Ata meken – urpaq úshin máńgi uly,
Sarqylmaıtyn saǵynyshy án-jyry.
Úı ishimmen shyǵyp edik seıildep,
Sirkiredi Arqanyń aq jańbyry.
Jańbyr sýy kóshe boılap jıi aqty,
Bala bolyp men sý keshsem uıatty.
Máz-meıram bop asyr sap oınaǵan
Balalarym – balalyǵym sıaqty.
Bul kúnderi kóńilim meniń tolmaıdy,
Maýyq basar oıyn múlde bolmaıdy.
Balalaryn tórt dýalǵa qamap ap,
Bir tamshydan soqqan jelden qorǵaıdy.
Bizdiń kezde bári edi ǵoı basqasha,
Balalyqpen dańǵoılyǵym astasa.
Úıge emes júgirýshi-ek dalaǵa,
Qulpyryp qyr jaýyn jaýa bastasa.
Tektemeıtin sabaz edi-aý sheshemiz,
Balaq túrip aqqan sýdy keshemiz.
Eń alǵashqy aqjaýynda kóp júrseń ,
Bas aýyrmas batyr bolam desemiz.
Sý quıylyp ár jylǵadan taraptan,
Tabıǵatqa kórik berip jaratqan.
Dirdek qaǵyp úıge qaıta bezýshi-ek,
Jańbyr sýyn sorǵalatyp balaqtan.
İs bitirip kelgenendeı-aq opyryp,
Tońǵanyma kórmep edim opynyp.
Sóıleı amaı tisiń-tiske saqyldap,
Jylynýshy-ek meshti qorshaı otyryp.
Kıiz úıden tyrys-tyrys tamǵan tamshyny-aı!
Jetýshi edi ákemde atyn qamshylaı.
Biz otyrmyz malmandaı bop qaltyrap,
Japa shegip mal qaıyrǵan malshydaı..
Kún shyǵatyn nurlanatyn bar alap,
Taǵy oınaımyz kókjıeke qarap-ap.
Jupar shashar tobylǵy ma yrǵaı ma?
Bir ǵajap ıis jatpaımyz ǵoı saralap.
Qaıran kezder oınaýshy- ek esire,
Áke-sheshem bilgen bárin keshire.
Kóktem kelip sirkirese aqjaýyn,
Túse beredi balalyǵym esime...
SHÚKİRSHİLİK ET, BAÝYRYM
“Ajalyń sodan neden bolsa qaýybyń”,
Degen bar ǵoı tersem sózdiń táýirin.
Joqty oılap qara aspandy tóndirmeı,
Bir ýaqyt shúkirshilik et baýyrym.
Kóz alartyp qyzylmenen jasylǵa,
Jetsem dep mánsap, baılyq asylǵa.
Mashınem joq degenińde kúpirlik,
Aıaǵy joq adamdardyń qasynda.
Qalamas ed altyndy da, jahutty,
Qanshama jan tósek tartyp jatypty.
Júgirse eger jalań aıaq muz basyp,
Bárimizden bolar edi baqytty.
Jaratýshym, týra jolǵa jebeshi!
Qymbat kıim, ton kımedim demeshi,
Kedeılikten sińiri shyqqan jalańash,
Jandar azba, bilmeısiń-aý sen osy.
Iman bersin, ynsap bersin júrekke,
Semizdikten dep suraısyń júdep pe?!
Tamaq talǵap, kepıettik etesiń,
Bireýler zar ıt mujyǵan súıekke.
Sý ysrap – aǵyl-tegil aǵyzǵan,
Jaratqanǵa shek keltirmes naǵyz jan.
Mıllıon júr qany keýip, kebersip ,
Bir jutymǵa zar bop otyr tamyzǵan.
Úıim joq dep bolyp júrsiń sharshaǵan,
Jetsek deımiz armandarǵa ańsaǵan.
Úı túgili otany joq bul kúnde,
Túǵan elden bosyp ketti qansha adam.
Narazymyz bizde elge ilese,
“Jaǵdaıymyz jaqsarmady júz ese”.
Kúnde soǵys, qaıǵy jutyp jylaǵan
Elderden biz baqyttymyz myń ese.
Shet sharlap kórsem deısiń -aý- inim!
Ańsadyń ba dúnıeniń saýyǵyn?
Sý qarańǵy ǵarip bolǵan jandar kóp,
Kóre almaı júr ózi týǵan aýylyn.
Túsinigimiz keıde tym-tym taıaz-á,
Úıimiz ystyq, deımiz bizdi aıasa.
Naraýlaýmyz otbasymen otyryp,
Dirdek qaǵyp bireýler júr aıazda.
Elimizde tynyshtyq máńgi ornasyn,
Bir Alla ózi jarylqasyn, qoldasyn.
Ár kúnimizge shúkirshilik eteıik,
Kúpirshilik kóńilde esh bolmasyn!!!
ON TİLEK
Birinshi tilek tileıin,
Birligi artyp Qazaqtyń.
Aman bolsyn basymyz!
Ekinshi tilek tileıin,
Tileýińdi Alla eki etpeı,
Domalasyn órge tasyńyz!
Úshinshi tilek tileıin,
Úmit artqan adal dep,
Ketpesin satyp dosyńyz!
Tórtinshi tilek tileıin,
Tórt qubylań teń bolyp,
Belesterden asyńyz!
Besinshi tilek tileıin,
Bes ýaqyt namazda,
Sajdede bolsyn basyńyz!
Altynshy tilek tileıin,
Aǵaıynmen tatý bol,
Alal bolsyn asyńyz!
Jetinshi tilek tileıin,
Jebep júrsin perishte,
Jamandyqtan qashyńyz!
Segizinshi tilek tileıin,
Sertińizde berik bol,
Túńilsin jannan qasyńyz!
Toǵyzynshy tilek tileıin,
Tońyp júrse týysyń,
Toıǵyzyp qazan asyńyz!
Onynshy tilek tileıin,
Oıly bol úlgi alarlyq,
Júzge jetsin jasyńyz!
Alla berse sóz emes,
Odan da ary asyńyz!
Nurbaqyt Baırahmetuly
