قىزىلوردا. قازاقپارات - قىزىلوردا وبلىسى بۋفەرلىك ايماقتان شىعۋعا تولىق دايىن، دەپ ءمالىم ەتتى وبلىس اكىمىنىڭ ورىنباسارى سەرىك قوجانيازوۆ  باسپا ءسوز ءماسليحاتىندا. 
رەسەي فەدەراسياسى مەن قازاقستان رەسپۋبليكاسىنىڭ ۆەتەرينارلىق قىزمەتتەرىنىڭ 2011 جىلعى 11 ناۋرىزداعى شەشىمىنە سايكەس اۋسىل ىندەتىنە قولايسىز وزبەكستان، قىرعىزستان، جۇڭگو مەملەكەتتەرىنە كورشىلەس قازاقستاننىڭ 5 وبلىسى بۋفەرلىك ايماققا جاتقىزىلىپ، بۇل وبلىستاردان ەلىمىزدىڭ باسقا ايماقتارى مەن كەدەن وداعىنا مۇشە مەملەكەتتەرگە اۋسىلعا بەيىم اۋىل شارۋاشىلىعى جانۋارلارى مەن ولاردىڭ شيكى ەت ونىمدەرىن شىعارۋعا تيىم سالىنعان بولاتىن.

سودان بەرى وبلىس اۋماعىن بۋفەرلىك ايماقتان شىعارۋ ماقساتىندا ءبىرقاتار جۇمىستار اتقارىلدى.  بيىلعى جىلدىڭ وزىندە اۋسىل ىندەتى بويىنشا بەكىتىلگەن جوسپارعا سايكەس، 480 باس مالدىڭ قان قۇرامىنا جۇرگىزىلگەن زەرتحانالىق زەرتتەۋلەر  وڭدى ناتيجە كورسەتتى.

سونداي-اق، قازان ايىنىڭ 8-11 ارالىعىندا حالىقارالىق ەپيزووتيالىق بيۋروسىنىڭ باس ديرەكتورى بەرنارد ۆالل استانا قالاسىنا ساپارمەن كەلىپ، پرەمەر-مينيستر كارىم ماسىموۆپەن جانە ق ر اۋىل شارۋاشىلىعى ءمينيسترى ا.مامىتبەكوۆپەن كەزدەسكەن بولاتىن. جۇزدەسۋ بارىسىندا  بۋفەرلىك ايماقتاعى 5 وبلىسقا ۆاكسينا قولدانىلاتىن اۋسىلدان تازا ايماق ستاتۋسىن بەرۋ ماقساتىندا ءىس-شارالار اتقارىلىپ جاتقاندىعى ايتىلعان ەدى. 2015 جىلعى 6 قاراشادا الماتى قالاسىندا وتەتىن ءىىى-حالىقارالىق ۆەتەرينارلىق كونگرەستە عىلىمي كەڭەستىڭ وڭ شەشىمى شىعادى دەپ كۇتىلۋدە. سودان كەيىن 2016 جىلدىڭ مامىر ايىندا پاريج قالاسىندا وتەتىن حەب-نىڭ 84-اسسامبلەيا دەلەگاتتارىنىڭ قاراۋىنا ۇسىنىلماق.

- جالپى، بۋفەرلىك ايماقتان شىعۋعا بايلانىستى تالاپتاردىڭ بارلىعىن ورىنداپ وتىرمىز. ەندى ارنايى رۇقسات قاعازدىڭ مەرزىمىن كۇتۋدەمىز، - دەدى وبلىس اكىمىنىڭ ورىنباسارى س.قوجانيازوۆ.

قىزىلوردا وبلىسىنىڭ ەتتى ەكسپورتتاۋعا الەۋەتى جەتكىلىكتى. بۇل باعىتتا جاسالىپ جاتقان جۇمىستار اۋقىمدى. ماسەلەن، قازىرگى تاڭدا وبلىستا 2200 باستى بورداقىلاۋعا ارنالعان 18 الاڭ بار. سونداي-اق، سىرداريا اۋدانىندا 3 مىڭ باسقا جانە قازالى اۋدانىندا 500 باسقا ارنالعان مال بورداقىلاۋ الاڭى سالىنىپ جاتىر. كەلەر جىلى جالاعاش اۋدانىندا 3 مىڭ باسقا ارنالعان بورداقىلاۋ الاڭىنىڭ قۇرىلىسى باستالاتىن بولادى. 

دەرەككوز: قازاقپارات