Aqtóbede azamattardyń mıllıondaǵan teńgesin qaltaǵa basqan 2 áıel qoǵa tústi, - habarlaıdy dep Qamshy.kz Qazaqpartqa silteme jasap.
Bul týraly oblystyq İİD baspasóz qyzmeti aqparat taratty.
Máselen, 2 mamyr kúni 46 jastaǵy qala turǵyny polısıaǵa kelip, 2014 jyldyń naýryzynda tanys áıel 2 mln. 300 myń teńge aqshasyn aldap alyp ketkendigine shaǵym túsirgen. Onyń aıtýynsha, kúdikti áıel ony memlekettik baǵdarlama aıasynda páter alýǵa qol ushyn beretindigine sendirgen.
«Jedel izdestirý jumystary barysynda Sazdy polısıa bólimshesiniń ýákilderi atalǵan qylmysty jasaǵan kúdiktini ustady. Ol 40 jastaǵy qala turǵyny bolyp shyqty. Tergeý barysynda ustalǵan áıel kinásin moıyndady. Buǵan qosa, tergeýshiler onyń dál osyndaı basqa da qylmystarǵa qatysy bar ekendigin dáleldedi», - delingen habarlamada.
Sonymen qatar İİD aqparatyna qaraǵanda, Sazdy polısıa bólimshesiniń qyzmetkerleri qala turǵynynyń aryzy boıynsha taǵy bir 42 jastaǵy áıeldi ustady. Ol da aldaý arqyly qala turǵynynyń 2 mln. teńgege jýyq qarjysyn qaltasyna basqan. Tergeýshiler onyń osy sıpattaǵy 4 qylmysqa qatysy barlyǵyn anyqtady.
Olardyń osyǵan uqsas ózge de qylmystarǵa qatysy tekserilýde. Bul faktiler QR Qylmystyq kodeksiniń 190 baby boıynsha sotqa deıingi tergeýdiń biryńǵaı tiziliminde tirkelgen.
