سوچيدە 23 اقپاندا وليمپيادا الاۋى ءسوندىرىلىپ، قىسقى سپورت ويىندارىنىڭ جارىسى اياقتالدى. فيشت ستاديونىندا وتكەن وليمپيادانىڭ جابىلۋ سالتاناتىندا ماسكەۋ تەاترىنىڭ بالەت توبى ونەر كورسەتىپ، كومپوزيتور راحمانينوۆتىڭ شىعارماسى ورىندالدى، سپورتشىلار پارادى ءوتتى. حالىقارالىق وليمپيادا كوميتەتىنىڭ پرەزيدەنتى توماس باحتىڭ ايتۋىنشا، سوچيدە سپورتشىلار مەن جانكۇيەرلەر ءۇشىن "ەرەكشە جاعداي" جاسالدى. باح سپورت ارەنالارى، وليمپيادا قالاشىعى ساپاسىن جوعارى باعالاپ، وليمپيادانىڭ "ءمىنسىز ۇيىمداستىرىلعانىن" ايتتى. وليمپيادانىڭ دايىندىعىنا 51 ميلليارد اقش دوللارىن جۇمساعان رەسەي بيلىگى ويىندار حالىقارالىق دەڭگەيدە ەلدىڭ جاڭا بەينەسىن قالىپتاستىرۋعا سەپتىگىن تيگىزگەنىن مالىمدەدى. رەسەي وليمپيادا قورىتىندىسىندا مەدال سانى بويىنشا 33 مەدال، ونىڭ ىشىندە 13 التىن جۇلدەمەن ءبىرىنشى ورىندى يەمدەندى. رەسەيدەن كەيىنگى ەكىنشى جانە ءۇشىنشى ورىنداردى نورۆەگيا مەن كانادا الدى. كەلەسى قىسقى وليمپيادا ويىندارى 2018 جىلى وڭتۇستىك كورەيانىڭ پحەنچحان قالاسىندا وتەدى.

ازاتتىق راديوسى