شەتەلدىك ماركەتپلەيستەردەن تاپسىرىس بەرەتىندەر ءۇشىن ەرەجە وزگەردى. ەۋرازيالىق ەكونوميكالىق كوميسسيانىڭ كەڭەسى 200 ەۋرولىق ليميتتەن اسقان كەز كەلگەن ساتىپ الۋعا سالىقتى بۇكىل سوماعا ەسەپتەۋ تۋرالى شەشىم قابىلدادى.

نە وزگەردى؟

باجسىز شەك 200 ەۋرو دەڭگەيىندە قالدى. قۇنى 200 ەۋروعا دەيىنگى تاپسىرىستى قازاقستاندىقتار بۇرىنعىداي كەدەندىك تولەمسىز الا الادى.

قۇنى 200 ەۋرودان اسقان تاپسىرىسقا 5% كەدەندىك باج تولەنەدى، وعان قوسا ققس ەلدەگى قولدانىستاعى مولشەرلەمە بويىنشا ەسەپتەلەدى. ەڭ تومەنگى شەك رەتىندە باجدى كيلوگراممعا 1 ەۋرودان كەم ەسەپتەۋگە بولمايدى.

ماڭىزدى وزگەرىس ەنگىزىلدى: بۇرىن 200 ەۋرودان اسقان بولىكتەن عانا تولەم الىناتىن، ەندى سالىق پەن باج تاپسىرىستىڭ تولىق قۇنىنان ەسەپتەلەدى. 210 نە 300 ەۋرولىق سەبەت سول سەبەپتى قىمباتقا ءتۇسۋى مۇمكىن.

سالماق بويىنشا ليميت الىنىپ تاستالدى، ەسەپتەۋگە تەك تاۋاردىڭ قۇنى الىنادى. راسىمدەۋدى ساتىپ الۋشى ەمەس، جەتكىزۋ قىزمەتتەرى مەن ەلەكتروندى ساۋدا وپەراتورلارى جۇرگىزەدى.

بۇل ءتارتىپ ەاەو-عا كىرمەيتىن ەلدەردەن (مىسالى، جۇڭگو، اقش، ەۋروپا ەلدەرى) كەلەتىن تاپسىرىستارعا قاتىستى قولدانىلادى. وداق ىشىندەگى ماركەتپلەيستەردەن العان تاۋارلارعا جاڭا تالاپ جۇرمەيدى.

قاي تاۋارلار جەڭىلدەتىلگەن تارتىپكە كىرمەيدى؟

جەكە پايدالانۋعا جاتپايتىن بۇيىمدار جەڭىلدەتىلگەن ەلەكتروندى دەكلاراسيامەن راسىمدەلمەيدى. ولاردىڭ ىشىندە سولياريي جابدىقتارى، ىشتەن جاناتىن قوزعالتقىشتار، مەديسينالىق جيھاز، ويىن اۆتوماتتارى بار.

رۇقسات تارتىبىمەن اكەلىنەتىن جانە اكەتىلەتىن تاۋارلار جەكە كورسەتىلدى: قارۋ-جاراق پەن ءوق-دارى، جانۋاردىڭ قازبا سۇيەكتەرى، ءقاۋىپتى قالدىقتار.

الكوگول مەن تەمەكى ونىمدەرىنە، قولما-قول اقشاعا، اۋە جانە سۋ كولىكتەرىنە، سونداي-اق جەكەلەگەن كولىك تۇرلەرى مەن ولاردىڭ شاسسيىنە جەڭىلدىك جۇرمەيدى.

قاشان كۇشىنە ەنەدى؟

سىرتقى ەلەكتروندى ساۋدا ارقىلى كەلەتىن تاۋارلاردى اكەلۋدىڭ جاڭا ءتارتىبى 2026 جىلعى 1 شىلدەدەن باستاپ كۇشىنە ەنەدى.

نەگە مۇنداي قادام جاسالدى؟

بۇعان دەيىن شەتەلدەن ونلاين الىنعان تاۋارلار جەكە پايدالانۋ زاتىنا تەڭەستىرىلىپ كەلدى. وسىنى پايدالانىپ، كەيبىرى ءونىمدى توپتاپ اكەلىپ، سالىق تولەمەي قايتا ساتۋمەن اينالىستى. بيۋدجەت كىرىسى ازايدى، ىشكى ساتۋشىلار شەتەلدىك پلاتفورمالارمەن تەڭ جاعدايدا باسەكەلەسە المادى.

جاڭا ءتارتىپ «ەلەكتروندى ساۋدا تاۋارلارى» دەگەن بولەك سانات ەنگىزىپ، ەرەجەنى ايقىندايدى: 200 ەۋروعا دەيىن — باجسىز، ودان جوعارى — باج بەن ققس تولىق قۇننان. ماقسات — جەكە ساتىپ الۋدى كوممەرسيالىق اكەلىمنەن ايىرىپ، «كولەڭكەلى» يمپورت ۇلەسىن قىسقارتۋ جانە نارىقتاعى باسەكەنى تەڭەستىرۋ.

بۇل تۋرالى Qamshy.kz اقپارات اگەنتتىگى حابارلايدى.