تىرەلەك...
اۆتوكولىك اڭگىمەگە ەلتىپ كەتكەندەي ەكپىندەي زاۋلاپ كەلىپ، ءجۇرىسىن باياۋلاتتى دا ءسال كىدىرىڭكىرەپ بارىپ، ءبىر كوشەگە بۇرىلىپ، قايتا زىمىراي بەرىپ كىبىرتىكتەدى.
- ويبۇي، الدىمىز «تۋپيك» ەكەن عوي، قۇرمەتتى جولاۋشىم،- دەدى تىزگىنشى.
- «تۋپيك» - قازاقتىڭ ءسوزى ەمەس،-دەدى جولاۋشى.
- ارينە. قازاق «تۋپيك» دەمەيدى... مۇمكىن، «كەپتەلەك» دەگەن سوزگە ۇيقاستىرىپ «تىرەلەك» دەرمىز.
- نەسى بار. تابىلعان ءسوز. جول جوندەۋمەن اينالىسىپ جاتقاندار جۇمىسى بىتكەنشە كولىك ءوتىپ كەتپەس ءۇشىن جولعا قولدان جاسالعان كەدەرگىلەر قويادى. كولىگىڭىز سوعان كەلىپ تىرەلەدى دە كەرى قايتادى نەمەسە باسقا جاققا بۇرىلىپ كەتەدى. سول ۋاقىتشا «تۋپيكتى» «تىرەلەك» دەسە تىلگە تومپاقتىعى جوق.
- «توسقاۋىل» دەسەك بولماي ما؟
- جوق بولمايدى...
- نەگە؟
- توسقاۋىل الدەكىمدى نەمەسە الدەنەنى توسۋ ماقساتىندا جاندى نارسەدەن دە قويىلادى. ال جاڭاعى ءسىز ايتقان تىرەلەك تەك جانسىز زاتتاردان عانا ورناتىلادى...
- سوندا «تۋپيكتىڭ» قازاقشاسى نە بولدى؟
- جولدىڭ ءبىتىپ، تۇيىقتالعان، ودان ءارى جۇرۋگە بولمايتىن جەرىن قازاق بۇرىننان «تىعىرىق» دەيدى!
ءاينالوت
كوشىر جىگىت ءبىر جولاۋشىنى كولىگىنە مىنگىزىپ الدى دا زاۋلاي جونەلدى.
- قايدا باراسىز؟
جولاۋشى:
- كوشىر بالا، قازاق ۇلتتىق ۋنيۆەرسيتەتىنە... تيميريازيەۆ كوشەسىمەن....-دەدى - - ول كوشەمەن تۋرا جۇرە المايمىز... وبەزد ارقىلى بارامىز..
- «وبەزد» دەگەن نەمەنە؟
- تيميريازيەۆ كوشەسىمەن ءبىر دوكەي وتپەكشى. بىزگە جۇرۋگە بولمايدى. سوندىقتان، باسقا كوشەمەن اينالىپ بارامىز.
- ە...ە... وندا «وبەزد» دەگەنىڭىز «ءاينالوت» بولدى عوي...
- مۇمكىن، «اينالىس» دەگەن دۇرىس شىعار...
- بۇل ءسوزىڭىزدىڭ ماعىناسىندا قوسىمشا تاعى ءبىر ارەكەتتى بەرەتىن ۇعىم بار. ول بەلگىلى ءبىر ىسپەن شۇعىلدانۋ ماعىناسى. مىسالى، «سەن سپورتپەن اينالىس» دەگەندەگىدەي... بىزگە كەرەگى - جول جۇرۋگە قاتىستى شارتتى بەلگى مەن ەرەجەنىڭ اتالىمدىق ءمانى.
- وندا «اينالما» دەسەك شە...
- بولمايدى. الدىڭىزعا جول تاقتاسىنا «اينالما» دەپ جازىپ قويسا، ءسىز اينالماۋ كەرەك ەكەن دەپ كەرى كەتىپ قالۋىڭىز مۇمكىن عوي... سوندىقتان «اينالىس»، «اينالما» دەگەن ەتىستىكتەردەن زات ەسىم جاساپ اۋرە بولعانشا، باسى اشىق «ءاينالوت» (اينال+ءوت) دەگەن بىرىككەن ءسوزدى قولدانعان دۇرىس!
(جالعاسى بار)
پىكىر قالدىرۋ