تاراز. قازاقپارات - تارازداعى تورتكۇل كەرۋەن سارايىندا قىتايلىق سيان قالاسىنان قازاق حاندىعىنىڭ 550 جىلدىعىن تويلاۋ قارساڭىندا شىعىپ، ءبىر جىلداي ۇلى جىبەك جولى بويىمەن جۇرگەن ەكسپەديسيانى قارسى الدى.
ەسكە سالا كەتەيىك، 2014 جىلعى قىركۇيەكتە سياننان ەجەلگى ساۋدا جولىمەن «جۇڭگو - قازاقستان: ۇلى جىبەك جولىنىڭ شاي مادەنيەتى» دوستىق جانە ىنتىماقتاستىق كەرۋەنى جىبەك جولىنىڭ ەكونوميكالىق بەلدەۋىن قۇرۋ يدەياسىن قولداۋ ماقساتىندا جولعا شىققان بولاتىن. كەرۋەن قۇرامىندا 55 تۇيە بار، بۇل قازاق حاندىعى قۇرىلۋىنىڭ 550 جىلدىعىن بىلدىرەدى. جۇزدەن استام كەرۋەنشىلەر تاڭ اۋلەتى داۋىرىندەگى كيىمدەر كيىپ، كۇزەتشىلەرى ەرتەدەگى ۇزىن ساپتى نايزالارمەن قارۋلانعان. كەرۋەن شەنسي پروۆينسياسىندا وسىرىلەتىن فۋسا ەمدىك شايىن اكەلدى.

قاشىقتىعى 7 مىڭ شاقىرىمنان اساتىن ساياحاتتى ۇيىمداستىرۋعا قازاقستاننىڭ دۇنگەن قاۋىمداستىعى مەن قىتايلىق «ي-زە فۋسا» كومپانياسى (سيان) نيەت تانىتتى.

«قازاق حاندىعىنىڭ 550 جىلدىعىنا ارنالعان شارالارعا قاتىسۋ مەن ءۇشىن ۇلكەن مارتەبە، - دەدى «ي-زە فۋسا» كومپانياسىنىڭ پرەزيدەنتى ما حىن گون. - قازاقستان پرەزيدەنتى مەن حالقىنا باقىت پەن دەنساۋلىق تىلەيمىن. ۇلى جىبەك جولىن جانداندىرۋ بويىنشا شارالار العا قويىلعان ماقساتتارعا جەتكىزەدى، ەلدەرىمىزدىڭ ساۋدا-ەكونوميكالىق ءدالىزىن جاڭارتىپ، قازاقستان مەن جۇڭگو اراسىندا ءوزارا ءتيىمدى جانە تاتۋ كورشىلىك قاتىناستى نىعايتاتىنىنا سەنەمىن».

تارازدىڭ باتىس بولىگىندە ورنالاسقان تورتكۇل كەرۋەن سارايىن 2008 جىلى ءا.مارعۇلان اتىنداعى ارحەولوگيا ينستيتۋتىنىڭ ماماندارى قازدى. 80 شارشى مەتر اۋماقتا قوناق ۇيلەر، مونشالار جانە ۇلى جىبەك جولىنىڭ كەرۋەن سارايلارىن قامتىعان بارلىق ينفراقۇرىلىمى بار ەجەلگى كەرۋەن سارايدىڭ قالدىقتارى تابىلدى.

2010 جىلى جۇرگىزىلگەن قالىپقا كەلتىرۋ جۇمىستارىنا قازىنادان 97 ملن. تەڭگە ءبولىنىپ، 5 مەترلىك قابىرعالار كوتەرىلدى، ىشكى ينتەرەر جاڭادان قۇراستىرىلدى.

دەرەككوز: قازاقپارات