الماتى. قازاقپارات - بۇگىن الماتىدا قازاقستان رەسپۋبليكاسى ادىلەت مينيسترلىگىنىڭ سوت ساراپتاماسى ورتالىعىنىڭ ۇيىمداستىرۋىمەن  «شىعىس-باتىس: سوت ساراپتاماسىنداعى ارىپتەستىك. سوت ساراپتاماسىنىڭ تەورياسى مەن تاجىريبەسىنىڭ وزەكتى ماسەلەلەرى» اتتى حالىقارالىق عىلىمي-تاجىريبەلىك كونفەرەنسياسى باستالدى.
وعان ق ر ادىلەت مينيسترلىگىنىڭ وكىلدەرى، ق ر پارلامەنتىنىڭ دەپۋتاتتارى، قازاقستاننىڭ سوت ساراپتاماسى مەكەمەلەرىنىڭ باسشىلارى مەن جەتەكشى ساراپشىلارى جانە ارمەنيا، ازەربايجان، بەلورۋس، ۆەتنام، قىرعىزستان، جۇڭگو، رەسەي، تاجىكستان، تۇركيا، ۋكراينا جانە باسقا دا ەلدەردەن  كەلگەن عالىمدار، بارلىعى 150-دەن استام ادام قاتىسۋدا.

«بۇگىنگى كونفەرەنسيانىڭ ماقساتى - ءار ەلدىڭ ساراپشىلىق مەكەمەلەرىندە كەزدەسەتىن اعىمداعى ماسەلەلەردى جان-جاقتى تالقىلاۋ جانە شەشۋ، ايماقتىق جانە ۇلتارالىق ءوزارا ىس-ارەكەتتەردىڭ دامۋىن قامتاماسىز ەتۋ، سونداي-اق سوت-ساراپتاما قىزمەتىنىڭ كەلەشەكتەگى دامۋ جولىن ايقىنداۋ. زاڭنىڭ ۇستەمدىگىن قامتاماسىز ەتۋدە سوت ساراپتاماسى ماڭىزدى ءرول اتقاراتىنى ءسوزسىز. ءبىز زەرتتەۋلەر جۇرگىزەمىز جانە ساراپشىلىق تۇجىرىمدار جاسايمىز. ءبىراق بۇگىنگى تاڭدا بۇل جەتكىلىكسىز. زامان تالابىنا ساي، ساراپتاما جاساۋدىڭ جاڭا تۇرلەرىن، جاڭا ادىستەمەلەرىن ازىرلەۋىمىز قاجەت. سوندىقتان دا بۇگىن وسى ماسەلەلەردى تالقىلاۋ ءۇشىن حالىقارالىق سوت ساراپتاماسى مەكەمەلەرىنىڭ ماماندارىن شاقىرىپ وتىرمىز»، - دەدى «قازاقپارات» تىلشىسىنە بەرگەن سۇحباتىندا ق ر ادىلەت مينيسترلىگىنىڭ سوت ساراپتاماسى ورتالىعىنىڭ ديركتورى يسيدور بورچيشۆيلي.

سونداي-اق، كونفەرەنسيا بارىسىندا كورشى ەلدەردىڭ سوت-ساراپتاما قىزمەتىنىڭ قۇقىقتىق جانە ۇيىمداستىرۋشىلىق اسپەكتىلەرى بويىنشا تاجىريبەلەرى مەن جوسپارلارىن تىڭعىلىقتى زەردەلەۋ جوسپارلانىپ وتىر.

ايتا كەتەلىك، اتالمىش كونفەرەنسيا ءبىرقاتار مەملەكەتتەردىڭ سوت ساراپشىلارىنىڭ ۇستانىمدارىن بىرىكتىرۋگە باعىتتالعان. بۇل ءىس-شارا 10 جىلدان اسا ۋاقىتتان بەرى سوت ساراپتاماسى سالاسىنداعى ءىس-قيمىلدار ستراتەگياسى مەن ۇيلەستىرۋ مەحانيزمدەرىن تالقىلاۋعا جانە ازىرلەۋگە، اقپاراتتارمەن الماسۋعا جانە ءوزارا جەمىستى ىنتىماقتاسۋعا ارنالعان امبەباپ الاڭعا اينالدى.

دەرەككوز: قازاقپارات