Eldegi alaıaqtyq qylmystardyń teń jartysy Ońtústik Qazaqstanda jasalady, - dep habarlaıdy «Qamshy» portaly TVK-ǵa silteme jasap.
Tek osy aǵymdaǵy jyldyń eki aıynda oblysta 1148 adam alaıaqtardyń qurbany bolǵan. Oblystyq prokýratýranyń habarlaýynsha, óńirdegi alaıaqtyq oqıǵalarynyń sany jyl saıyn 66 paıyzǵa artyp otyrǵan kórinedi.
Oǵan tómende keltirilgen alaıaqtyq qylmystar statısıkasy dálel bola alady:
2010 jyly oblystyq ishki ister departamentinde osy taqylettes 744 qylmys;
2011 jyly – 1128 qylmys;
2012 jyly – 1761 qylmys;
2013 jyly – 3036 qylmys;
2014 jyly – 3730 qylmys;
2015 jyly – 5614 qylmys tirkelgen.
Osylardyń ishinde eń kóp taraǵandary qaryzǵa aqsha alyp qaıtarmaı ketý, nesıe rásimdeý, jumysqa turǵyzý, jer telimderin rásimdeýge baılanysty alaıaqtyqtar kórinedi. Tipti, memlekettik qyzmetke turýdy kózdegender de osyndaı alaıaqtyqtyń qurbany bolyp jatady eken. Prokýratýra mamandary «bolmaı qalǵan memqyzmetshilerdiń» de esebin júrgizip qoıypty. Búdjettik mekemege qyzmetke turam dep aldanǵandardyń jalpy sany 146 bolsa, onyń 10-y ishki ister organdaryna, 7-ýi áskerı bólimderge, 3-eýi tótenshe jaǵdaı men sanıtarlyq qadaǵalaý mekemelerindegi qyzmetten dámeliler bolǵan kórinedi.
Prokýrorlar adamnyń ishindegisin sezip turatyn alaıaqtarǵa kóbinese quqyqtyq bilimi tómen, alaıda, ońaı baıý men joǵary qyzmetke ornalasýǵa degen qumarlyǵy joǵary azamattar jem bolatynyn aıtady.
«2015 jyly Shymkentte kezekti qarjy pıramıdasynyń qyzmetine tosqaýyl qoıyldy. Bul pıramıdaǵa qosylý úshin adamdar 50 myń teńge ótkizip, artynan taǵy osyndaı bes adam ákelip qosýǵa tıis bolǵan. Eger osy shart oryndalsa, prıamıda múshesine 100 myń teńge aqsha berilip kelgen», - deıdi OQO İİD tergeý basqarmasynyń bastyǵy Nurıddın Daýylbaev.
Osylaısha joqtan bar jasap kelgen fırmadan zardap shekken 18 adam anyqtalyp otyr. Pıramıdanyń uıymdastyrýshysy qazir tutqyndalyp, tergeý júrgizilýde.
Ótken jyly tamyz aıynda taǵy bir alaıaq Saryaǵash, Qazyǵurt, Sozaq aýdandarynyń halqyn zar qaqsatqan. Elden jumysqa ornalastyramyn degen jeleýmen aqsha alyp, izin jasyryp ketip júrgen 38 jastaǵy azamat Ordabasy aýdanynyń polıseılerine ustalǵan. Onyń keıin 2014 jyldan beri osylaı eldi aldap kelgeni anyqtaldy.
Dúken, bazarlarda eldi áńgimege tartyp, ózin ýran óndiretin kásiporynda kadr bóliminiń bastyǵymyn dep tanystyratyn ol elden aqsha alyp, aty-jónderin bir «tizimge» jazyp ap taıyp otyrǵan. Osylaısha ol 31 adamnan jalpy quny 3 mıllıon teńgege jýyqtaıtyn aqsha alyp ketken.
Shymkenttik keıbir alaıaqtardyń isi Gogoldiń «Revızoryn» eriksiz eske túsiredi. Aqpan aıynda qalada ózderin farmasevtıkalyq baqylaý mekemesiniń qyzmetkerlerimiz dep tanystyrǵan jalǵan tekserýshiler birneshe dárihanaǵa bas suǵyp, ańqaý satýshylardan 30-dan 150 myń teńgege deıin aqsha bopsalap ketken.
Jalpy el boıynsha keń taraǵan telefon arqyly alaıaqtyq jasaý derekteri de ońtústikte órship tur eken. «Aksıa! Otprav soobshenıe na nomer XXXXXXX, ýchastvýı v konkýrse ı polýchı podarok…» degen habarlamalarǵa aldanǵan qanshama jan telefondarynan 200-300 teńge aqsha ustalǵanyn bilgennen soń baryp qana sandaryn soqqan kórinedi.
OQO İİD krımınaldy polısıa bóliminiń bastyǵy Serik Shalqarov osyndaı alaıaqtarǵa aldanǵandardyń der kezinde quqyq qorǵaý organdaryna der kezinde shaǵymdanbaýy qylmyskerlerdi quryqtaýdy qıyndatyp otyrǵan kórinedi.
