ANAǴA, ANAǴA, ANAǴA, taǵy da ANAǴA... Jaqsylyq jasa! Odan keıin ǵana asqar taýdaı ákeńe qol ushyn soz. Otbasynyń altyn tiregi, birden-bir saıaly báıteregi, qyzǵyshtaı qoryǵan qamqorshysy ári aýzyndaǵysyn jyryp beretin asyraýshysy – ákege emes, eń aldymen, asylym dep ardaqtaıtyn anaǵa kóńil ból! Toǵyz aı, toǵyz kún kóterip, tún uıqysyn tórt bólip seni ómirge ákelgen anańdy qurmette, jas urpaq! Tar qursaǵyn keńitken, tas emshegin jibitken ana meıirimi adam sanasyndaǵy eshbir ólshemniń aıasyna syımaıtynyn túsinesiń be?! Alpys eki tamyryn ıdirip, kindik qanyńdy tamshylatyp, alaqanyna aıalap kótergen alǵashqy ana qýanyshynan, árıne, sen beıhabarsyń! Óıtkeni, ol kezde saf aýany endi ǵana jutqan álsiz shaqalaqtyń biri ediń. Sen qorǵasyndaı balqyǵan, jibekteı sýsymaly, jylap emeýrin tanytyp, jylap tuıaq serpıtin, saı-súıegiń áli qatpaǵan náp-názik sábısiń ol ýaqytta. Tamshydan tán túzgen qudireti kúshti Allaǵa shek bar ma, shirkin. Ananyń meıirimi men ananyń qýanyshyn sen táı-táı basyp, qaz-qaz turǵanda da, oıynnan qol bosamaı, shańǵa bógip asyr salǵanda da, qolyńa qalam ustap, qara tanyǵanda da, kóp kásiptiń birine kóńil bólip, jaýapty qyzmetke qol jetkizgende de, sezine almadyń, bálkim. Iá, biz óte álsiz jaratylyspyz. Qazaq qyzynyń kóz jasyna, qazaq áıeliniń muńyna, qazaq anasynyń nalasyna ilikpeıik, erkek kindikti qaýym! Qyz – bizdiń órimdeı sulý talshybyǵymyz. Áıel – sútteı uıyǵan otbasynyń berekesi. Ana – baýyr eti balasy úshin janyn qıatyn meıirim ıesi. Áje – elimizdiń erteńin qalyptastyratyn jas urpaqtyń aqylshysy ári rýhanı tárbıeshisi. Osyndaı uly uǵymǵa ıe áıelder qaýymyn qalaısha qurmettemeısiń? Qalaı ǵana olarǵa kóz satyp qarap, bir sáttik nápsiniń qurbany etesiń? Júsip Balasaǵun shegelep aıtyp ketken «áıeldiń jalǵyz jetistigi – daq túspegen aryna» jaýapkershilikpen qaraıyq! Buqar jyraý jyrlaǵandaı, «qyzda qylyq bolmasa, qur shyraıdan ne paıda?» Ǵabıt Músirepovtiń kórkem oıyndaǵy tózimdi, meıirimdi, parasatty, uıatty analar jasasyn! Boıjetkenge, jarǵa, anaǵa jáne qart ájege degen kózqaras túzelmeı, qoǵamnyń názik janǵa degen peıili tazarmaı, tal besiktegi talshybyqtyń bolashaǵy bulyńǵyr. Búgingi jas býyn adamgershiliktiń osyndaı asyl qaǵıdasyn qaperinde ustasa...

Qýanysh Tuńǵatar