Qytaılyq uıǵyrlar Sırıa basshysy Bashar Asad rejımine qarsy soǵystyń quralyna aınaldy, - dep jazady  InoPressa.ru basylymy  La Stampa gazetine silteme jasap.

Sırıada soǵysyp júrgen uıǵyrlar myńdap sanalatyn kórinedi. Aýǵanstan, Ortalyq azıa jáne Túrkıa aýmaǵy arqyly Sırıaǵa jetken olar alavıtter tastap shyqqan taýly aýyldardy meken etip, alys strategıalyq pozısıalardy baqylaýlaryna alǵan.

«Búginde Sırıanyń Idlıb provınsıasyna (Sırıanyń soltústik-batysynda ornalasqan provınsıa) myqtap ornyqqan uıǵyrlar – súnnıttik senimdegi túrkitildes halyq» dep jazady basylym.

«Bir jyl buryn «An-Nýsra maıdanynyń» odaqtasy Turkistan Islamic Party (TIP) quramyna kirgen uıǵyrlar birneshe júz adam edi. Idlıb alynǵan soń uıǵyrlardyń uıymǵa kelip qosylýy artyp, sheteldik sodyrlar ishindegi sany jaǵynan eń kóp topqa aınaldy. Búginde olardyń sany 4 myńnan 5 myńǵa deıin jetedi», dep jazady La Stampa.

Bul mıgrasıa Idlıb provınsıasyn tolyqtaı baqylaýyna alǵan «An-Nýsra» áskerimen odaqtastyq arqasynda jáne Qytaı men Pákistan tarapynan júrgizilip jatqan lańkestikke qarsy operasıalar saldarynan oryn alyp otyrǵan sekildi. Pákisttan men Qytaı qyspaǵynan qashshnaqn uıǵyrlar Gındýkýshty tastap Sırıa asqan sıaqty.

Basylym sondaı-aq, Sırıadaǵy radıkaldy emes kóterilisshilerdiń uıǵyrlardyń kesirinen Qytaı sırıadaǵy jaǵdaıǵa aralasyp, Reseıge qoldaý bildirýi múmkin dep qaýiptenetinin jazady. Sırıa úkimeti QHR-dyń Damaskidegi elshiligi ǵımaratynyń qaýipsizdigin kúsheıtip jatqandyǵyn jáne Mezze áýejaıyna qytaılyq áskerı mamandardyń keletinin rastaǵan.

La Stampa sonymen qatar, uıǵyrlardyń deni Sırıaǵa otbasylarymen birge barǵanyn, bul olardyń osy aımaqta birjola qalýdy maqsat tutatynyn bildiredi dep jazady. Ondaǵy uıǵyrlar basqa «sheteldikter» sıaqty emes, ózderiniń júzderin jasyrmaıdy jáne elderine eshqashan oralmaıtyndyqtaryn, oralǵan jaǵdaıda olardy qatań jaza kútip turǵanyn ashyq aıtatyn kórinedi.