Almaty oblysynda aýyl sharýashylyǵy salasy qarqyndy damyp keledi. Fermerler jemis-jıdektiń barlyq túrin, sondaı-aq aport ósirýdi myqtap qolǵa alýda. Ásirese, bul salanyń damýy jumyssyz eldi eńbekpen, al naryqty ekologıalyq taza ónimmen qamtamasyz etedi, - dep habarlaıdy Qamshy.kz «Almaty» telearnasyna silteme jasap.
Ismaıyl Tamazovtyń aýyl sharýashylyǵy salasymen aınalysyp kele jatqanyna 20 jylǵa jýyqtaǵan. Búginde 112 gektar alqapqa daqyldar egip otyr. Tipti, áý basta onyń ákesi bastaǵan sharýashylyq búginde bir áýlettegi 6 uldyń turmys-tirshiligine arqaý bolǵan. Túgel alqaptan qansha tonna ónim alatynym qupıa dep qaljyńdady. Alaıda jer jaqsy tabys kózi ekenin jasyrmady. Tek qana dán seýip, ónim kútemin degen bos sóz, tańnyń atysynan kúnniń batysyna deıin bap qajet.
«Bir jeti, ıa bolmasa, on kún dep mıymyzdy úırete almaımyz. Bitti, japtyq, eki aptadan keıin kelemiz degen jaǵdaıǵa jete almaımyz da. Álde sana sezimimiz solaı ma eken. Ne boldy eken, ol jaqta men joq dep oılap otyramyn. Keıde saǵat qanshada uıqyǵa kirem, sony bilmeımin óz basym»,- deıdi sharýa qojalyǵynyń basshysy Ismaıyl TAMAZOV.
Fermer aýyl sharýashylyǵy salasy árkimniń qolynan kele beretin is dep sanamaıdy. Sebebi topyraqtyń qunaryn saqtap, jerdi balańdaı baptaýǵa tájirıbe men bilim aýadaı qajet. Alaıda ıgerilmeı bos jatqan jerlerdi Qazaqstan azamatyna jalǵa berý, onyń ishinde jeke menshigine berýdi qup kóredi. Óıtkeni Qazaq eliniń aýyl sharýashylyq jerleri mol bolǵandyqtan, azyq-túlikpen ishki naryqty túgeldeı qamtamasyz etýge qaýqary bar.
«Sál bul salaǵa mán berse alatyn adam, tıtteı áreket istese jumysy júredi. Jer aldym da mal jaıamyn dese, ol da basqa nárse. Sýarmaly jer alǵan adam sol jerde óndiris jasaý kerek»,- dedi sharýa qojalyǵynyń basshysy Ismaıyl TAMAZOV.
Búginde ózi qaraıtyn 112 gektar alqaptyń elýinde - soıa, 25 gektarynda - kartop, 12 gektar jerge baý-baqsha, 2 gektar jerde qulpynaı ósip jatyr. Qazir sharýashylyqty qadaǵalaýǵa jıyrma shaqty jumysker jumyldyrylǵan. Al, ónimderdi jınaý kezinde mańaıdaǵy aýyl turǵyndaryn jumysqa tartady. Egindi sýarý jaǵynan eshqandaı qıynshylyq joq. Endigi maqsat - tehnıkany jańartý deıdi.
Biz turǵan alqaptyń 3 gektar alqapqa 2004 jyly otyrǵyzylǵan 3 myń túp alma aǵashy 2007 jyldan bastap jemis bere bastaǵan. Bir tal shybyqtyń dál osyndaı úlken aǵash bolyp ósýine kóp ter tógilip, qajyrly qaırat jumsalǵan. Aýyl sharýashylyǵy salasynda sapaly ónim alamyn degender jyldyń 365 táýligi men bir kúnniń 24 saǵatyn eńbekke arnaý kerek.
Qazaqstanda aýyl sharýashylyǵy salasyn damytý ımporttalatyn azyq-túlik ónimderiniń azaıýyna sep bolmaq. Qazirgi tańda elimizde azyq-túlik ónimderiniń negizgi ımporttalatyn túrleri jalpy ımport kóleminiń 60 paıyzynan asyp jyǵylady. Onyń 18 paıyzyn kondıterlik ónimder qurasa, sút ónimderi - 13, qant - 8, qus eti - 6, jemis-jıdek qalbyry - 6, shaı - 5, ósimdik maıy men shujyq ónimderi - 3 paıyzǵa teń.
