Jańa eńbek zańnamasymen kelispeıtinin bildirgen Fransıadaǵy eń iri kásipodaqtardyń biri bıyl jazda elde fýtboldan ótetin «Eýropa chempıonatyn boldyrmaımyz» dep ses kórsetip otyr, - dep habarlaıdy Qamshy.kz 24kz-ke silteme jasap.

Reıter agenttiginiń habarlaýynsha, «Jalpyǵa birdeı eńbek konfederasıasynyń» músheleri jarysty qabyldaıtyn 10 qalanyń árqaısysynda narazylyq aksıalaryn ótkizbek. Sonyń saldarynan júk tasymaly, qoǵamdyq kólik, jedel járdem jáne qoqys shyǵarý qyzmeti toqtap qalýy múmkin degen qaýip bar.

Fransıa kóshelerin jaılaǵan sherýlerge eńbek mınıstriniń usynǵan zań jobasy túrtki bolyp otyr. Qujat qyzmetkerlerdiń jumys saǵattaryn kóbeıtýdi jáne ústemaqy mólsherin azaıtýdy kózdeıdi. Sondaı-aq, qyzmetkerlerdi jumysqa qabyldaý jáne shyǵarý joldaryn jeńildetý josparlanyp otyr.