Qazaqstandaǵy adam quqyǵy jónindegi ókil Asqar Shákirov 2015 jyldyń qorytyndysy boıynsha Memleket basshysyna usynǵan esebinde osylaı degen. Bul týraly «Qamshy» portaly habarlaıdy.

Memleket basshysyna usynylǵan qujatta eldegi adam quqyǵyna qatysty ahýalǵa, sonyń ishinde azamattardan túsken aryzdardyń, quqyq qorǵaý jónindegi jobalardyń, óńirlerdegi monıtorıńtiń, sondaı-aq memlekettik organdardyń, úkimettik emes jáne halyqaralyq uıymdardyń aqparattary negizinde saraptama jasalǵan.

Esepte Qazaqstandaǵy adam quqyǵy salasyndaǵy ózekti problemalar anyqtalyp, olardy sheshý joldary usynylǵan.

Atap aıtqanda, Ombýdsmenge esepti kezeńde adam quqyǵyn qorǵaý máseleleri boıynsha jazbasha jáne aýyzsha 1340 aryz túsken, olardyń basym kópshiligi Astana jáne Almaty qalalarynan, Qaraǵandy, Almaty jáne Shyǵys Qazaqstan oblystarynan joldanǵan.  

Azamattar óz quqyqtary kóbine quqyq qorǵaý organdary tarapynan, sottardyń áreketi men sheshimderine, penıtensıarlyq organdarǵa, sondaı-aq memlekettik ákimshilendirý kezinde buzylǵanyna shaǵym jasaǵan. Bul jaıttar «100 naqty qadam» Ult jospary arqyly sheshimin tabý kózdelgen problemalarmen tolyq sáıkesedi.

İs júrgizýge alynǵan árbir shaǵymǵa baılanysty másele belgilengen tártippen qaralyp, sonyń 18,9%-y boıynsha quqyq buzylý derekteri rastaldy jáne is quqyqty qalpyna keltirýge deıin jetkizildi.

Sonymen qatar Ombýdsmen úılestiretin, azaptaý jáne ózge de qatigezdikter men jazalaýdyń aldyn alý jónindegi ulttyq tetikter aıasynda búkil el boıynsha 528 monıtorıńtik maqsattaǵy is-sharalar júzege asyrylyp, sonyń ishinde túzeý mekemeleri, májbúrlep emdeý uıymdary, ýaqytsha oqshaýlaý oryndary, kámeletke tolmaǵandardy beıimdeý ortalyqtary, arnaýly bilim berý uıymdary qamtyldy. Mekeme ákimshilikterine jáne memlekettik organdarǵa adamdardy kútimge alý ahýalyn jaqsartý jóninde usynymdar berildi.

Quqyq buzý týraly shaǵymdardy (1544 saýal) bılik organdarymen birlesip qaraý ózara yqpaldastyq jáne konsýltatıvtik-keńesshilik organdardyń jumysyna qatysý arqyly júzege asyryldy.  

Ombýdsmen mekemesi 212 ulttyq jáne 53 halyqaralyq is-sharaǵa qatysty. Mekemeniń ózi respýblıkanyń barlyq ókilderin qamtı otyryp, eldiń 7 óńirinde jabyq mekemelerdegi quqyq qorǵaý, monıtorıń, balalar quqyǵy jáne halyqtyń basqa da álsiz toptary úshin 12 oqytý sharasyn uıymdastyrdy jáne ótkizdi.   

Halyqaralyq deńgeıde adam quqyqtary jónindegi barlyq jahandyq, óńirlik uıymdarmen, shet elderdegi áriptestermen, sonyń ishinde BUU, IýNISEF, EQYU, EO, Eýropa keńesi, ulttyq quqyq qorǵaý  mekemeleriniń halyqaralyq úılestirý komıteti jáne basqa da uıymdarmen tyǵyz yntymaqtastyq ornatyldy. Halyqaralyq Qyzyl Kres komıtetiniń, Kóshi-qon jónindegi halyqaralyq uıymnyń, BUU adam quqyqtary komıtetiniń, BUU-nyń Adam quqyqtary jáne bosqyn isteri jónindegi joǵarǵy komısarıattarynyń, Islam yntymaqtastyǵy uıymynyń, Nıderland, Norvegıa, BAÁ, Ulybrıtanıa, Reseı quqyq qorǵaý mekemeleriniń basshylarymen, sondaı-aq BUU-nyń Túrli máseleler jónindegi arnaýly baıandamashylarymen kezdesýler ótkizildi.

«Jalpy, ulttyq quqyq qorǵaý mekemesi aldaǵy ýaqytta adam quqyqtaryn qorǵaýdy qamtamasyz etý jáne Qazaqstan Respýblıkasynyń halyqaralyq quqyqtyq mindettemelerin oryndaý jónindegi memlekettik saıasatqa atsalysý jumystaryn jalǵastyratyn bolady.

Memleket basshysy Esepti qarap shyqqan soń tıisti tapsyrmalar berdi», - delingen Aqorda saıtynda.