Qarýly Kúshterdiń Joǵarǵy Bas Qolbasshysy – Qazaqstan Respýblıkasynyń Prezıdenti Nursultan Nazarbaevtyń tóraǵalyǵymen ótken keńeske mınıstrliktiń jáne QR QK Bas shtabynyń basshylyǵy, departamentter men bas basqarmalar bastyqtary, ásker túrleriniń bas qolbasshylary men qolbasshylary qatysty, - dep habarlaıdy Aqordanyń baspasóz qyzmeti.
Memleket basshysy eldiń qorǵanys qabiletin nyǵaıtý máselesine árdaıym zor kóńil bólinetinin atap ótti.
– Qazaqstandyqtar armıanyń jaýyngerlik qabilettiligine jáne óz mindetteri men Joǵarǵy bas qolbasshynyń buıryqtaryn oryndaı alatynyna senimdi bolýǵa tıis. Sońǵy jyldary armıany qarjylandyrý barynsha artty, úshjyldyq búdjet jıyntyǵy bir trıllıon teńgege jaqyndady. Al bul tipti Eýropanyń baı elderi áskerı shyǵyndaryn ǵana emes, áleýmettik baǵdarlamalaryn qysqartýǵa májbúr bolyp otyrǵan álemdegi ekonomıkalyq jaǵdaılardyń qazirgideı qıyn kezindegi jaǵdaı. Memleket qarýly kúshter men áskerı qyzmetshiler úshin barlyǵyn jasaýda. Tek ótken jyly ǵana 7 myńǵa jýyq áskerı qyzmetshi turǵyn úımen qamtamasyz etildi, 5430 adamǵa turǵyn úı jaldaýǵa ótemaqy tólendi. Qarýly kúshter ofıseriniń aqshalaı úlesiniń ortasha mólsheri – 170 myń teńge. Áskerı qyzmetshilerdi zeınetaqymen qamtamasyz etý – el azamattarynyń barlyq sanaty arasynda eń joǵary deńgeıde. Mundaı qamqorlyqqa jaýap retinde Qazaqstan halqy armıamyzdan – joǵary jaýyngerlik daıyndyq, al áskerı qyzmetshilerden – kirshiksiz tazalyq kútýge quqyly, – dedi Nursultan Nazarbaev.
Qazaqstan Prezıdenti mınıstrliktiń ortalyq apparatynyń jáne óńirlik qolbasshylyqtyń, ártúrli ásker túrleriniń jetekshileri qoıǵan mindetterdi oryndaýda halyq aldynda jaýapty ekenine nazar aýdardy.
– Biz áskerı ónimdi tek Reseıden emes, ózge elderden de satyp alamyz. Armıanyń álemdik sanattaǵy ozyq úlgilerdi qoldana otyryp, qaıta jaraqtanýǵa múmkindigi bar. Biz bul baǵytta eshkimnen artta qalýǵa tıis emespiz. Eldiń áskerı-ónerkásiptik kesheni tikushaqtar, áskerı optıka, radıolokasıa jáne radıoelektrondy kúres júıelerin qurastyrýǵa kiristi, sondaı-aq áskerı-teńiz floty úshin kemeler jasalýda, avıasıalyq jáne brondy tehnıka jóndeý isi uıymdastyrylǵan. Biraq bul da jetkiliksiz, ol jumys aıasyn keńeıte túsý kerek, – dedi Qazaqstan Prezıdenti.
Memleket basshysy jańa qorǵanys zaýyttaryn salý eldiń ındýstrıalyq damýynyń mańyzdy baǵytynyń biri ekenin aıtty.
– Áskerı zaýyttar jumysy esebinen ózge salalar da damıdy, sondaı-aq ekonomıkanyń basqa sektorlarynan tapsyrystar túse bastaıtyn bolady. Sondyqtan Qorǵanys mınıstri Úkimetpen birlesip, qandaı nysandar salatynymyzdyń aıqyn josparyn jasaýǵa tıis. Máselen, patrondar men snarádtar óndirisi máselelerin keıinge qaldyrýǵa bolmaıdy. Áskerı-tehnıkalyq jańǵyrtý qarqynyn odan ári údete túsip, armıamyzdyń qaıta jaraqtandyrylýy úderisin jandandyrý qajet. Tek qarýly kúshterdi ǵana emes, quqyq qorǵaý organdary men arnaýly qyzmetterdi de qamtamasyz etý úshin eldiń áskerı-tehnıkalyq kásiporyndary shyǵaratyn ónimder nomenklatýrasyn odan ári keńeıtken jón, – dedi Nursultan Nazarbaev.
Memleket basshysy Qarýly kúshter qataryndaǵy kadr jumysyna ózgerister engizý qajettigine nazar aýdardy.
– Qarýly kúshterdiń negizi – ofıserler, serjanttar, ıaǵnı óz ómirin sanaly túrde Otanyna qyzmet etýge arnaǵan adamdar. Tárbıelik jáne patrıottyq jumystardy jetildirý, soldattan generalǵa deıingi moraldyq rýhty kúsheıtý jóninde qosymsha sharalar qabyldaý qajet, – dedi Qazaqstan Prezıdenti.
Sońynda Nursultan Nazarbaev qarýly kúshterdi damytýǵa nazar aýdarý árbir memlekettiń paryzy ekenin atap ótti jáne mınıstrliktiń búkil áskerı quramynyń qyzmetine tabys tiledi.
Pikir qaldyrý