الماتى. قازاقپارات -  الماتى اكىمى باۋىرجان بايبەك مۇمكىندىگى شەكتەۋلى جاندار كۇنى قارساڭىندا مۇگەدەكتەر ماسەلەلەرىمەن اينالىساتىن ۇكىمەتتىك ەمەس ۇيىمداردىڭ باسشىلارىمەن كەزدەستى. 
قالا باسشىسى الماتىدا ەرەكشە كۇتىمدى قاجەت ەتەتىن جاندارعا  الەۋمەتتىك قولداۋ كورسەتۋ ءۇشىن جىل سايىن جەرگىلىكتى بيۋدجەتتەن 3 ملرد. تەڭگەگە جۋىق قارجى بولىنەتىندىگىن ايتتى.

ونىڭ ايتۋىنشا، الەۋمەتتىك قىزمەتكەرلەر ءاربىر 43 مىڭ مۇگەدەكتىڭ سۇرانىسىن انىقتاپ، جەكە دارا كومەك كورسەتىپ كەلەدى. مۇمكىندىگى شەكتەۋلى مىڭنان استام بالاعا ارنايى الەۋمەتتىك قىزمەت ۇيدە  كورسەتىلەدى، 5 مىڭنان استام مۇگەدەك  مەديسينالىق-الەۋمەتتىك مەكەمەلەردە جانە كۇندىزگى ورتالىقتاردا ەمدەلەدى. 

اكىم قالانىڭ بارلىق كولىك تۇرلەرىندە مۇمكىندىگى شەكتەۋلى جاندارعا قولايلى جاعدايدىڭ جاسالعاندىعىن اتاپ ءوتتى. اۆتوبۋستاردىڭ تەڭ جارتىسىنا قوزعالىسى شەكتەۋلى ادامدارعا ارنالعان قوندىرعىلار ورناتىلعان.   ونىڭ ۇستىنە بۇل كولىكتەر ەكولوگيالىق جاعىنان تازا.   

«قالاداعى  ينفراقۇرىلىمدار مۇمكىندىگى شەكتەۋلى جاندار ءۇشىن قول  جەتىمدى بولۋى ءتيىس، اسىرەسە عيماراتتار، جولداردىڭ قۇرىلىسى كەزىندە، قوعامدىق كولىكتەردە باسا ەسكەرۋ كەرەك»،  - دەدى باۋىرجان بايبەك. 

اكىم  مۇمكىندىگى شەكتەۋلى جاندارعا الەۋمەتتىك  كومەك پەن قولداۋ كورسەتۋ جونىندەگى جوبالاردى  جۇزەگە اسىرۋعا مەملەكەتتىڭ، قوعامدىق ۇيىمدار مەن جەكە سەكتوردىڭ بىرىگىپ قاتىسۋى ماڭىزدى ەكەنىندىگىن  جەتكىزدى. 

«بۇگىنگى كۇنى الماتىدا شامامەن 23 مىڭ مۇگەدەك جۇمىس ىستەۋگە قابىلەتتى دەپ سانالادى. ولاردىڭ ىشىندە 6000 ادام  ەڭبەكپەن قامتىلعان. مۇمكىندىگى شەكتەۋلى جانداردى جۇمىسپەن قامتۋ «جۇمىسپەن قامتۋدىڭ جول كارتاسى 2020» جانە « قالانىڭ دامۋ باعدارلاماسى» جوبالارى، بوس جۇمىس ورىندارىنىڭ ارنايى جارمەڭكەلەرىن وتكىزۋ ارقىلى جۇزەگە اسۋدا»،  - دەپ اتاپ ءوتتى  باۋىرجان بايبەك. 

كەزدەسۋ بارىسىندا قالا اكىمى «قازاق سوقىرلار قوعامى» قوعامدىق بىرلەستىگى الماتى  فيليالىنىڭ ءتورايىمى نينا جۋكوۆسكاياعا، تۇركسىب اۋدانى «مۇگەدەكتەردىڭ ەرىكتى قوعامى» باسقارماسىنىڭ ءتوراعاسى كەنجەباي قۇدايبەرگەنوۆكە جانە «مەن سەنى سۇيەمىن، ءومىر» قوعامدىق قورىنىڭ قۇرىلتايشىسى مەرۋەرت سۇلەيمەنوۆاعا قۇرمەت گراموتالارىن تاپسىردى. 

دەرەككوز: قازاقپارات