Jambyldyq Berik Ábilhanuly oblystaǵy erekshe adam. Onyń ereksheligi qulaǵymen kir tasyn kóterip, kólik súıreıdi. Talas aýdany, Qarataý qalasynyń turǵyny qalalyq sport mektebinde shahmat jáne doıby oıyndary boıynsha bapker, - dep jazady STAN.KZ.
Berik Ábilhanulynyń ózgelerden ereksheligi 26 kelige deıingi kir tastaryn qulaǵymen kóterip, qulaǵymen kólik te súıreı beredi. Á degende tisimen 10 kelilik kir tasyn kóterip kórgen azamat, ýaqyt óte kele áýeli 16, sodan keıin 2 kelilik kir tastaryn qulaǵyna jip arqyly ilip kóterip jattyǵady.
Bul ádisi iske asqan soń kóńili kólik tartyp kórýge aýa bastaıdy. Alǵashynda bul istiń qanshalyqty nátıjeli bolatynyna senimsiz bolǵandyqtan, ishki oıyn tis jaryp eshkimge aıtpapty. Qaltasyna jipterin salyp tysqa shyǵyp kólik izdeıdi. Sóıtip tasada turǵan «Jıgýlı» avtokóligine kózi túsedi. Qulaǵyna jip ilip, tartyp kórgende kólik alǵa júrip ketpegenimen, ornynan qozǵalǵandaı bolady.
«Keıin táýekelge bel býyp ákimshilik ǵımaratynyń aldynda jınalǵan jurtshylyqtyń kózinshe bir kólikti 3 metrge deıin qulaǵymmen súırep kórdim. Kópshilikpen qosa ózim de tań qaldym. Qazir jattyǵýlardyń arqasynda 3-5 metrge deıin tartaberemin. Jattyǵýlardyń,daıyndyqtyń arqasynda osyndaı isti jasaı aldym»,-deıdi Berik Ábilhanuly.
Berik Ábilhanuly óziniń eshkim qolǵa alyp, daıyndalyp kórmegen ispen aınalysýyna neniń túrtki bolǵany jaıly baıandap berdi.
«Meniń osyndaı erekshelikke qyzyǵýym 17 jasymda bastaldy. Oblys ortalyǵynda bir orys jigittiń beltemirde shyr aınalyp kórsetken ónerine tań qaldym. Janymda turǵanaǵam sol kezde meniń sportqa endi qyzyǵyp júrgenimdi biletin. «Azdap daıyndalsań mundaı is seniń de qolyńnan keledi» dep jigerlendirip qoıdy. Rasymen ne bári 5 aıdyń ishinde jańaǵy orys jigit istegen áreketter men qımyldardy qaıtalaıtyn boldym»,-deıdi Berik Pyshanov.
Berik Ábilhanulyn aýyldastary «Qurysh qulaqty Berik» dep ataıdy eken. Azamattyń qulaǵyn jattyqtyryp, osyndaı kúshke ıe bolýyna ákesi sebepshi bolypty.
«Ákem dánekerleýshi bolyp jumys isteıtin. Sodan, jasymyzǵa qaraı túrli salmaqta kóterip shynyǵatyn kir tastaryn jasap beretin. Sony kóterip,shynyǵyp óstik. Ony qulaqpen kóterýge kelsek, men oıyma túsken isti jasap kórdim. Aldymen jeńil samaqtaǵy shelekterdi qulaǵymmen kóterdim. Qarasam bolatyn sıaqty. Sodan jattyǵyp, kóteretin zatyma kún sanap azdap salmaq qosyp otyrdym. Mine sońy jeńil kólikti kóterýge jettim. Men bul arqyly tárbıemdegi balalarǵa, neni kózdeseń de naqty maqsatqa talmaı jattyqsań jetýge bolady degim keledi. Soǵan úıretkim keledi»,-deıdi erekshe óner ıesi.
Búginde úsh qyz, eki ul tárbıelep otyrǵan Berik Pyshanovtyń bir balasy óziniń ónerin jalǵastyryp júr. Ol de qulaǵymen kir tasyn kóteredi eken.
Shynyǵyp, shymyr bolýdy kózdegen azamat qystyń kózi qyraýda ózenniń muzdaı sýyna shomylýdy da ádetke aınaldyrypty. Bul azamattyń taǵy bir ereksheligi ol eshqashan uıaly telefon qoldanbaıdy eken.
Pikir qaldyrý