ساۋد ارابياسى باستاعان كواليسيا يەمەن استاناسىنداعى زاعيپتار مەن كوزى ناشار كورەتىن جاندارعا ارنالعان ورتالىقتى بومبالادى، - دەپ حابارلايدى «قامشى» پورتالى 24-ارناعا سىلتەمە جاساپ.

بۇدان باسقا، حالىقارالىق اسكەري وداق ۇشاقتارى وسى ەلدىڭ ساۋدا پالاتاسىنىڭ باس كەڭسەسىن دە تالقانداعان. ابىروي بولعاندا، ادام شىعىنى جوق. بۇل ورتالىق دۇنيەجۇزىلىك بانكتىڭ قارجىسىنا اشىلعان ەكەن. ءبىراق سانا قالاسىنىڭ حالقى كواليسيا كۇشتەرىنىڭ شيىتتىك بۇلىكشىلەر – حۋسيتتەر بەكىنگەن جەرلەردى عانا ەمەس، بالالار بار ورىنداردى، تۇرعىن ۇيلەر مەن جانۋارلاردى دا اۋە سوققىسىنىڭ استىنا الىپ، اياۋسىز قىرىپ جاتقانىن ايتادى. اشىنعان جۇرت نارازىلىقتارىن ەرەۋىلگە شىعىپ بىلدىرۋدە. اۋە شابۋىلدارى باستالعان وتكەن جىلدىڭ تامىزىنان بەرى 3 مىڭعا جۋىق بەيبىت تۇرعىن قازا تاۋىپ، 5 مىڭنان استامى جاراقات العان.