ورال. قازاقپارات - باتىس قازاقستان وبلىسىندا ءتيىستى شارالاردىڭ ناتيجەسىندە جىل باسىنان بەرى 270 مەكەمە-كاسىپورىندا 2339 قىزمەتكەرگە 260 ملن. تەڭگە ەڭبەكاقى بەرەشەگى وتەلدى. بۇل تۋرالى وبلىس اكىمىنىڭ ورىنباسارى باقتيار ماكەننىڭ توراعالىعىمەن وتكەن بقو اكىمدىگى جانىنداعى داعدارىسقا قارسى شتاب وتىرىسىندا ءمالىم ەتىلدى.
وبلىستىق ەڭبەك ينسپەكسياسى باسقارماسىنىڭ باسشىسى جانات اسانتايەۆتىڭ ايتۋىنشا، جالاقىنى ۋاقتىلى تولەمەۋگە قاتىستى انىقتالعان 70 زاڭبۇزۋشىلىق دەرەگى بويىندا جۇمىس بەرۋشىلەرگە 6،3 ملن. تەڭگە كولەمىندە ايىپپۇل سالىندى. ەڭبەكاقى بەرەشەگىن وتەۋگە قاتىستى بۇرىن بەرىلگەن ۇيعارىمداردىڭ ورىندالماۋىنا بايلانىستى جوسپاردان تىس قايتادان 14 تەكسەرىس وتكىزىلىپ، سونىڭ ناتيجەسىندە سوت شەشىمدەرىمەن 10 جۇمىس بەرۋشىگە 2،3 ملن. تەڭگە ايىپپۇل سالىندى. وتكەن قىركۇيەك ايىندا «سپمك-123» جشس-نىڭ 58 قىزمەتكەرگە 4،7 ملن. تەڭگە جالاقىدان بەرەشەك بولىپ وتىرعانى تىركەلگەن. سونىمەن قاتار ەڭبەك ينسپەكسياسى 6 كاسىپورىننىڭ 243 قىزمەتكەرگە 37،236 ملن. تەڭگە قارىزدار ەكەندىگىن انىقتادى. قازىرگى تاڭدا وسى كاسىپورىندار بويىنشا جالاقى بەرەشەگىن وتەۋ جۇمىستارى جۇرگىزىلۋدە.
وتىرىستا وبلىستىق ادىلەت دەپارتامەنتىنىڭ باسشىسى ءاسيا مۇحيتوۆانىڭ بايان ەتكەنىندەي، بيىل سوت ورىنداۋشىلارىنا جۇمىسشى-قىزمەتكەرلەرگە قارىز كولەمى 170 ملن. استام تەڭگەنى قۇرايتىن 144 قۇجات تۇسسە، سونىڭ 126-سى (130 ملن. تەڭگە) ورىندالعان. سونداي-اق جۇمىسشىلار ەسەبىنە 86،8 ملن. تەڭگە وندىرىلگەن. ءقازىر وندىرىستە 13 كاسىپورىنعا قاتىستى 14 قۇجات (37 ملن. تەڭگە) قالسا، سونىڭ 9 ملن. تەڭگەسى «كروۋن باتىس» جشس-ىنا تيەسىلى.
وبلىستىق مەملەكەتتىك كىرىستەر دەپارتامەنتى باسشىسىنىڭ ورىنباسارى نۇربولات ابدۋلوۆتىڭ سوزىنە قاراعاندا، بيىلعى 1 قازانداعى مالىمەت بويىنشا وڭىردەگى جۇمىس بەرۋشىلەردىڭ مىندەتتى زەينەتاقى جارنالارى بويىنشا بەرەشەگى 55،9 ملن. تەڭگەنى قۇراپ، ءبىرىنشى جارتىجىلدىقتاعى كورسەتكىشتەن 2،1 ملن. تەڭگەگە كەمىگەن. ال الەۋمەتتىك تولەمدەر بويىنشا قارىز 3،4 ملن. تەڭگەگە كوبەيىپ، 22،6 ملن. تەڭگەگە جەتىپ وتىر. 365 جۇمىس بەرۋشى زەينەتاقى زاڭدىلىعىن بۇزعانى ءۇشىن، 359 جۇمىس بەرۋشى الەۋمەتتىك تولەمدەر بەرەشەگى بويىنشا اكىمشىلىك جاۋاپكەرشىلىككە تارتىلدى.
وبلىستا 150 كاسىپورىن بانكروتتىق، وعان قوسا 12 كاسىپورىن وڭالتۋ ۇردىستەرىنەن وتكىزىلۋدە. 150 بانكروتتىق كاسىپورىننىڭ 9-ىنىڭ جانە وڭالتۋدان ءوتىپ جاتقان ءبىر كاسىپورىننىڭ جالاقى بەرەشەگى 198،295 ملن. تەڭگەنى قۇرايدى. 9 بانكروتتىق كاسىپورىننىڭ تورتەۋىنىڭ 29،4 ملن. استام ەڭبەكاقى قارىزى تولىقتاي وتەلگەن.
جيىن قورىتىندىسىندا قازىرگىدەي كەزەڭدە جۇمىس ورىندارىنىڭ قىسقارتىلۋىنا، سونداي-اق جالاقى بەرەشەگى، زەينەتاقى جانە الەۋمەتتىك تولەمدەر قارىزىنىڭ قوردالانۋىنا جول بەرمەۋ قاجەتتىلىگى ايتىلىپ، دەپارتامەن-باسقارما باسشىلارىنا ءتيىستى تاپسىرمالار بەرىلدى.
دەرەككوز: قازاقپارات
