Qazaqstan Respýblıkasynyń Prezıdenti N.Á.Nazarbaevqa jáne beıbit sherýge shaqyrýshy qozǵalystar men azamattarǵa
Qurmetti Nursultan Ábishuly!
Jer Kodeksine engen ózgerister boıynsha bastalǵan narazylyqtar qazirgi kúni eń qaýipti mejege jetti.
Qurylǵan komısıa sheshimin kútpesten sherýge shaqyrýshylar jáne ony qoldaýshylar sany kúrt artyp otyr, eger jaǵdaı osylaı ýshyǵa beretin bolsa, halqymyzdyń ekige bólinýi jáne el tutastyǵyna nuqsan kelýi múmkin.
Memleketimizdiń bolashaǵy sarapqa salynyp jatqan qysyltaıań kezeńde, Sizden, ózińizdiń Konstıtýsıalyq jáne laýazymdyq pravolaryńyzdy paıdalanyp, tómendegideı shuǵyl sheshimder qabyldaýyńyzdy suraımyn:
1. Jer Kodeksine engizilgen barlyq ózgeristerdiń kúshin komısıa sheshimin kútpesten shuǵyl túrde joıý.
2. Bılik pen halyqtyń arasynda qalyptasqan senimsizdikti qalpyna keltirý maqsatynda «Saılaý týraly» Zańǵa ózgerister engizý týraly shuǵyl tapsyrma berý jáne ol ózgeristerde tómendegideı asa mańyzdy
máselelerdi qamtý:
-Aýdandyq maslıhattan Parlamentke deıingi depýtattar quramynyń 50% partıalyq tizimmen, 50% jeke tulǵalardyń ózin-ózi usynýy boıynsha saılanýy;
-Barlyq saılaý komısıalarynyń quramynyń kemi 30% opozısıalyq partıalar men qozǵalystardan quralýy;
-Osy saılaý týraly Zańdy ózgertýdi 5-6-aı ishinde aıaqtap, qabyldaýdy júzege asyrý;
-Bir jyl aıasynda jańa Saılaý týraly Zań negizinde jańa depýtattar saılaýyn ótkizý;
-Jańadan saılanǵan maslıhattar depýtattarynyń Senatqa senatorlar saılaýyn ótkizý;
3. Osy ýaqytqa deıin ótkizilgen sherýlerge qatysýshylardy, eger olar eshqandaı aýyr qylmys jasamasa, jazalaýdy jáne qýdalaýdy toqtatý týraly quqyq qorǵaý organdaryna tapsyrma berý. Sherýler ótkizýge shaqyrýshy qozǵalystar men azamattardy joǵaryda jazylǵan sheshimder qabyldanǵan
jaǵdaıda, beıbit sherý ótkizýden jáne basqa saıası talaptar qoıýdan bas tartýǵa shaqyramyn. El bolashaǵy úshin qajetti ózgeristerdi jańa qabyldanǵan Saılaý týraly Zań aıasynda júzege asyrýǵa kúsh jumsap,
ózgeristerdiń beıbit jolmen júzege asýy-Qazaqstan memleketiniń jáne halqymyzdyń tutastyǵy, bılik pen halyq arasyndaǵy senimniń qalpyna kelýi úshin asa mańyzdy ekenin eki jaqtyń esine taǵy da salǵym keledi.
Meniń osy usynystaryma qoldaý bildiretin azamattardyń basqa pikirleri men talaptaryn jazbaı, tek «Qoldaımyn» degen sózben, ózi turatyn jeri nemese telefon nomerlerin jazýyn suraımyn. Basqa pikir jáne talaptardy tap osy kezeńde bılik aldyna qoıý-máseleni sheshýdi qıyndatady
dep esepteımin jáne ondaı pikirlerdi óz paraqshalaryńda jazýdy ótinemin.
Eldegi tirkelgen áleýmettik jeliler basshylary osy usynystarymdy elge tanystyrý maqsatynda taratýǵa kómek kórsetedi dep senemin.
Estaı Jumaǵazyuly Jaılybaı
Qazaqstan Respýblıkasynyń azamaty, Aqtóbe qalasynyń turǵyny.
