Ótken jyly QazUÝ TMD elderi joǵarǵy oqý oryndary arasynda halyqaralyq úkimetaralyq «COMSATS» (Ońtústikte turaqty damýdy qamtamasyz etý maqsatyndaǵy ǵylym men tehnologıa boıynsha komısıa) beldi uıymynyń múshesi atanǵan jalǵyz ýnıversıtet.
Qazaqstandyq joǵary oqý orny uıym quramyna Kolombo (Shrı-Lanka) qalasynda ótken úılestirý keńesiniń májilisiniń sheshimi boıynsha qabyldandy. Buǵan deıin «COMSATS» halyqaralyq sarapshylary ýnıversıtetke kelip, QazUÝ-diń ǵylymı-aǵartýshylyq áleýetine keshendi taldaý jasaý arqyly onyń ǵylymı-ınnovasıalyq damýyna joǵary baǵa bergen bolatyn.
QazUÝ «COMSATS» uıymynyń múshesi retinde aqparattyq jáne qarym-qatynas tehnologıalary, nanotehnologıalar men jańa materıaldar, jańǵyrtylatyn energıa kózderi, klımat ózgerisi men qorshaǵan ortany qorǵaý, bıotehnologıa baǵyttarynda ótetin halyqaralyq ǵylymı-aǵartýshylyq jobalarǵa qatysýǵa múmkindikter alady.
Bıylǵy jyldyń 17-19 mamyrynda Islamabad qalasynda (Pákistan) ótken kezekti úılestirý keńesiniń otyrysynda bizdiń ýnıversıtettiń bir jyldyq jumysynyń qorytyndysy tyńdaldy. QazUÝ-diń ǵylymı-aǵartýshylyq jáne ınovasıalyq qyzmetin halyqaralyq sarapshylar joǵary baǵalady. Sonymen qatar, ýnıversıtettiń aldyńǵy qatarly tájirbıe almasý ortalyǵy, halyqaralyq tanymaldylyǵy men BUU-nyń álemdik hab baǵdarlamalarynyń «Akademıalyq áserin» turaqty damý baǵytynda basqarý barysynda aıtarlyqtaı jumystar atqarǵany atap ótildi.
Búginde QazUÝ álemniń ozyq tehnologıalyq joǵary oqý oryndary qatarynda bolýy onyń halyqaralyq deńgeıdegi zertteý ýnıversıtetine aınalý jolyndaǵy baǵytynyń durys ekenin dáleldeıdi.
QazUÝ – quramyna 8 ǵylymı-zertteý ınstıtýttaryn, ǵylymı-tehnıkalyq jáne gýmanıtarlyq baǵyttaǵy 30-dan astam ortalyqtar men laboratorıalardy biriktirgen elimizdegi eń iri ǵylymı-aǵartýshylyq joǵary oqý orny. Memleket qarjylandyratyn ǵylymı zertteýlerdiń kóbi QazUÝ-da júzege asyrylady jáne bólingen qarjynyń 10%-y jas ǵalymdardy qoldaýǵa jumsalady.
Ýnıversıtet ǵalymdarynyń jobalary óndiriske engiziledi, al ǵylymı jumystary "Scopus" jáne "Thomson Reuters" málimetter bazasyna kiretin joǵary reıtıńti basylymdarda jaryq kóredi. QazUÝ - "Thomson Reuters" halyqaralyq agenttiginiń «Ǵylym salasynda jetken kórnekti jetistikteri úshin» arnaıy dıplomymen marapattalǵan Qazaqstandaǵy birinshi jáne biregeı joǵary oqý orny.
1994 jyly qurylǵan, shtab-páteri Islamabad qalasynda ornalasqan «COMSATS» uıymy Afrıka jáne Latyn Amerıka, Azıanyń 25 memleketin biriktiredi. Tanymal halyqaralyq uıymdar: IýNESKO, ISESKO, ıslamdyq yntymaqtastyq uıymy, BUU-nyń ındýstrıaldyq damý uıymy, ıslamdyq damý banki jáne t.b. uıymdardyń basshylyǵymen, tikeleı qoldaýymen halyqaralyq «COMSATS» jobalary iske asyrylady.
