قازاقستان جاڭا ەكسپورتتىق باعىتتاردى يگەرىپ، استىق نارىعىنداعى گەوگرافياسىن كەڭەيتىپ جاتىر. بۇل تۋرالى اۋىل شارۋاشىلىعى مينيسترلىگى حابارلادى.

2024–2025 جىلعى ماۋسىمنىڭ (قىركۇيەك–ءساۋىر) قورىتىندىسى بويىنشا، استىق پەن ۇن ەكسپورتى (استىق بالاماسىندا) شامامەن 10 ملن تونناعا جەتىپ، وتكەن جىلمەن سالىستىرعاندا 37،4%-عا ارتقان. ادەتتە جىل سايىنعى جونەلتىلىم كولەمى 7–8 ملن توننا دەڭگەيىندە بولاتىن.

– بىلتىر ديقاندار رەكوردتىق ءونىم جينادى، بۇل ەكسپورت الەۋەتىن ەداۋىر ارتتىردى. جىل سوڭىنا دەيىن قازاقستان شەتەلگە 12 ملن تونناعا دەيىن استىق جونەلتە الادى، – دەلىنگەن مينيسترلىك حابارلاماسىندا.

جاڭا باعىتتار: ماروككو مەن ۆەتنام

مامىر ايىنىڭ سوڭىنا دەيىن ازىق-تۇلىك كەلىسىمشارت كورپوراسياسى ماروككوعا العاشقى 60 مىڭ توننا بيداي جونەلتۋدى اياقتاماق. سونىمەن قاتار، ۆەتنامعا 15 مىڭ توننا كولەمىندەگى سىنامالىق پارتيانى جەتكىزۋگە كەلىسىمشارت جاسالدى.

ەكسپورتتىڭ ءداستۇرلى باعىتتارىندا دا ءوسىم بار

2024–2025 جىلدار ارالىعىنداعى قىركۇيەك–ءساۋىر كەزەڭىندە ءداستۇرلى نارىقتارعا جونەلتىلگەن استىق پەن ۇن كولەمى دە ايتارلىقتاي ارتقان:

• وزبەكستان – 2،6 ملن توننادان 3،3 ملن تونناعا دەيىن (+28%)

• تاجىكستان – 807،4 مىڭ توننادان 1،2 ملن تونناعا دەيىن (+44%)

• قىرعىزستان – 116،6 مىڭ توننادان 278،1 مىڭ تونناعا دەيىن (2،4 ەسە وسكەن)

• يران – 54 مىڭ توننادان 889 مىڭ تونناعا دەيىن (16 ەسە وسكەن)

• ازەربايجان – 5 مىڭ توننادان 569 مىڭ تونناعا دەيىن (113 ەسە وسكەن)

• اۋعانستان – 202 مىڭ توننادان 270 مىڭ تونناعا دەيىن (+34%)

سونىمەن قاتار، قىتايعا ەكسپورت كولەمى 1،8 ملن توننانى قۇراپ، وتكەن ماۋسىمعا قاراعاندا 27%-عا ءوستى.