Syrtqy ister mınıstri

E.Ydyrysovtyń,

Mádenıet jáne aqparat mınıstri

M.Qulmuhammedtiń,

Bilim jáne ǵylym mınıstri

A.Sárinjipovtyń,

«Qazaqstan» teleradıokorporasıasynyń

tóraıymy N.Muhamedjanovanyń

nazaryna!

Jer betinde álemdegi barsha qazaqtyń jalǵyz Otany bar. Ol – Qazaqstan. Táýelsizdik alǵan alǵashqy jyldarda-aq, osyny jete sezingen prezıdent N.Nazarbaev ózge elderde etnıkalyq azshylyq bolyp tabylatyn sheteldegi qazaqtardyń salt-sanasyn, tilin, dástúrin saqtaý, qorǵaý, damytý isin únemi basty nazarda ustap keledi. Bul sózimizge, Elbasynyń 2014 jyldyń 21 qańtaryndaǵy № 741 jarlyǵymen bekitilgen «Qazaqstan Respýblıkasy syrtqy saıasatynyń 2014 – 2020 jyldarǵa arnalǵan tujyrymdamasy» atty qujat naqty mysal bola alady.

Atalǵan qujattyń «Qazaqstan Respýblıkasy syrtqy saıasatynyń maqsattary» bóliminde: «shet elderdegi qazaq dıasporasyna jáne qazaq tiline qoldaý kórsetý» jáne Qazaqstan «shet elderdegi qazaq qaýymdastyqtary shoǵyrlana turyp jatqan jerlerde qazaq tili men mádenıetin, olardyń tarıhı otanymen baılanysyn damytýdy qoldaıtyn bolady» týraly taıǵa tańba basqandaı anyq jazylǵan.

Prezıdent jarlyǵymen bekitilgen osy tujyrymdamaǵa sáıkes, «shet elderdegi qazaq dıasporasyna jáne qazaq tiline qoldaý kórsetý» maqsatynda Syrtqy ister mınıstrligi, Mádenıet jáne aqparat mınıstrligi jáne «Qazaqstan» teleradıokorporasıasy birqatar aqparattyq jumystardy qolǵa alýǵa tıisti dep bilemiz.

Birinshiden, ótken jyly «Qazaqstan» teleradıokorporasıasy tóraıymy Nurjan Jalaýqyzynyń batyl bastamasymen qolǵa alynyp, tuńǵysh Naýryz merekesi kezinde Mońǵolıa qazaqtary tikeleı efır arqyly Atajurttaǵy – Qazaqstandaǵy qandastarymen ulyq merekeni birge toılaıdy.

«Qazaqstan» ulttyq arnasynyń osy bir ıgi bastamasyn jyl saıynǵy dástúrge aınaldyryp, sheteldegi qazaqtardyń Naýryz meıramynda tikeleı efır arqyly elmen qaýyshyp, Jańa jyldy birge qarsy alýyn jalǵastyra otyryp, tek Mońǵolıa emes, Qytaı, Túrkıa, Eýropa, Reseı jáne basqa elderde turyp jatqan qandastar arasynda da merekelik tikeleı efır jasalýy kerek. 2013 jylǵy Naýryz merekesinde uıymdastyrylǵan «Qazaqstan» ulttyq arnasynyń tikeleı efıri bıylda jasalsa degen ótinish hat Mońǵolıadaǵy Baıan-Ólgıı aımaǵyndaǵy memlekettik jáne úkimettik emes birqatar uıymdar basshylarynyń atynan «Qazaqstan» teleradıokorporasıasy tóraıymy Nurjan Jalaýqyzynyń atyna joldanypty. Hat redaksıa poshtasyna kelip túsip, ony jarıalap otyrmyz (5-6 sýretterdi kórińiz).

Ekinshiden, «Qazaqstan Respýblıkasy syrtqy saıasatynyń 2014 – 2020 jyldarǵa arnalǵan tujyrymdamasynyń» «Qazaqstan Respýblıkasy syrtqy saıasatynyń basymdyqtary men mindetteri» bóliminde: «Qazaqstan óziniń ulttyq múddelerine saı keletin ári praktıkalyq turǵydan paıda ákeletin halyqaralyq jáne óńirlik uıymdardyń jumysyna qatysady» dep kórsetilgen. Endeshe, sheteldegi qazaqtardyń tilin, salt-dástúrin saqtaýǵa, ony damytý men nasıhattaýǵa aqparattyq kómek berý arqyly shekara syzyǵy bólip jatqan baýyrlarymyzǵa Qazaqstannyń qamqorlyǵy men kómegin naqty kórsete alamyz. Iaǵnı, Syrtqy ister mınıstrligi, Mádenıet jáne aqparat mınıstrligi jáne «Qazaqstan» teleradıokorporasıasy ózara is-qımyl biriktire otyryp, shetelderde turyp jatqan qazaqtardyń tynys-tirshilig, oqý bilimi, mádenıeti men salt-sanasy, olardyń ulttyq kelbetin saqtap qalý úshin júrgizip kele jatqan jumystaryn jan-jaqty kórsetip, nasıhattaý úshin derekti fılmder sıklyn uıymdastyrý;

Tujyrymdamada aıtylǵan: «Shetelderdegi qazaq qaýymdastyqtary shoǵyrlana turyp jatqan jerlerde qazaq tili men mádenıetin, olardyń tarıhı otanymen baılanysyn damytýdy qoldaıtyn bolady» degen naqty tapsyrmany eskere otyryp, týǵan tilinde bilim aýldan qol úzip bara jatqan sheteldegi qandastardy qoldaý maqsatynda mektepter salyp, qazaq tiliniń saǵatyn kóbeıtý, oqýlyqtar, kórkem ádebı kitaptarmen júıeli túrde qamtamasyz etip otyrý máselesinde Bilim jáne ǵylym mınıstrligi óz josparyna engizýi tıis.

Sheteldegi qazaqtardyń assımılısıaǵa ushyrap jatqandyǵyn eskere otyryp, keshendi mádenı-aǵartý is-sharalary iske asyrylýy qajet. Jáne sheteldegi qazaqtardyń aqparattyq quraldarymen tyǵyz baılanysyp ornatylyp, birlesip jumys isteý júıesi qurylýy kerek dep sanaımyz!

Prezıdent N.Nazarbaevtyń pármenimen qolǵa alynyp, arnaıy jarlyqpen bekitilip, kúshine engen tujyrymdamada kórsetilgen tapsyrmalar jáne sony negizge ala otyryp, aıytlǵan joǵarydaǵy usynystar Syrtqy ister mınıstrligi, Mádenıet jáne aqparat mınıstrligi,  Bilim jáne ǵylym mınıstrligi jáne «Qazaqstan» teleradıokorporasıasynyń nazaryna tys qalmaıdy degen úmittemiz!

Mońǵolıa qazaqtarynyń haty

Abai.kz