«Astana» arnasyndaǵy “Syrlasý” baǵdarlamasyna qonaqqa kelgen ánshi Dastan Orazbekov Tóreǵalı Tórálige qarata syn aıtqan bolatyn. Efırde áriptesiniń ónerin “plagıatqa” teńegen Dastan jankúıerler tarapynan synǵa qaldy, - dep habarlaıdy «Qamshy» portaly NUR.kz-ke silteme jasap.

Ánshiniń pikirin talqyǵa salǵandar ekige jaryldy. Biri Dastannyń sózin qoldap jatsa, endi bireýleri Tóreǵalıdyń ónerine shań jýytpaǵan.

“Kózi qaraqty kórermen, óz qundaryńyzdy nege túsiresizder? Dastanǵa 80 adam jınalsa da jandy daýysta án aıtty. Al Tóreshterińiz 3000 adamdy jınap alyp, fonagrammada án saldy. Ánderine sózim joq. Qazaqı jaqsy ánder. Talǵamǵa saı án tańdaıdy, biraq halyqtyń aldynda ter tókpeıdi. Halyq bılettiń qunyna qaramaı keshke aǵylady, al ol… óte ókinishti. Dastan ony tikeleı jamandamady, syn aıtty. Árbir syndy kórealmaýshylyq dep túsinsek óner damymaıdy. Halyq úshin jasap jatyrmyz degen jattandy sóz. Al, Dastan ózindik úni bar, harızmasyn qalyptastyrǵan. Sóıleýge tolyq qaqysy bar”, – dep aqtady ánshini ǵalamtor qoldanýshysy.

Al endi biri mundaı pikirge qarsy jaýabyn berip úlgerdi, tipti “Orda” tobynyń ánshisi senimin aqtamaǵanyna renjidi.

“Dastan, siz maǵan unaıtyn edińiz! Biraq, Tóreǵalıǵa syn keltirip, siz týraly pikirim ózgerdi! Tóreǵalı – aıtysker aqyn, jap-jaqsy jigit! Ol ózgeniń ánin urlamas edi. Kóre almaısyz!”, – dep keıidi Baǵdat Jadyra esimdi qoldanýshy.

Al ánshiniń sózi úlken daýǵa ulasqanyn baıqaǵan keı jazylýshylar sóz talastyrýshylardy sabyrǵa shaqyrdy.

“Dastan durys aıtty. Artyq eshteńe aıtpady. Onyń qadir-qasıeti týraly áńgime aıtýdyń qajeti joq. Ár ánshiniń óz tyńdarmany bar. Tóreǵalıdy da jaman demeımin. Qazaq sahnasynda jaqsy ánshiler bireý ǵana bolmaý kerek shyǵar. Barlyǵy talantty. Dastan da, Tóreǵalı da tilin shaınap júrgen Saılaýbekten jaqsy. Biri toıdy kóterip júrse, ekinshisi shetelde qazaq namysyn qorǵap júr”, – dedi taǵy bir ǵalamtor paıdalanýshysy.

Derekkóz: juldizdar.kz