استانا. قازاقپارات - ق ر مادەنيەت جانە سپورت مينيسترلىگىنىڭ تاپسىرىسى بويىنشا وڭتۇستىكقازاقستاندىق «ساق» كينوستۋدياسى قازاق حاندىعىنىڭ نەگىزىن قالاۋشى كەرەي مەن جانىبەك حاندارعا ارنالعان «قازاق ەلى» اتتى تولىق مەتراجدى انيماسيالىق فيلم تۇسىرۋدە.
بۇل تۋرالى بۇگىن ق ر پرەزيدەنتى جانىنداعى ورتاىق كوممۋنيكاسيالار قىزمەتىنىڭ وبلىستىق فيليالىندا وبلىستىق مادەنيەت باسقارماسى باسشىسىنىڭ ورىنباسارى اسىلحان تەمىرحان ءمالىم ەتتى، دەپ حابارلادى وقو اكىمىنىڭ باسپا ءسوز قىزمەتى.

ونىڭ ايتۋىنشا، تولىق مەتراجدى ءفيلمنىڭ پرەمەراسى وسى جىلدىڭ 16 جەلتوقسان كۇنى استانا قالاسىندا وتپەك. اتالعان ءفيلمنىڭ رەجيسسەرى «وڭتۇستىكفيلم» مەكەمەسىنىڭ ديرەكتورى باتىرحان داۋرەنبەكوۆ.

سونداي-اق، وڭتۇستىك قازاقستاندا قازاق حاندىعىنىڭ 550 جىلدىعىنا وراي «ۇلى دالا وسيەتى» اتتى كىتاپ جارىق كوردى. باسپا ءسوز ءماسليحاتىندا باسقارما باسشىسىنىڭ ورىنباسارى قازاق حاندىعىنىڭ تۋى تىگىلگەن - تاراز قالاسىندا وتەتىن مەرەيتويعا وڭتۇستىك قازاقستاننان ەكى جۇزگە جۋىق دەلەگات قاتىساتىنىن ايتتى. ايتۋلى مەرەيتوي تاراز قالاسىندا قازاننىڭ 7-9 كۇندەرى ارالىعىندا ەلباسى مەن شەتەلدىك قوناقتاردىڭ قاتىسۋىمەن وتەدى. «بىزدەن بارعان دەلەگات مۇشەلەرى مەرەكەلىك شارادا ءۇش كيىز ءۇي تىگىپ، جادىگەرلەردەن قۇرالعان جۇزدەن استام ەكسپوناتتاردى كورمەگە ۇسىنباق. سونىمەن قاتار وڭتۇستىكقازاقستاندىق ونەر مايتالماندارى اننەن شاشۋ شاشىپ، مىڭ بۇرالعان بيشىلەرىمىز بي بيلەمەك. وڭتۇستىك قازاقستان وبلىسى قازاق حاندىعىنىڭ 550 جىلدىعىنا تاراز قالاسىنا تارتۋى رەتىندە وڭتۇستىك قاقپانى قايتا قۇرىپ، ەكى بارەلەف ورناتتى. قاقپانىڭ تومەنگى قاباتىن گرانيتپەن، ەكىنشى قاباتى تراۆەرتينمەن قاپتالدى. ال كىرەبەرىس جاعىنداعى جوعارعى بۇرىشتارى بارەلەفپەن كوركەمدەلىپ، قاقپانىڭ ەكى جاق بەتىنە تروتۋار توسەلىپ، اباتتاندىرۋ جۇمىستارى جاسالدى. «قازاق حاندىعىنىڭ 550 جىلدىعىنا وراي وبلىستا تاريحي-مادەني جانە عىلىمي كونفەرەنسيالار سىندى 75 ءىس-شارا ءوتتى. ال، وڭىردەگى 8 كاسىبي تەاتردا وسى داتاعا ارنالعان قويىلىمدار قويىلدى»، - دەدى ا.تەمىرحان.

"قامشى" ىسلتەيدى

دەرەككوز: قازاقپارات