Qas qaraıyp, kóz baılanǵan shaq. Kúzgi Parıjdiń jelkem keshi bolatyn. Faýbýrgtegi German kóshesinde ornalasqan dosym S. Avgýst Dýpınniń úıinde edim. Biz bir saǵattaı áńgime-dúken qurǵan soń, úıge Dýpınniń eski dosy, Parıj polısıa qyzmetiniń basshysy G... keldi. Ony biraz ýaqyttan beri kórmegen biz ne úshin kelgenine qyzyǵýshylyq tanytyp, jyly qabaqpen qarsy aldyq. Biz qarańǵyda otyrǵan edik. Dýpın jaryqty jaqpaq bop ornynan turdy da, G.. ne úshin kelgenin aıtqanda, lezde qaıtadan ornyna otyrdy. Ol kópten beri basyn qatyrǵan bir qylmys jóninde aqyldaspaq eken.

• Oılanýdy talap etetin másele bolsa, – dedi Dýpın, – qarańǵyda otyryp aqyldasqanymyz nátıjeli bolmaq.
• Bul seniń taǵy bir erekshe kózqarasyń, – dedi ofıser. Ol óziniń túsinigi aıasynan tys qubylystardyń bárin «erekshelik» dep baǵalaýdy ádetke aınaldyryp, kileń «erekshelikter» áleminde ómir súretin.
• Óte durys, – dedi Dýpın qonaǵyna yńǵaıly oryndyqqa otyrýdy ıshara etip.
• Sonymen máseleniń mán-jaıyn aıtyńyzshy , – dedim men, – kisi ólimi emes dep úmittenemin.
• Joǵa, kisi ólimi emes. Bul óte qarapaıym is, ózimiz asha alatynymyzǵa esh kúmánimiz joq. Biraq jumbaq ári túsiniksiz bolǵandyqtan, máseleniń jaı-japsaryn Dýpınniń de bilgeni jón.
• Qarapaıym ári jumbaq is, – dedi Dýpın.
• Iá, dál solaı. Sonshalyqty qarapaıym istiń jumbaǵy áli kúnge deıin sheshilmegenine ózimiz de tańbyz.
• Bálkim, polısıa qyzmetkerleri úshin máseleni qıyndatyp turǵan onyń sonshalyqty qarapaıymdylyǵy shyǵar, – dedi meniń dosym.
• Óziń bir qaıdaǵy-joqty aıtady ekensiń, – dedi G... qarq-qarq kúlip.
• Múmkin, jumbaqtyń sheshimi kózge ilinbeıtin kishkentaı bir nárse shyǵar, – dedi Dýpın.
• Pa, shirkin! Ne degen aqyl deseńshi!
• Jaraıdy, máseleniń mán-jaıyn aıtyńyz endi, – dedim men.
• Aıtamyn, – dedi ofıser oryndyqqa otyrǵan soń, – Máseleni eki aýyz sózben túsindiremin. Biraq bul óte qupıa is ekenin aldyn-ala eskertip qoıaıyn. Eger bul isti áldekimge aıtqanym málim bolsa, men ornymdy bosatyp, qyzmetimnen ketýge májbúr bolamyn.
• Aıta berińiz, – dedim men.
• Jaraıdy. Men bir laýazymdy tulǵadan mynadaı aqparat aldym: Óte mańyzdy, qundy bir hat patsha bólmeleriniń birinen urlanǵan. Hatty alǵan kim ekenin bilemiz, ony kórgen kýáger bar. Qazir hat onyń ózinde ekeni taǵy belgili.
• Muny qaıdan bilesiz? – dep surady Dýpın.
• Eger ury hattan aırylyp qalsa, onda bir oqıǵalar oryn alýy kerek. Áli ondaı eshteńe bola qoıǵan joq.
• Ashyp aıtyńyzshy, – dedim men.
• Jaqsy. Álgi urlanǵan hat arqyly ury bir kisini aıtqanynan shyǵarmaı, degenimen júrgize alady. – G... jumbaqtap sóılegenine óz-ózine kóńili toldy.
• Men áli tolyq túsingen joqpyn, – dedi Dýpın.
• Mysaly, álgi hatta jaýapty qyzmettegi bir laýazymdy tulǵa týraly jaman nárseler jazylǵan delik. Hatty urlaǵan adam sony jurtqa jarıa etip, abyroıyn tókpes úshin sheneýnik urynyń qandaı talabyna da kónbeıdi me?
• Biraq ury hat ıesin degenimen júrgizý úshin, aldymen, óziniń hatty urlaǵanyn bildirtý kerek qoı. Buǵan kimniń batyly barady?!
• Ury – tiri jannan jasqanbaıtyn D... esimdi mınıstr. Hatty joǵaltqan adam óz bólmesinde oqyp otyrǵanda, D... kirip keledi. Iesi hatty jasyrǵysy kelgenmen, úlgermeı qalady. Sondyqtan hatty ústel ústinde qaldyrýǵa májbúr bolady. Ákki mınıstr D...-nyń timiskilegish janary ústeldegi qaǵaz ben hanymnyń  (hat ıesi) áldenege qobaljyp otyrǵanyn birden baıqaıdy. Hanymnyń «qupıasyn» ishteı boljap biledi. Kelgen sharýasyn áńgimelep bolǵan soń, D... qorjynynan álgi hatpen birdeı qaǵaz shyǵarady da, oqyǵan syńaı tanytady. «Oqyp» bolǵan soń, ústeldegi hattyń janyna qoıady. Sodan soń taǵy da on bes mınýt saıası taqyrypta áńgime aıtyp otyra turady. Aqyrynda bólmeden shyǵarda, ústeldegi hanymnyń hatyn alady da, onyń ornyna óziniń esh mańyzy joq qaǵazyn qaldyryp ketedi. Bólmede úshinshi adam bolǵandyqtan, hanym sonyń bárin kóre tura, lám-mım dep qarsylyq bildire almaıdy.
• Sonda, – dedi Dýpın, – siz hatty urlatqan adamdy da, urlaǵan adamdy da bilesiz. D... hanymdy degenimen júrgizip otyr. Hanym onyń hatty alǵanyn kórgen jáne ol hanymnyń kórgenin biledi. Solaı ma?
• Iá, – dedi ofıser, – D... álgi hatty saıasattaǵy mansap úshin kúreste paıdalanyp júr. Hanym hatty qaıtarý kerek ekenin kúnnen-kúnge uǵyna túsýde. Jarıa túrde qaıtara almaıtyndyqtan, menen kómek suraǵan bolatyn.
• Sizdi eń dana keńesshi dep oılaǵan ǵoı, shamasy, – dedi Dýpın.
• Ondaı pikirde bolýy ábden múmkin, – dep jaýap berdi G... .
• Mınıstr hatty qurtyp jibermeı, saqtap qoıýǵa tyrysatyny anyq. Áıtpese, hanymdy degenimen júrgize almaıdy. Hat áli oda ekenine senýge tıispiz, – dedim men.
• Álbette, – dedi ofıser, – hat mınıstrdiń ózinde ekenine senimdi bolǵandyǵymnan, onyń úıiniń ár qýysyn tintip shyqtym. Bul ońaıǵa soqpady, óıtkeni qupıa túrde tintken edim. Mınıstr isimizden seziktenip qalar bolsa, ózimizge qaýip tónetinin hanym eskertken bolatyn.
• Biraq Parıj polısıasy qupıa túrde tintýdi óte jaqsy meńgergen ǵoı, – dedim men, – mundaı ispen buryn jıi aınalysqan.
• Iá, árıne. Sondyqtan men bul iske kirisken edim. Mınıstrdiń ár túni úıinde bolmaıtyny biz úshin úlken jeńildik. Úı qyzmetkerleri qojaıyn bólmesinen sál qashyqtaǵy bólmelerde uıyqtaıdy. Mende Parıjdegi kez-kelgen esikti asha alatyn kiltter bar ekenin óziń bilesiń. Álgi hatty ıesine qaıtaramyn dep óz-ózime ýáde bergendikten, úsh aı boıy ár túnimdi tintýmen ótkizdim. Qupıa bolsa da, hatty qaıtarsam, óte iri kólemde syıaqy alatynymdy da aıtaıyn. Úıdiń qýys-qýysyn túgel tintip shyqqanǵa deıin, hatty tabatynymnan úmitimdi úzbep edim.
• Bálkim, hat úıge tyǵylmaǵan shyǵar, – dedim men.
• Men úıdiń ishinde dep oılaımyn, – dedi Dýpın.  
• Mınıstrdiń óne boıyn tekserip kórdińizder me?
• Iá, tonaýshy keıpindegi meniń jigitterim onyń tula boıyn eki ret tintip shyqty.
• Ol qajet emes edi, – dedi Dýpın, – D... sonshalyqty aqymaq emes. Sondaı birdeńe uıymdastyrylatynyn ózi de ishteı kútken bolý kerek.
• Sondaı aqymaq emes, – dedi ofıser, – biraq aqyn bolǵandyqtan, sál qıalı.
• Duryyys, – dedi oıǵa shomǵan Dýpın.
• Úıdi qalaı tintkenderińizdi egjeı-tegjeıli aıtyp berińizshi, – dedim men.
• Biz ǵımarattyń qýys-qýysyn túgel tintip shyqtyq. Úıdiń ár bólmesin aptalar boıy túnimen tekserdik. Aldymen, jıhazdardyń bar tartpalaryn qaradyq. Eshqandaı «qupıa» tartpa polısıa ofıseriniń nazarynan tys qalmaıtynyn bilesiz dep oılaımyn. Sodan soń otyrǵyshtardyń otyratyn jumsaq jerin ıne suǵyp tekserdik. Sosyn ústelderdiń betki bóligin aıaqtarynan ajyratyp qarap kórdik.
• Ne úshin? – dep surady Dýpın.
• Hat aıaqtarynda tyǵylmady ma eken dep oıladyq. Ádette, adamdar týra solaı kerýettiń betki jáne astyńǵy bóligin áldeneni jasyrý úshin paıdalanatyn edi ǵoı.
• Biraq sizder jıhazdardy tolyqtaı bólshektep teksermegen sıaqtysyzdar. Hatty nyǵyzdap búktep, bir kishkentaı qýysqa, mysaly, otyrǵyshtyń arqalyǵyna jasyrýy múmkin ǵoı.
• Biz ár jıhazdyń ár bóliginiń ár bólshegin muqıat tekserdik. Aǵash betindegi shań tozańyn alma kórgendeı qalt jibermeıtin qyraǵy kózder áldeqandaı qýys bolsa, kórmeı qalýy múmkin emes edi.
• Kerýet, japqysh, perde, kilemderdiń barlyǵyn teksergen shyǵarsyzdar?
• Árıne. Bul sharýalardy tyndyrǵan soń, ǵımarat qańqasyn tekserdik. Eden, baspaldaq, qabyrǵanyń ishi-syrtyn túgel qarap shyqtyq.
• Kúndiz kúlkiden, túnde uıqydan aıyratyn kelisimshart jasasypsyzdar onda, – dedim men.
• Iá, solaaı. Biraq syıaqy óte úlken mólsherde.
• Úıdiń aýlasyn tekserdińizder me?
• Aýlaǵa kirpish tóselgen. Bastapqydar bul bizdi kúdiktendirgeni ras. Degenmen, kirpishterdiń arasyndaǵy suıyqtyqty tekserip, ornynan qozǵalmaǵanyna kóz jetkizdik.
• D...-nyń qaǵazdarynyń arasyn, kitaphanasynda kitaptarynyń arasyn qaradyńyzdar ma?
• Álbette. Biz ár kitaptyń birde-bir betin jibermeı paraqtap shyǵýmen qosa, muqabalardyń qalyńydyǵyn da muqıat ólshep qaradyq.
• Tusqaǵazdardyń artyn tekserdińizder me?
• Tekserdik.
• Onda, – dedim men, – hat úıdiń ishinde degen oılaryńyz qate.
• Men ne joramaldarymdy da bilmeımin, – dedi G... , – Sonymen, Dýpın, maǵan qandaı keńes beresiń?
• Úıdi qaıtadan teekserip shyǵyńyz.
• Onyń qajet emes ekeni anyq. Meniń tynys alyp, aýa jutatynym qandaı shyndyq bolsa, hattyń úıde joq ekeni de sondaı shyndyq, – dep jaýap berdi G... .
• Men sizge budan artyq keńes bere almaımyn, – dedi Dýpın, – Hattyń tolyq sýrettemesi bar ma?
• Iá, árıne, – dep ofıser qorjynynan dápterin shyǵardy da, hattyń syrtqy kórinisi qandaı ekenin oqyp berdi.       

Sodan soń úıden unjyrǵasy túsken kúıde shyǵyp ketti. Men buryn onyń munshalyqty kóńili qulazyǵanyn kórmegen edim.

Birneshe aıdan soń, Dýpınnyń úıinde áńgimelesip otyrǵanymyzda, ótken jolǵydaı taǵy da ofıser kirip keldi. Amandyq-saýlyq surasqannan keıin, men odan hatty tapqan-tappaǵandyǵyn suradym.

• Dýpın aıtqqannan keıin úıdiń qýys-qýysyn taǵy da tintip shyqtym. Biraq ózim oılaǵandaı eńbegim zaıa ketti, – dedi ol.
• Syıaqy mólsherin qansha dedińiz? – dep surady Dýpın.
• Dál qansha ekenin aıtpaı-aq qoıaıyn, biraq óte kóp mólsherde. Álgi hattyń mańyzy kúnnen-kúnge artyp bara jatqandyqtan, jýyrda syıaqy eki eselendi. Alaıda taǵy eki esege kóbeıse de, osy izdestirgenimnen artyq qolymnan eshteńe kelmeıdi.
• Al men keledi dep oılaımyn.
• Qalaısha?
• Mysaly, ózińizge keńesshi jaldaýyńyzǵa bolady. Dáriger Abernesı jaıly hıkaıany estigen be edińiz?
• Joq, ol qandaı hıkaıa?
• Birde bir sarań baı dáriger Abernesıden tegin medısınalyq keńes alǵysy keledi. Óz bir qý eken, áýeli áńgimeni múlde basqa taqyrypta bastaıdy. Sóz arasynda bylaı deıdi: «Máselen, bir kisi mynadaı aýrýmen aýyrady delik (osy jerde baı óziniń aýrýyn aıtady). Dáriger, sonda oǵan ne isteýdi jón kórer edińiz?»
• Dárigerden keńes alý kerek, árıne! – depti Abernesı.
• Biraq, – dedi kishkene yńǵaısyzdanyp qalǵan ofıser, – maǵan tushshymdy keńes berip, bul máselede kómektesken adamǵa syıaqynyń jartysyn berer edim.
• Olaı bolsa, – dep Dýpın tartpany ashty da, chek alyp ofıserge berdi, – syıaqynyń jartysyn munja jazyńyz, sodan keıin sizge hatty beremin.

Men tańdanysymdy jasyra almadym. G... óz qulaǵyna ózi senbedi. Ol birneshe mınýt boıy sóıleı almaı, Dýpınge ańtarylyp qarap qalypty. Aqyrynda jalma-jan qalamǵa jarmasty da, chekke syıaqynyń jartysyn jazyp, Dýpınge berdi. Meniń dosym chekti bir qarap, qorjynyna saldy da, tartpadan hatty alyp, ofıserge berdi. G... qýanyshtan júregi jarylardaı bop, qoldary dirildegen kúıi hat mátinin oqyp shyqty. Sodan soń sóıleýge de murshasy bolmı, lezde úıden shyǵyp ketti. Ol shyǵyp ketken soń, dosym maǵan hatty qalaı tapqanyn aıtyp berdi.

• Parıj polısıasy, – dedi ol, – úırenshikti izdestirý tásiline óte sheber, olar muqıat ári tózimdi bolǵandyqtan, bul ádis kóbine nátıje beredi. Degenmen, olarda jáne G...-nyń ózinde de bir osaldyq bar: qylmyskerdiń oılaý júıesin joramaldaýǵa tyryspaıdy. Qylmysker kim bolsa da, qandaı qylmys jasalsa da, polısıanyń izdestirý tásili únemi birdeı. G... jáne onyń adamdarynyń hatty taba almaý sebebi – birinshiden, qylmyskerdiń oıyn boljaı almaǵan, ekinshiden, onyń aıla-sharǵysyn baǵalamaǵan. Buryn ózderi qupıa hattardy qalaı jasyrsa, sol jolmen izdegen. G... ózi tintken jerlerde ǵana hat jasyrýly bolýy múmkin dep oılaǵan: ústeldiń aıaǵynda bolmasa, oryndyqtyń arqalyǵynda, onda bolmasa, lınoleýmniń astynda nemese kitap muqabasynyń ishinde. Bul iste polısıanyń sátsizdikke ushyraý sebebi – G... mınıstrdi aqyn bolǵandyqtan, qıalı dep mensinbegen, onyń qýlyq-sumdyǵyn elemegen. «Biraq mınıstr rasymen de aqyn ba?» – dep ózime suraq qoıdym. Olar eki aǵaıyndy, ekeýi de oqyǵan. Mınıstrdiń ózi ǵylymı kitaptar jazǵanyn bilemin. Ol aqyn emes, ǵalym.
• Bul oıyń durys emes. Men ony jaqsy tanımyn. Ol ári ǵalym, ári aqyn. Jaı ǵana ǵalym bolsa, hatty senimdi jerge jasyrýǵa óresi jetpes edi. Mundaı pikirińmen meni tańǵaldyrǵanyńmen, bul basqa taqyryp, bólek másele. Qazir hatty qalaı tapqanyńa qyzyǵyp baram. Áńgimeńdi jalǵastyra ber.
• Jaqsy. D... ǵalym, aqyn ǵana emes, sonymen qatar, saýatty saıasatker ári patsha saraıynyń bedeldi qyzmetkeri. Mundaı adam polısıa úıin tintip, árdaıym baqylaýda ustaıtynyn jaqsy biledi. Ár túni úıinde bolmaýy da, polısıaǵa tintý úshin erkin múmkindik bergendikten. Hatty taba almaǵan polısıa izdegeni úıdiń ishinde degen pikirden birjola kúder úzsin degen maqsaty bolǵan D... polısıa úıdiń qýys-qýysyn túgel tintetinin, jıhaz bólikteriniń bólshektenetinin, qysqasy hatty qaıdan izdeıtinin bilgen. Sol sebepti, hatty tyǵý úshin kózge kórinetin biraq eleýsiz, eshkim oılamaıtyn jerdi tańdaýǵa májbúr bolǵan. O basta máseleni qıyndatyp turǵan sonshalyqty qarapaıymdylyǵy ekenin aıtqanymda, G... qalaı kúlgeni esińde shyǵar?
• Iá, esimde, – dedim men, – ol seni ázildep tur dep oılap qaldy.
• Alaıda men ázildemegen edim, – dedi Dýpın, – Balalardyń geografıalyq kartamen oınaıtyn oıyny bar. Oıynnyń sharty boıynsha, bir oıynshy kartadaǵy qala, ózen, nemese shtat atyn ataıdy. Ekinshisi ony kartadan tabý kerek. Shaǵyn jer-sý attaryn tabý qıyn dep oılaıtyndyqtan, kóp balalar kartadaǵy óte kishkentaı áriptermen jazylǵandaryn tańdaıdy. Al aqyldy oıynshy kóp adam mán bermeıtin, eleýsiz, úlken áriptermen jazylǵan sózdi jasyrar edi. Kóshedegi dúkenderdiń ataýlaryn baıqaýymyz da týra osylaı. Biz shuqshıyp kishkentaı jazýlardy oqýǵa tyrysamyz, al úlken jazýmen jazylǵan sózderge nazar aýdarmaımyz. Hatty mınıstr eshqaıda jasyrmaı-aq «jasyryp» qoıǵanyn, durystap qarasań, kózge kórinip turǵany dosymyz G...-nyń oıyna da kirip-shyqpaǵan.

Batyl mınıstrden mundaı qýlyq shyǵady dep oılaǵandyqtan, pikirimdi dáleldeıin dep sheshtim. Bir kúni tańerteń qara kózildirik kıip, D...-nyń úıine bardym. Parıjdegi eń eńbekqor adamdardyń biri bolsa da, ol jumysqa zaýqy soqpaıtyn, jalqaý bolyp kóringisi keldi. Onyń qýlyǵyna saı men de kózi nashar kóretin adam bolǵandyqtan, qara kózildirik kıip alǵanymdy aıttym. Áńgimelesý barysynda suhbatqa kóńil bólýge de, sondaı-aq aınalama kóz júgirtýge de shamam jetti. Men mınıstr janynda otyrǵan úlken jazý ústeline qyzyǵýshylyq tanyttym. Ústinde bir býma qaǵaz, hattar, birneshe kitap jáne mýzykalyq aspap bar edi. Kózben biraz tintip, kóńilge kúdik salar eshteńe kórgen joqpyn. Aqyrynda meniń kózim bólmeni sharlap júrip, symnan jasalǵan qarapaıym hat salǵyshqa tústi. Týra oshaqtyń ústinde kók jippen tóbedegi ilmekke ilinip tur. Bul hat salǵyshta bes-alty vızıtka jáne bir hat bar eken. Sarǵaıǵan konverttiń ortasy sál ǵana jyrtylypty. Áldekim konvertti jyrtyp, hatty almaq bolyp, keıin ol oıynan aınyp, saqtap qoıǵandaı. Syrtyndaǵy mór D... otbasiniki ekenin birden bilýge bolady. Al hat mınıstrdiń ózine arnalǵanyn ádemi áıel jazýynan uqtym. Konvertti hat salǵyshtyń ortasyna sala salypty.

«Meniń izdegenim osy» dedim ishteı óz-ózime. Maǵan G... aıtqan konverttiń túri basqasha edi. Biraq mór, meken-jaı, áıel jazýy – barlyǵy da polısıany jańylystyrý úshin ádeıi uıymdastyrylǵan nárseler ekenin túsindim. Sonymen qatar, jyrtylǵan, kirlengen konverttiń hat salǵyshqa qalaı bolsa solaı salyna salýy – muqıat ári uqypty mınıstrdiń ádettegi daǵdysyna uqsamaıtyn edi. Osynyń bárin ishteı tarazylaǵan soń, men izdegen hatty tapqanyma kúmánim qalmady. Tezdetip áńgimeni aıaqtap, mınıstrmen sypaıy qoshtasyp, úıden shyǵyp kettim. Ústel ústinde altyn qorabymdy ádeıi qaldyrdym. Kelesi kúni tańerteń álgi «umytqan» zatymdy alý úshin D...-nyń úıine taǵy bardym. Áńgimelesip turǵanymyzda, kenet syrttan atylǵan myltyq daýsy estildi. Áldekim yshqyna aıqaılap, bir top adamnyń úreıli úni shyqty. D... jalma-jan terezege umtylyp, shalqasynan ashyp jiberdi de, syrtqa úńildi. Al men bul múmkindikti qalt jibermeı, oshaqtyń ústinde ilýli hat salǵyshtan keshegi konvertti aldym da, úıimnen daıyndap ákelgen týra sondaı basqasyn ornyna salyp qoıdym. Sodan soń men de terezege jaqyndap, dalaǵa qaradym. Bir er adam ishinde kúkirt bar, biraq oǵy joq qarýmen bir top áıel men balalarǵa kezenip atypty. Kóshedegi shý sodan shyqqan eken. Eshkim zıan shekpegeni anyqtalǵan soń, álgi er adamǵa jaıyna ktýge ruqsat etildi. Men de kóp uzamaı D...-nyń úıinen shyqtym. Jáne birazdan soń álgi er adammen jolyǵyp, ýádelesken aqshany berdim.

• Hat salǵyshqa basqa konvertti ne úshin saldyń sonda? – dep suradym men.
• Meniń saıası kózqarasymdy óziń bilesiń, – dep jaýap berdi Dýpın, – Bul máselede men hanymdy qoldaımyn. On segiz aı boıy mınıstr hanymdy degenimen júrgizip keldi. Al qazir, kerisinshe, hanym mınıstrge aıtqanyn oryndata alady. Óıtkeni, mınıstr hat ózinde emes ekenin uqqansha, áli birneshe apta, bálkim birneshe aı ótedi. Bul aralyqta ózine qoqan-loqy kórsetken D...-ny hanym qaqpanǵa túsire alady. Sóıtip, onyń sáasattaǵy bedelin túsirýine múmkindik bar. Men mınıstrge ǵana emes, adamdyqtan jurdaı kez-kelgen adamǵa múldem janym ashymaıdy. D... men tastap ketken konvertti ashyp kórgende, qandaı kúıde bolatynyn kórgim keledi. 
• Ne úshin? Onda ne dep jazyp ediń?
• Eshteńe jazbaǵanym mınıstrdi ókpeleter dep oıladym. Osydan birneshe jyl buryn Venada ol maǵan san soqtyryp, aldap ketken edi. Sol kezde muny umytpaıtynymdy sypaıy túrde aıtqan bolatynmyn. Ózinen aılasyn asyrǵan kim dep basyn qatyrmas úshin oǵan sál kómekteseıin dedim. Meniń jazýymdy qapysyz tanıtyndyqtan, paraqtyń ortasyna mynadaı bir aýyz sóz jazdym:

«Mundaı batyl qýlyqty áshkereleý úshin odan asqan batyl qýlyq kerek».

Aýdarǵan: Alpamys FAIZOLLA,

ál-Farabı atyndaǵy QazUÝ-dyń jýrnalısıka fakúltetiniń stýdenti