالاۋىمىز قاجەت. قالالىق ءماسليحات دەپۋتاتتارىنىڭ 95 پايىزى «نۇر وتان» پارتياسىنىڭ مۇشەلەرى. ياعني، ونداعى ەڭ ۇلكەن فراكسيا وسى «نۇر وتان» پارتياسىنا تيەسىلى. سوندىقتان بيىلعى 2015 جىلدىڭ بيۋدجەتىن وڭتالاندىرۋ ماسەلەسىن ەرتەڭ ءماسليحاتتىڭ سەسسياسىنا شىعارماي تۇرىپ، بۇگىن الدىن الا، فراكسيا وتىرىسىندا تالقىلاعاندى ءجون كوردىك. «نۇر وتان» پارتياسىنىڭ نەگىزگى ءتورت ۇستانىمى ول - اشىقتىق، ناتيجەلىلىك، ەسەپتىلىك جانە جاۋاپكەرشىلىك. ءبىز وسى ءتورت ۇستانىم بويىنشا جۇمىس اتقارۋىمىز كەرەك»، - دەدى ءوز سوزىندە ب. بايبەك.

وتىرىس بارىسىندا نەگىزگى ماسەلە قالا بيۋدجەتىنىڭ ءتيىمدى پايدالانىلۋى مەن ورىندالۋى توڭىرەگىندە بولدى. «نۇر وتان» فراكسياسىنىڭ دەپۋتاتتارى مەگاپوليس بيۋدجەتىندەگى ءتيىمىز شىعىنداردى 5،4  ملرد. تەڭگەگە قىسقارتتى. قاتىسۋشىلار ۇنەمدەلگەن قارجىنى الەۋمەتتىك ماڭىزعا يە جوبالارعا جۇمساۋ كەرەكتىگىن ۇسىندى. بۇل شەشىم ءبىراۋىزدان قابىلداندى.

سونىمەن قاتار، فراكسيا دەپۋتاتتارى بۇگىنگى جيىنعا قاتىسقان قوعامدىق ۇيىمداردىڭ ۇسىنىستارىن ەسكەرە وتىرىپ، بيۋدجەتتىك قارجىنىڭ جۇمسالۋىن وڭتايلاندىرۋ جانە قاداعالاۋ شارالارىن جان-جاقتى قاراستىردى.

دەرەككوز: قازاقپارات