Bıyl Otan qorǵaýshylar jáne Jeńis kúni qarsańynda elimizde áskerı parad ótpeıtin boldy. qorǵanys mınıstrligi qyrkúıek aıynda Táýelsizdiktiń 25 jyldyǵyna arnalǵan aýqymdy áskerı parad ótkiziletinni habarlady.
Qanshama mıllıon adamdy qyrǵynǵa ushyratqan soǵystaǵy Jeńis kúnin merekeden góri eske alý kúni retinde atap ótkenimiz jón, árıne. Bul kúni ulan-asyr toı jasap, kóshede ándetkenimiz jaraspaıdy. Al, eldigimiz ben egemendigimizdiń basty kepili hám qorǵany – Qarýly kúshterimizdiń qurylǵan kúnin laıyqty atap ótýdiń bir sáti túspeı-aq qoıǵanyn qynjyla otyryp moıyndaımyz.
Qarýly kúshter qurylǵan 1992 jyldan beri bul dataǵa jalpyhalyqtyq sıpat berilmeı keledi. Buǵan bir sebep, jyl saıyn bul kún Jeńis merekesi men soǵan oraı uıymdastyrý sharalarynyń tasasynda qalyp keledi. Jeńis kúnin mereke retinde atap ótýdiń kesiri Otan orǵaýshylar kúnin laıyqty merekeleýge nuqsan keltirip keldi. Astana men Almaty, oblystardaǵy áskerı ujymdar, oqý oryndary Jeńis kúnine daıyndalamyz dep, bul merekege durys kóńil bóle almaýda. Áskerı-patrıottyq mazmudaǵy sharalardyń barlyǵy Jeńis meıramynyń quramdas bóligine aınalyp júr. Bul jerde biz Jeńis kúnin tómendetip, Otan qorǵaýshylar kúnine jyǵyp bergeli otyrǵan joqpyz. Aıtpaǵymyz, ár meıramnyń, ataýly kúnniń óz orny, atap ótýdiń belgili-bir tártibi bar. Osy taraptaǵy kemshilikterge nazar aýdartqymyz keledi.
Álemde táýelsiz el bola tura, túrli saıası, tarıhı sebepterge baılanysty Qarýly kúshteri joq jıyrmadan astam el bar. Táńir jarylqap, qazaq eli egemendigin jarıalaı salysymen buryn tolyqtaı Máskeýdiń qaraýynda bolyp kelgen áskerı qurylymdardy retke keltirip, óz Qarýly kúshterin qurdy. Dıplomatıalyq tetikter arqyly halyqaralyq qaýymdastyqtan qaýipsizdigimizge kepildik alǵanymyzben, jas memlekettiń ishki turaqtylyǵy men syrtqy qaterlerden saqtanýynda áskerdiń alar ornyn eshkim joqqa shyǵarmas. Táýelsizdiktiń ár jyldarynda qazaq áskeri barynsha nyǵaıyp, teńizde de, áýede de, jerde de júıeli áskerı kúshterge ıe bolyp otyr. Memleket basshylyǵy Qarýly kúshterdi damytý úshin kásibı armıa qurý mindettemesin alyp otyrǵanyn jáne bilemiz. Olaı bolsa, egemendik pen erkindiktiń kepili – azat eldiń áskeri qurylǵan kúnniń eleýsiz qalýy jaqsy emes.
Bul jerde Otan qorǵaýshylar kúniniń tasada qalýyna áli kúnge 23 aqpandy merekeletip qoıǵan keshegi keńestik sananyń salqynymen qatar, qoǵamdaǵy enjarlyq ta sebep bolyp otyrǵan syńaıly. Jyl saıyn 7 mamyr tek Qorǵanys mınıstrligine ǵana qatysty data sekildi áserde júremiz. Áskerıler, áıteýir ózderin ózderi quttyqtap, túrli sharalar ótkizip, máz-meıram bolyp jatady. Basqalarymyz ondaı qadamǵa attap basqymyz joq. Bul qalaı? 75 jyl burynǵy Jeńiske Keńes halqy neniń arqasynda qol jetkizdi? Qýatty áskersiz dúnıe júzilik soǵysta jeńiske jetý múmkin be edi? Maıdan dalasyn da, tyldaǵy halyqty da jaýǵa qarsy kótergen jeńiske degen senim, sol kezdegi ortaq otanǵa degen súıispenshilik emes pe edi? Olaı bolsa, Táýelsiz Qazaqstan azamattarynyń Otanǵa degen súıispenshiligi Otan qorǵaýshylar kúnine degen kózqarasymen ólshenbeı me?
Jomart Abdollauly
