Ońtústik Qazaqstan oblysynyń polıseıleri esirtik satýdy kásip etken zeınetker áıel men onyń ulyn qolǵa túsirdi, - dep habarlaıdy Qamshy.kz Skifnews.kz portalyna silteme jasap.
Ustaý barysynda kúdiktilerdiń úıinen 5 keliden astam geroın zaty tabylyp, tárkilengen.
Tártip saqshylaryna jergilikti turǵyndardyń biri aryzdanyp, Tóle bı aýdanynda esirtki saýdasynyń qyzý júrip jatqanyn aıtqan. OQO İİD Esirtki bıznesine qarsy kúres basqarmasynyń qyzmetkerleri «Arlan» arnaıy jasaǵy jáne Tólebı AİİB-men birigip, kúdiktilerdi ustaý operasıasyn júrgizdi. Nátıjesinde, 1954, 1976 jáne 1993 jyly týǵan úsh kúdikti qolǵa tústi. Olardyń eń úlkeni - 62 jastaǵy áıel qylmystyq topqa jetekshilik etken. Onyń qyryqqa kelgen uly men 23 jastaǵy taǵy bir azamat zeınetkerge kómektesýmen aınalysypty. Anasy men uly buǵan deıin de esirtki satamyn dep bir ret sottalǵan deıdi polıseıler.
Kúdiktiler saýdany úıinde júrgizgen. Nysandy tintý kezinde 5 polıetılen qaltasyna oralǵan geroın tabyldy. Olardyń jalpy salmaǵy 5 keliden sál asady. Atalǵan jaıt boıynsha QR QK 297-babymen «Esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý» qylmystyq is qozǵaldy. Kúdiktiler qamaýda. Sotqa deıingi tergeý amaldary júrgizilýde.
Aǵymdaǵy jyldyń basynan beri Ońtústik Qazaqstan oblysynda esirtki zatyn saqtaý jáne satý boıynsha 87 qylmys tirkelgen. 22 kg asa esirtki zaty tárkilengen, onyń ishinde 5,5 kg geroın esirtkisi. Tártip saqshylary zańsyz esirtki zatyn satýmen aınalysqan 47 kúdiktini quryqtaǵan.
