ۋكراينادا وقىپ جۇرگەن «بولاشاق» ستيپەندياتتارى قازاقستانعا ورالدى. بۇل تۋرالى «قازاقپارات» تىلشىسىنە «حالىقارالىق باعدارلامالار ورتالىعى» اق-دان حابارلادى.
ايتا كەتەيىك، «حبو» اق قازاقستانداعى «بولاشاق» باعدارلاماسىنىڭ نەگىزگى وپەراتورى بولىپ تابىلادى.
«كييەۆ قالاسىندا ۋكراينا ۇلتتىق تەحنيكالىق ۋنيۆەرسيتەتىندە، كييەۆ پوليتەحنيكالىق ينستيتۋتىندا 7 ستيپەنديات «بولاشاق» باعدارلاماسى بويىنشا ءبىلىم الىپ جاتىر. تارتىپسىزدىكتەر ورىن الىپ جاتقان كەزەڭدە ولارعا تۇراتىن جەرلەرىنەن شىقپاۋعا كەڭەس بەرىلگەن بولاتىن. قازىرگى ۋاقىتتا ستۋدەنتتەر قازاقستانعا ورالدى جانە مىندەتتى وندىرىستىك تاجىريبەدەن وتۋدە»، - دەلىنگەن حابارلامادا.
«حبو» اق ءمالىم ەتكەنىندەي، 7 ستۋدەنتتىڭ بارلىعى 2009 جىلى باكالاۆريات بويىنشا وقۋعا بارعان. قازاقستان كونسۋلى دەنيس كيمنىڭ بەرگەن اقپاراتى بويىنشا، ۋكراينادا 177 قازاقستاندىق ستۋدەنت وقىپ ءجۇر. جالپى قازىرگى ۋاقىتتا ۋكراينادا 1287 قازاقستان ازاماتى تۇراقتى مەكەنجاي بويىنشا تۇرىپ جاتىر.
"قازاقپارات"
